བཱ་རཱ་ཧཱ་མུ་ཁི་ནི་གཡོན་པའི་པུས་མོ་ལའོ། །སརྦ་དུཥྚཱ་ནཱཾ་ཙཀྵུརྨུ་ཁཾ་བནྡྷ་བནྡྷ་ནི་གཡས་པའི་གཞོགས་ལའོ། །ཛམྦྷ་ཡ་ཛམྦྷ་ཡ་ཡང་རྒྱབ་ཏུའོ། །སྟམྦྷ་ཡ་སྟམྦྷ་ཡ་ནི་གཡོན་པའི་གཞོགས་ལའོ། །མོ་ཧ་ཡ་མོ་ཧ་ཡ་ནི་ནུ་མ་གཉིས་ཀྱི་བར་ལའོ། །ཧྲཱིཿནི་ཡན་ལག་ཐམས་ཅད་ལ་དགོད་དོ། །ཧཱུྃ་ནི་གསལ་བར་བྱས་པ་ལའོ། །ཕཊ་ནི་ལོང་བར་བྱེད་པའོ། །སྭཱ་ཧཱ་ནི་ཚིམ་པར་བྱེད་པའོ། །ཐལ་མོ་མཉམ་པར་བྱས་ལ་སྡིགས་མཛུབ་གཉིས་ཀྱི་མཐེ་བོང་གཉིས་ཀྱི་བར་དུ་བཞག་པ་ནི་ཡན་ལག་གི་ཕྱག་རྒྱ་སྟེ་འདི་ཡིས་ཡན་ལག་ཐམས་ཅད་ལ་ཆོ་ག་བྱའོ། །འོད་ཟེར་ཅན་འབྱུང་བའི་རྒྱུད་སྟོང་ཕྲག་བཅུ་གཉིས་པ་ལས་མཆོག་ཏུ་ཤིན་ཏུ་ཡང་སྙིང་པོར་གྱུར་པའི་འོད་ཟེར་ཅན་གྱི་རྟོག་པ་བརྒྱ་ཕྲག་བདུན་པ་ཕྱུང་བ་རྫོགས་སོ།། ༄༅༅། །རྒྱ་གར་སྐད་དུ། ཨཱརྱ་ཛ་ཡ་བ་ཏཱི་ནཱ་མ་མ་ཧཱ་བི་དྱཱ་རཱ་ཛཱ། བོད་སྐད་དུ། འཕགས་པ་རིག་སྔགས་ཀྱི་རྒྱལ་མོ་ཆེན་མོ་རྒྱལ་བ་ཅན་ཞེས་བྱ་བ། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་ལུས་འཕགས་རི་ལ་བཞུགས་ཏེ། དེའི་ཚེ་འབྱུང་པོ་རྣམས་འཁྲུགས་པར་གྱུར་ནས། མ་དད་པའི་ལྷ་དང་། ཀླུ་དང་། གནོད་སྦྱིན་དང་། སྲིན་པོ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། སྲུལ་པོ་དང་། ལུས་སྲུལ་པོ་དང་། གྲུལ་བུམ་རྣམས་འཁྲུགས་ཤིང་ཁྲོས་ཏེ། དགེ་སློང་རྣམས་དང་། དགེ་སློང་མ་རྣམས་དང་། དགེ་བསྙེན་རྣམས་དང་། དགེ་བསྙེན་མ་རྣམས་གང་དག་སངས་རྒྱས་དང་། ཆོས་དང་། དགེ་འདུན་ལ་མངོན་པར་དད་པ་དེ་དག་ལ་གནོད་པར་བྱེད་དེ་དེའི་ཚེ་ཀུ་ཅོའི་སྒྲ་ཆེན་པོ་བྱུང་བར་གྱུར་ཏོ། །དེ་ནས་བཅོམ་ལྡན་འདས་ཐུགས་རྗེ་ཆེན་པོའི་ཤུགས་ཀྱིས་ཡང་དག་པར་ཟིན་ནས་ཕྱོགས་བཞིར་རྣམ་པར་གཟིགས་ཏེ། ཕྱོགས་བཞི་ནས་གློག་དང་། སེར་བ་དང་། ཆར་ཆེར་འབབ་པ་དང་། སྐར་མདའ་ལྟུང་བ་འོང་བ་གཟིགས་སོ། །གཟིགས་ནས་ཀྱང་རྡོ་རྗེ་འཆང་ལ་བརྡ་མཛད་དོ། །དེ་ནས་རྡོ་རྗེ་འཆང་གཏུམ་པོ་ཁྲོས་ཏེ། སྟན་ལས་ལངས་ནས་ཤར་ཕྱོགས་སུ་རྡོ་རྗེ་འབར་བ་སྟོང་མངོན་པར་སྤྲུལ་ཏེ་འདི་སྐད་ཅེས་གསོལ་ཏོ།