།འཇིག་པའི་དུས་ཀྱི་བསྐལ་པའི་མེ་ལྟ་བུ་གནས་པའི་ལྷ་མོ་སེམས་ཅན་ཐམས་ཅད་དབང་དུ་བྱེད་མ། རྩོམ་པའི་དང་པོ་ཉིད་དུ་འཕགས་པའི་དགེ་འདུན་ལ་སྟོན་མོ་བྱ་སྟེ། རས་སར་པ་ལ་བཅོམ་ལྡན་འདས་མ་ལྷ་མོ་འོད་ཟེར་ཅན་གྱི་ཐང་སྐུ་ལྷ་བཟོ་མཁན་གསོ་སྦྱོང་ལ་གནས་པས་བྲི་བར་བྱའོ། །གུས་པ་དང་ལྡན་པས་སྟེང་གཡོགས་ཡོད་པའི་ཕྱོགས་གཅིག་ཏུ་ཕྱིས་ནི་ཐང་སྐུ་རྫོགས་པར་བྱ་སྟེ། དགེ་སློང་མ་རྣམས་ལ་སྟོན་མོ་སྦྱིན་ཞིང་བུ་མོ་གཞོན་ནུ་མ་རྣམས་ལ་ཡང་སྟོན་མོ་སྦྱིན་ནོ། །དེ་ནས་རྫིང་བུ་འམ་རྒྱ་མཚོ་འམ། རི་བོ་འམ། དུར་ཁྲོད་དམ། ཤིང་ནྱ་གྲོ་དྷའི་རྩ་བ་འམ། སྐྱེད་མོས་ཚལ་ལམ། ལྷ་ཁང་ངམ། ཁང་པ་རུ་གདུང་དང་བཅས་པའི་མཆོད་རྟེན་གྱི་ནང་དུ་སྐུ་གཟུགས་བཀྲམ་ལ་མཆོད་པ་རྣམ་པ་ལྔ་དང་བཅས་པས་ཡི་གེའི་གྲངས་ཀྱི་འབུམ་བཟླའོ། །དེ་ནས་དང་པོ་དང་། གཉིས་པ་དང་། གསུམ་པས་སྡིག་པ་འདག་པར་འགྱུར་རོ། །བཞི་པ་ནི་རྒྱ་མཚོ་ལས་བརྒལ་བ་དང་། རི་བོ་ལ་གནས་པ་དང་། གཞོན་ནུ་མ་དང་ཕྲད་པ་མཐོང་ངོ་། །དེ་ནས་སྡིག་པ་དག་པ་ཡིན་ནོ་ཞེས་རྟོགས་པར་བྱའོ། །ལྔ་པ་ལ་མེ་མར་གྱི་རྩེ་མོ་འཕེལ་ཞིང་དྲི་ཞིམ་པོ་སྣ་ལ་བྲོའོ། །དྲུག་པ་ལ་སངས་རྒྱས་དང་བྱང་ཆུབ་སེམས་དཔའ་མཐོང་ངོ་། །བདུན་པ་ལ་ནི་འོད་ཟེར་ཅན་མཐོང་བར་འགྱུར་རོ། །གང་གི་ཚེ་སྒྲུབ་པོས་རྟགས་འདི་རྣམས་མཐོང་ན་དེའི་ཚེ་སྔགས་གྲུབ་པ་བརྟན་པོར་གྱུར་པ་ཡིན་ནོ། །གང་གི་ཚེ་མི་དགེ་བའི་མཚན་མ་མཐོང་ན་དེའི་ཚེ་ནི་སྦྲུལ་དང་། སྤྲེའུ་དང་། བྱི་ལ་དང་། བོང་བུ་དང་། རྟ་དང་། གླང་པོ་ཆེ་དང་། མ་ཧེ་དང་། ཁྱི་དང་། དེ་བཞིན་ཕན་ཚུན་དུ་འཐབ་བཞིན་པ་དང་། སྒྲུབ་པ་པོ་སྐྲག་བཞིན་པར་གལ་ཏེ་མཐོང་ན་དེའི་ཚེ་ཉིས་འགྱུར་གྱི་འབུམ་ཚོ་བཟླས་ན་དེའི་ཚེ་བཅོམ་ལྡན་འདས་མའི་གཟུགས་སུ་དངོས་སུ་མཐོང་སྟེ་དེ་ནས་རྟོག་པ་ལས་གསུངས་པའི་ལས་འགྲུབ་བོ། །ཨོཾ་མཱ་རཱི་ཙྱཻ་སྭཱ་ཧཱ་ཞེས་བྱ་བའི་སྔགས་འདི་ལས་ཐམས་ཅད་ལ་སྦྱར་བར་བྱའོ། །རྟག་ཏུ་བརྒྱ་ཕྲག་བརྒྱད་བཟླས་ན་འཛིན་བློ་རྣོ་བར་འགྱུར་ཞིང་གཞུང་སྟོང་ཕྲག་གཅིག་འཛིན་པར་འགྱུར་རོ། །ཚེ་རིང་བ་དང་། ནད་མེད་པ་དང་། སྟོབས་དང་ལྡན་པར་འགྲུབ་ཅིང་དེ་ཐམས་ཅད་ཀྱིས་མཆོད་པའི་འོས་སུ་འགྱུར་རོ།