།དྲི་ཞིམ་སོགས་པས་ཡོངས་སུ་བསྒོ། །བསྲུང་བའི་ཆོ་ག་བྱས་ནས་ནི། །གཙང་མའི་ཕྱོགས་སུ་ཡང་དག་བཞག །སྔགས་རིག་ལས་ཀུན་ཤེས་པ་ཡིས། །ཤིན་དུ་མཉམ་གཞག་བཟླས་པ་བྱ། །དེ་ནས་ཐ་ག་པར་སོང་ནས། །ཅི་འདོད་པ་ཡི་རིན་སྦྱིན་ནོ། །རང་དབང་ཡན་ལག་མ་ཉམས་དང་། །དཀར་པོའི་ཆོས་ལ་རྟག་ཏུ་དད། །རྒན་མིན་ནད་ཀྱིས་གདུངས་པ་མིན། །ལུད་པ་དབུགས་མི་བདེ་བ་སྤངས། །མ་ནིང་སྨད་པ་མ་ཡིན་དང་། །འཕྱེ་བོ་མ་ཡིན་སྐྲ་དཀར་སྤངས། །ཀུན་གྱིས་བཀུར་བའི་མཚན་ཉིད་ལྡན། །རབ་བསྔགས་བལྟ་ན་སྡུག་པ་དང་། །བློ་དང་ཡང་དག་སྤྱོད་པ་དགེ། །འཇིག་རྟེན་པ་ཡི་ཚུལ་ལ་བརྟེན། །དངོས་གྲུབ་འདོད་པས་དེ་ལ་ནི། །རས་བཟང་བཏགས་པའི་ཆེད་དུ་བསྐུལ། །གྲོགས་པོ་རིགས་བཟང་རབ་བསྔགས་ཤིང་། །བློ་ལྡན་བཟོ་ནི་མཁས་པ་དང་། །ཤིན་ཏུ་ཁྱད་པར་མཆོག་གྱུར་པའི། །རས་ཐག་བཟང་ལ་བསྐུལ་བར་བྱ། །རབ་ནི་རབ་ཏུ་བསྒྲུབ་པར་བྱ། །འབྲིང་ནི་འབྲིང་ལ་བསྒྲུབ་པར་བྱ། །ཐ་མལ་ཕྲན་ཚེགས་ལས་ལ་ནི། །དམན་པ་ཉིད་ནི་ཐམས་ཅད་ལ། །བཟོ་བོ་ཅི་ལྟར་སྨྲ་བ་བཞིན། །རིན་ནི་དེ་ལྟར་སྦྱིན་པར་བྱ། །དང་པོའི་ཚིག་ནི་ཡང་དག་འབྱུང་། །བཟོ་བོ་ལ་ནི་སྔགས་རིགས་པས། །དེ་ནས་མྱུར་དུ་རིན་བྱིན་པ། །དཔའ་བོའི་ཚོང་ཞེས་དེ་ལ་བརྗོད། །དོན་དུ་གཉེར་མེད་དེ་ལ་ནི། །རིན་དུ་སྨྲ་བྱེད་སྒྲུབ་པ་པོ། །འདི་ནི་མྱུར་དུ་འགྲུབ་བྱེད་པའི། །རས་ནི་བཟང་པོ་བླ་ན་མེད། །ལས་ཀུན་བྱེད་ཅིང་མཆོད་པ་སྟེ། །ལྷ་དང་མི་ཡི་བདེ་བ་སྦྱིན། །འབྱུང་པོ་ཀུན་གྱི་དཔལ་འགྱུར་ཞེས། །ཡང་དག་རྫོགས་སངས་རྒྱས་ཀྱིས་གསུངས། །དེ་ནས་རིག་པ་འཛིན་པས་ཐ་ག་པ་ལ་རྒྱུ་སྐར་བཟང་པོའམ། ཆོ་འཕྲུལ་གྱི་ཟླ་བ་ཕྱེད་དམ་ཉིན་ཞག་དགེ་བའམ་གཟའ་དགེ་བ་བལྟས་ཏེ་གསོ་སྦྱོང་སྦྱིན། ཡང་ན་དུས་ཀྱི་མཆོག་དཔྱིད་ཀྱི་དུས་ཀྱི་ཟླ་བ་ཡར་གྱི་ངོ་ལ་ཤིང་ཨ་མྲའི་མེ་ཏོག་སྐྱེས་ཤིང་ཤིང་གི་མཆོག་རྣམས་ཀྱི་ཡལ་ག་དང་མེ་ཏོག་རྒྱས་པ་དེའི་དུས་མཚམས་སུ། སྔ་དྲོ་ཉི་མ་འཆར་བ་ལ་སྔར་བསྟན་པའི་ཐ་ག་པ་ལྷ་ལ་དབུལ་བར་འོས་པའི་ཁ་ཟས་བསྟེན་ཅིང་། གོས་གཙང་མ་བགོས་ལ་མགོ་ལ་ཅོད་པན་བཅིངས་ནས་ཁྲུས་ལེགས་པར་བྱས་ཏེ། ཙནྡན་དཀར་པོ་དང་གུར་གུམ་གང་ཡང་རུང་བས་ལུས་བྱུགས་ནས་ག་པུར་གྱི་དྲིས་ཁ་ལ་བསྒོས་ཏེ་ཡིད་དགའ་བ་དང་བཀྲེས་པ་དང་སྐོམ་པ་མེད་པར་བྱས་ཏེ།