གཡོན་པ་ཁྲོ་བོའི་ལུས་ཀྱིས་གནས་པ་རྡོ་རྗེ་ཁུ་ཚུར་མ་རྡོ་རྗེ་ལྕགས་ཀྱུ་མ་རྡོ་རྗེ་ལུ་གུ་རྒྱུད་མ་དཔུང་བཟང་མ་རྡོ་རྗེ་སྡེ་མ་ཆ་བྱད་ཅི་ལྟ་བ་བཞིན་དུ་བགེགས་ཀྱི་གདན་ལ་གནས་པ། རིག་པའི་རྒྱལ་པོ་ཐམས་ཅད་དང་རིག་པའི་རྒྱལ་མོ་འཁོར་དང་བཅས་པ་བཟླས་པ་དང་། ཕྱག་རྒྱ་དང་ལྡན་པ་ཇི་ལྟར་ཤེས་པ་བཞིན་བྲི་བར་བྱའོ། །དེ་དག་གི་ཡང་གཡོན་དུ་ཟུར་བཞིར་སྣ་ཚོགས་རྡོ་རྗེའི་ཕྱག་རྒྱ་བྲི་བར་བྱ་སྟེ། བྲིས་ནས་ཀྱང་གནས་གང་དུ་རིག་པའི་ཚོགས་མ་དྲན་པའི་གནས་དེ་དག་ཀྱང་འདིར་བཞུགས་ཤིག་ཅེས་བརྗོད་པར་བྱའོ། །དེའི་སྟེང་དུ་ཕ་རོལ་ཏུ་ཕྱིན་པ་དྲུག་དང་། བཅོམ་ལྡན་འདས་ཡུམ་མཱ་མ་ཀཱི་བྲི་བར་བྱ་སྟེ་རྒྱན་ཐམས་ཅད་ཀྱིས་བརྒྱན་པ། གཟུགས་ཤིན་ཏུ་མཛེས་པར་བྱའོ། །དེ་དག་གི་སྟེང་དུ་གཙུག་ཏོར་གྱི་རྒྱལ་པོ་བརྒྱད་ཀུན་ནས་འབར་བའི་ཕྲེང་བའི་ཕྱག་རྒྱ་བཅིངས་ནས་རང་རང་དག་གི་འཁོར་ལོས་སྒྱུར་བའི་རྒྱལ་པོ་ཆེན་པོའི་གཟུགས་སུ་བྲི་བར་བྱ་སྟེ། གསེར་གྱི་མདོག་ཅན་དབང་པོ་ཤིན་ཏུ་དུལ་ལ་རྒྱན་ཐམས་ཅད་ཀྱིས་བརྒྱན་པ། དེ་བཞིན་གཤེགས་པ་ལ་ཟུར་གྱིས་བལྟ་བ་དག་ལ། འདི་ལྟ་སྟེ། གཙུག་ཏོར་འཁོར་ལོས་སྒྱུར་བ་དང་། གཙུག་ཏོར་མངོན་པར་འཕགས་པ་དང་། གཙུག་ཏོར་གདུགས་དཀར་པོ་དང་། རྒྱལ་བའི་གཙུག་ཏོར་དང་། པདྨའི་གཙུག་ཏོར་དང་། རྣམ་པར་རྒྱལ་བའི་གཙུག་ཏོར་དང་། གཟི་བརྗིད་ཕུང་པོའི་གཙུག་ཏོར་དང་། གཙུག་ཏོར་མཐོན་པོ་སྟེ། བརྒྱད་པོ་འདི་དག་ནི་གཙུག་ཏོར་གྱི་རྒྱལ་པོ་རྣམས་སོ། །གཡོན་དུ་བྲི་བ་ནི་རང་སངས་རྒྱས་རྣམས་སོ། །འཇུག་པའི་ཕྱོགས་ཀྱི་སྒོར་ནི་བྱང་ཆུབ་སེམས་དཔའ་གཉིས་བྱ་སྟེ། གཡས་ཕྱོགས་སུ་ནི་འཇིག་རྟེན་ལས་འདས་པར་འགྲོ་བ་ཞེས་བྱ་བ་རལ་པའི་ཅོད་པན་འཆང་བ། ལུས་ཞི་བ་ལག་པ་གཡས་པ་མཆོག་སྦྱིན་པས་ཕྲེང་བ་འཛིན་པ། ལག་པ་གཡོན་པས་སྤྱི་བླུགས་འཛིན་ཅིང་སྒོ་ལ་མངོན་དུ་ཕྱོགས་པ་བཞིན་ཅུང་ཟད་ཁྲོ་གཉེར་དང་བཅས་པ་བྲི་བར་བྱའོ། འཇུག་པའི་སྒོའི་གཡོན་ཕྱོགས་སུ་ནི་བྱང་ཆུབ་སེམས་དཔའ་ཆེན་པོ་མ་རྒྱལ་བ་ལས་རྒྱལ་བ་ཞེས་བྱ་བ་བྲི་བར་བྱ་སྟེ། ལུས་རབ་ཏུ་ཞི་བ་རལ་པའི་ཅོད་པན་འཆང་བ། ལག་པ་གཡོན་པ་ན་དབྱིག་པ་དང་སྤྱི་བླུགས་འཛིན་པ། ལག་པ་གཡས་པ་ན་མཆོག་སྦྱིན་པ་ཕྲེང་བ་འཛིན་པ་བཞིན་ཅུང་ཟད་ཁྲོ་གཉེར་དང་ལྡན་པ་སྒོ་ལ་མངོན་དུ་ཕྱོགས་པ་བྲིའོ།