དེ་ནས་འཇམ་དཔལ་གཞོན་ནུར་གྱུར་པ་བཅོམ་ལྡན་འདས་མེ་ཏོག་ཡང་དག་པར་སྐྱེས་པ་རྒྱལ་པོའི་དབང་པོ་དེ་བཞིན་གཤེགས་པས་གནང་ནས། བཀོད་པ་ཐམས་ཅད་ཀྱི་རྒྱན་བྱང་ཆུབ་སེམས་དཔའི་སྤྱོད་པ་དང་རྒྱུ་མཐུན་པ། བྱང་ཆུབ་ཀྱི་སྙིང་པོ་ཐོབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །བཅོམ་ལྡན་འདས་ཤཱཀྱ་ཐུབ་པ་ལ་མཆོད་པ་བྱ་བའི་ཕྱིར་ལྷའི་མེ་ཏོག་རྣམ་པར་བཀོད་པ་དང་། རྒྱལ་མཚན་དང་བ་དན་དང་ཕྲེང་བའི་ཚོགས་དང་། རིན་པོ་ཆེའི་དྲིལ་བུའི་དྲ་བས་འབྲེལ་པ་སྙན་པའི་སྒྲ་སྒྲོགས་པ། ཕྱིར་མི་ལྡོག་པའི་བྱང་ཆུབ་སེམས་དཔའི་ས་ཐོབ་པར་བྱེད་པ། ལྷའི་དྲི་དང་བྱུག་པ་དང་ཕྲེང་བ་དང་ཕྱེ་མའི་ཆར་འབབ་པར་མངོན་པར་སྤྲུལ་ཏོ། །དེ་ནས་གནས་གཙང་མའི་རིས་ཀྱི་ལྷའི་བུ་རྣམས་ཀྱིས་བྱང་ཆུབ་སེམས་དཔའི་ངོ་མཚར་རྨད་དུ་བྱུང་བའི་ཆོ་འཕྲུལ་གྱི་རྣམ་པར་འཕྲུལ་པ་མཐོང་ནས། བ་སྤུ་ལྡང་ཞིང་གནས་གཡོ་བ་མཐོང་ནས་སྙིང་འདར་ཞིང་དངངས་ཏེ། ཅི་བདག་ཅག་གི་འབྱོར་པ་ཉམས་པར་མ་གྱུར་ཏམ་ཞེས་ཕན་ཚུན་དུ་རིངས་པར་འགྲོ་ཞིང་སྐད་མཐོན་པོས་སྨྲ་བ་རྩོམ་པར་བྱེད་དེ། འདི་སྐད་དུ་བཅོམ་ལྡན་འདས་ཡོངས་སུ་བསྐྱབ་ཏུ་གསོལ། །ཤཱཀྱ་ཐུབ་པ་ཡོངས་སུ་བསྐྱབ་ཏུ་གསོལ་ཞེས་གསོལ་ཏོ། །དེ་ནས་བཅོམ་ལྡན་འདས་ཀྱིས་ཐམས་ཅད་དང་ལྡན་པའི་གནས་གཙང་མའི་འཁོར་རྣམས་ལ་བཀའ་སྩལ་པ། གྲོགས་པོ་དག་མ་འཇིགས་ཤིག་མ་འཇིགས་ཤིག །བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུར་གྱུར་པ་འདི་ནི་མེ་ཏོག་ཡང་དག་པར་སྐྱེས་པའི་རྒྱལ་པོ་དེ་བཞིན་གཤེགས་པ་དེའི་སྤྱན་སྔ་ནས་ང་ལ་བལྟ་བ་དང་། ཕྱག་བྱ་བ་དང་བསྙེན་བཀུར་བྱ་བ་དང་། དོན་ཆེན་པོའི་སྤྱོད་པ་དང་སྔགས་ཀྱི་ཚིག་དང་། རྒྱ་ཆེ་ཞིང་རྨད་དུ་བྱུང་བའི་ཆོས་ཀྱི་ཚིག་སྟོན་པའི་ཕྱིར་འོངས་པ་ཡིན་ནོ། །དེ་ནས་འཇམ་དཔལ་གཞོན་ནུར་གྱུར་པས་བཅོམ་ལྡན་འདས་ཤཱཀྱ་ཐུབ་པ་ལ་ལན་གསུམ་བསྐོར་བ་བྱས་ཏེ། མིག་མི་འཛུམས་པར་བཅོམ་ལྡན་འདས་ལ་བལྟ་ཞིང་ཞབས་གཉིས་ལ་བཏུད་དེ། ཚིག་འབྲུ་འདི་དག་གིས་བཅོམ་ལྡན་འདས་ལ་བསྟོད་པ། །སྐྱེས་བུ་བསྐྱེད་པ་ཁྱོད་ཕྱག་འཚལ། །སྐྱེས་མཆོག་ཁྱོད་ལ་ཕྱག་འཚལ་ལོ། །སྐྱེས་བུ་གཙོ་བོ་ཁྱོད་ཕྱག་འཚལ། །སྤྱོད་པ་ཐམས་ཅད་དོན་སྒྲུབ་པ། །སྐྱེས་བུ་སེང་གེ་ཁྱོད་ཕྱག་འཚལ། །ཕུང་ཁྲོལ་ཐམས་ཅད་ཟློག་བྱེད་པ། །དཔའ་བོ་ཆེན་པོ་ཁྱོད་ཕྱག་འཚལ། །ངན་འགྲོ་ཐམས་ཅད་འཇིག་བྱེད་པ། །སྐྱེས་བུ་པད་དཀར་ཁྱོད་ཕྱག་འཚལ།