གྲོང་ཁྱེར་མེ་ཏོག་ཅེས་བྱ་བར། །དེ་ནི་ཁྲོ་བོ་གྲུབ་པར་གྱུར། །དབུལ་བས་ཡོངས་སུ་ཟིལ་མནན་པས། །རྒྱལ་པོ་རྣམས་ནི་ཚར་བཅད་བྱས། །ཁྲོ་རྒྱལ་གཤིན་རྗེ་གཤེད་དེ་ཡི། །འཇམ་པའི་དབྱངས་ཀྱིས་འདིར་གསུངས་པ། །སེམས་ཅན་མ་རུངས་རྣམས་དང་ནི། །གདུལ་དཀའ་འདུལ་བར་བྱེད་པ་དང་། །ཕན་པ་མིན་ལས་བཟློག་དོན་དང་། །ཕན་པ་ཉེ་བར་འཕེལ་ཕྱིར་དང་། །སེམས་ཅན་རྣམས་ནི་རྗེས་གཟུང་དང་། །སེམས་ཅན་སྲོག་འཆད་དགག་ཕྱིར་རོ། །བྲམ་ཟེའི་ཁྱེའུ་རྨོངས་པ་དེ། །དབུལ་བ་ཁྲོ་བ་ཆགས་པ་ཡིས། །རྒྱལ་པོའི་སྲོག་ལ་གནོད་པའི་ཕྱིར། །ཁྲོ་བོའི་སྔགས་ནི་ཟློས་པར་བྱེད། །དེ་འོག་རྣམ་པར་གྲགས་པ་ནི། །བྲམ་ཟེ་ཡི་གེ་དང་པོ་ཨ། །ཆོས་དོན་དགེ་བ་ལྡན་བདག་ཉིད། །བདེན་པར་སྨྲ་ཞིང་དབང་པོ་ཐུལ། །མངའ་བདག་མང་པོས་བཀུར་ཅེས་པ། །དེ་ཚེ་སྔགས་ནི་ཟློས་པར་འགྱུར། །སྔགས་ནི་བསྒྲུབ་པར་གྱུར་པ་ལ། །དབང་འགྱུར་ཡིན་གྱིས་གཞན་མ་ཡིན། །འབྱུང་པོ་དབང་དུ་གྱུར་པ་ན། །དེ་ཚེ་ནོར་དང་ལྡན་པར་འགྱུར། །དེ་འོག་རྣམ་པར་གྲགས་པ་ནི། །བྲམ་ཟེ་ཆོས་དོན་སེམས་བྱེད་པ། །དེ་ནས་མཐར་ནི་དང་ཡིག་ཤ། །མ་ལའི་ཡུལ་དུ་དེ་ནི་འབྱུང་། །ས་སྟེང་སྔགས་ནི་ཟློས་པར་གྲགས། །བསྟན་པ་མཆོག་ལའང་རབ་ཏུ་དད། །རིག་པ་རྗེས་བཟུང་མ་རུངས་དང་། །ཚངས་པའི་སྲིན་པོ་སྲིན་པོ་དང་། །འབྱུང་པོ་ཤིན་ཏུ་མ་རུངས་བཅས། །རྣམ་པ་སྣ་ཚོགས་ཤ་ཟ་དང་། །བསྟན་དང་འགྲོ་བ་སྣ་ཚོགས་ནི། །དེ་དག་མ་ལུས་དེ་དབང་འགྱུར། །དེ་བཞིན་བྲམ་ཟེའི་མཚན་ལྡན་པ། །ཐམས་ཅད་དེ་ཡི་དབང་དུ་འགྱུར། །དེ་འོག་རྣམ་པར་གྲགས་པ་ནི། །ལྷོ་ཡི་ཕྱོགས་སུ་བྲམ་ཟེ་ནི། །ཡི་གེ་དང་པོར་བ་བསྟན་པ། །སྟོན་པའི་བསྟན་ལ་དེ་གཙོར་བྱེད། །མཆོད་རྟེན་ཀུན་དགའ་ར་བ་གནས། །སྟོན་པའི་གཟུགས་བརྙན་ཡིད་འོང་གིས། །ས་ནི་རྒྱ་མཚོ་གཉིས་མཐར་ཐུག །ཐམས་ཅད་ཀྱི་ནི་རྒྱན་དུ་བྱས། །དེ་འོག་རྣམ་པར་གྲགས་པ་ནི། །བྲམ་ཟེ་གཙོ་བོ་ནོར་ཆེན་ལྡན། །དང་པོའི་ཡི་གེ་ན་ཞེས་པ། །ལྷོ་ཡི་ཕྱོགས་སུ་ཡང་དག་བསྟན། །བདག་ཉིད་ཆེན་པོ་སྔགས་ཟློས་ལྡན། །ངེས་པར་བྱང་ཆུབ་གཞོལ་བར་འགྱུར།