།རྒྱལ་མཆོག་ཡི་གེ་ཏ་ཞེས་བྱ། །དེ་ཡི་ཚེ་ན་འབྱུང་བར་འགྱུར། །གོ་ཌཱའི་འཇིག་རྟེན་རྣམས་ཀྱི་གཙོ། །ཆེན་པོའི་ནད་ཀྱིས་ཡང་དག་བཏབ། །ནད་དེ་ཉིད་ཀྱིས་ཉམ་ཐག་ནས། །དུས་བྱས་ནས་ནི་འོག་ཏུ་སོང་། །དེ་འོག་ཡི་གེ་ད་ཞེས་བྱ། །ཉིན་ཞག་ཅུང་ཟད་རྒྱལ་པོ་བྱེད། །གོ་ཌཱའི་ཡུལ་དུ་བྱུང་གྱུར་པ། །གང་གཱའི་འགྲམ་དུ་ཡང་དག་གནས། །དེ་འོག་ཡི་གེ་བྷ་ཞེས་བྱ། །ཞག་གསུམ་དུ་ནི་རྒྱལ་པོ་བྱས། །དེ་ནས་ས་སྲུང་རྒྱལ་པོ་ནི། །ཐམས་ཅད་དུ་ནི་དེ་ཚེ་འབྱུང་། །རྒྱལ་པོ་དེ་ནི་སྙན་པར་སྨྲ། །བྱས་པ་གཟོ་ཞིང་སྟོབས་ཀྱང་ཆེ། །བུད་མེད་དབང་འགྱུར་བཀྲེན་ཞིང་གླེན། །དགྲ་ལས་རྒྱལ་ཞིང་མི་ཕྱེད་འགྱུར། །དགེ་བའི་བཤེས་གཉེན་ལ་བརྟེན་ནས། །དེ་ཚེ་གཏོང་བ་ཆེན་པོར་འགྱུར། །མཆོད་རྟེན་ཉམས་དགའ་གཙུག་ལག་ཁང་། །ཀུན་དགའ་ར་བ་རྣམ་མང་པོ། །རྫིང་ཡང་ཆུ་ནི་ཕུན་སུམ་ཚོགས། །བསོད་ནམས་གང་ནི་ལེགས་མཛེས་པ། །དེ་དག་མང་པོ་སྟོན་བྱེད་ཅིང་། །གྲགས་དང་སྙན་པའི་དོན་ལ་བརྩོན། །ལྷ་ཡི་སྟེགས་ནི་ཉམས་དགའ་དང་། །ཕུག་དང་གནས་ཁང་དག་ཀྱང་བྱས། །ཡ་མཚན་ཅན་གྱིས་ཡང་དག་གནོན། །སྣ་ཚོགས་མུ་སྟེགས་གནས་ཀྱིས་ནི། །རྒྱ་མཚོའི་འགྲམ་གྱི་མཐར་ཐུག་པར། །ཕྱོགས་དེ་ཐམས་ཅད་རྣམ་པར་གནོན། །བརྩེ་ལྡན་ལོངས་སྤྱོད་ལྡན་དཔག་མེད། །རྒྱལ་པོ་དེ་ནི་ཆོས་ལ་དགའ། །ཤར་གྱི་ཕྱོགས་སུ་རྒྱས་པར་ནི། །ཐེ་ཚོམ་མེད་པར་འབྱུང་བར་འགྱུར། །རྟག་ཏུ་ཆོ་གར་ཡང་དག་ལྡན། །ཀ་བ་ཉེ་བར་གནས་གྱུར་ཚེ། །གང་གཱའི་འགྲམ་ལ་ཡང་དག་བརྟེན། །དེ་ཚེ་རྒྱལ་ཐབས་བྱས་པ་ནི། །ལོ་ནི་སུམ་ཅུ་དག་དང་བདུན། །ལོ་ནི་བརྒྱད་ཅུ་དག་ནི་འཆི། །དེ་ནས་དེ་ཡི་ལུས་ཞིག་ནས། །ལྷ་རྣམས་དག་ཏུ་ཉེ་བར་སྐྱེ། །དེ་ནས་དཔལ་ལྡན་ཀླུ་ཡི་རྒྱལ། །ཆོས་ཀྱི་བདག་ཉིད་ཆོས་ལ་དགའ། །མཆོད་རྟེན་གང་ཞིག་འདི་བྱས་དང་། །སྟོན་པའི་གཟུགས་བརྙན་ཡིད་དུ་འོང་། །དེ་ཚེ་ས་སྟེང་དགེ་འདུན་ཆེད། །ལོགས་སུ་གཙུག་ལག་ཁང་དག་བྱས། །རྣམ་པར་སྨིན་པ་དེ་ཡིས་ནི། །སྲིད་པ་ཐ་མ་ལ་བརྟེན་ནས། །ངེས་པར་སངས་རྒྱས་ཉིད་ལམ་དང་། །མི་གཡོ་གོ་འཕང་ཐོབ་པར་འགྱུར།