།འོད་ཆེན་ས་ཡི་བདག་པོ་དེ། །དུ་མ་བྱེད་པར་ཐེ་ཚོམ་མེད། །བློ་དང་ལྡན་པ་འཇམ་དབྱངས་ཀྱི། །སྔགས་ཀྱང་དེས་ནི་རབ་བསྒྲུབས་པ། །དེ་དག་ཡི་གེ་དྲུག་ཅེས་བྱ། །དོན་ཆེན་ལོངས་སྤྱོད་འཕེལ་བྱེད་པའོ། །དེ་ཡི་སྔགས་ཀྱི་མཐུ་ཡིས་ནི། །དེ་ནི་ལོངས་སྤྱོད་ཆེ་བར་འགྱུར། །བློ་དང་ལྡན་པ་མཐར་གྱིས་ནི། །མྱུར་དུ་བྱང་ཆུབ་གཞོལ་བར་འགྱུར། །དེ་བཞིན་གཤེགས་པའི་བསྟན་འདི་ལ། །རྣམ་པ་སྣ་ཚོགས་བྱ་བ་བྱེད། །བྱང་གི་ཕྱོགས་ལ་བརྟེན་ནས་ནི། །དེ་ཡི་ཚེ་ན་འབྱུང་བར་འགྱུར། །ལྷ་ལྡན་ཡུལ་ཞེས་བྱ་བ་ཡི། །གངས་ཅན་རི་ཡི་ནང་གནས་པའི། །རྒྱལ་པོ་མི་ཡི་ལྷ་ཞེས་པ། །ལིཙྪ་བཱི་རྣམས་རིགས་སུ་བྱུང་། །དེ་ཡང་སྔགས་ཀྱི་དོན་བསྒྲུབས་ཏེ། །ལོངས་སྤྱོད་ཆེ་དང་ལྡན་པར་འགྱུར། །རིག་པ་ལོངས་སྤྱོད་ལྡན་ཞེས་བྱ། །མི་ཡི་བདག་པོས་དེ་ཡང་གྲུབ། །ལོ་ནི་བརྒྱད་ཅུར་རྒྱལ་སྲིད་བྱས། །དེས་ནི་རྐུན་མ་རྣམ་པར་སྤངས། །རྒྱལ་པོ་དེ་ནི་སྲོག་སྤངས་ནས། །དེར་ཡང་སྔགས་ནི་མྱུར་འགྲུབ་སྟེ། །ཞི་དང་རྒྱས་པ་བསིལ་བྱེད་པའོ། །འཇིག་རྟེན་སྒྲོལ་མ་ཞེས་གྲགས་དང་། །ལྷ་མོ་གོས་དཀར་མ་དང་ནི། །དཀར་མོ་ཆེན་མོ་གཞན་ཕན་བརྩོན། །རྟག་ཏུ་ཡིད་ནི་མི་སྐྱོ་བའོ། །དེ་ལ་སོགས་པ་གསུངས་པ་ཡི། །དེ་བཞིན་རྒྱལ་པོ་མང་པོ་ནི། །རྣམ་པ་དུ་མ་མང་པོ་དག །ཁ་དོག་སྣ་ཚོགས་སྣ་ཚོགས་གཟུགས། །ཁ་བ་ཅན་གནས་ཀླ་ཀློའི་རྒྱལ། །དེ་ཡང་སྟོན་པ་མཆོད་བྱེད་པའོ། །ཁྱུ་མཆོག་ཁྱུ་མཆོག་བཟང་པོ་དང་། །ས་འོད་དེ་བཞིན་ས་འོད་བཟང་། །དེ་བཞིན་ཕ་རོལ་གནོན་ཉིད་དང་། །རྐང་པའི་འགྲོས་ཞེས་བསྟན་པ་ཡིན། །ས་སྲུང་དང་ནི་བེའུ་དང་། །འོད་ལྡན་ཉིད་ནི་ཕྱི་མ་ཡིན། །ཐ་མར་ཆར་རྒྱལ་ངང་ཚུལ་ཏེ། །ཀླ་ཀློ་རྣམ་པ་སྣ་ཚོགས་ཡིན། །དེ་འོག་ལུགས་ནི་རྣམ་ཞིག་ཅིང་། །ཕྱི་རོལ་སྐྱེ་དགུས་ཉེ་བར་སྤྱོད། །དེ་ཚེ་བལ་ཡུལ་བདག་པོ་ནི། །མཚོན་གྱིས་འཐབ་པས་རྣམ་པར་འཇིག །ཀླ་ཀློའི་རྐུན་པོ་བསྟེན་པ་ཡི། །དེར་ནི་རྒྱལ་པོ་རྣམ་པར་འཇིག །ས་བདག་དུ་མ་གསུངས་པ་རྣམས། །སྣ་ཚོགས་ལྷ་དང་བྲམ་ཟེ་དག །དེ་ཡི་ཚེ་ན་འབྱུང་བར་འགྱུར།