།དབེན་པར་ཚིག་ནི་རབ་ཏུ་སྨྲས། །ཇི་སྐད་བཀའ་སྩལ་མ་ལུས་བྱས། །ས་བདག་ཇི་སྟེ་གཟིགས་མི་མཛད། །དེ་ནས་མྱུར་དུ་ས་བདག་དེ། །དེ་ཚེ་ཤིང་རྟ་དེ་ལ་ཞོན། །རྣམ་པ་སྣ་ཚོགས་མཆོད་དོན་དུ། །རྣམ་པ་སྣ་ཚོགས་མཛེས་པའི་ཕྱིར། །གསེར་དང་དེ་བཞིན་དངུལ་དག་དང་། །རྣམ་པ་སྣ་ཚོགས་མཆོད་རྟེན་བརྒྱན། །དེ་ནས་གནོད་སྦྱིན་ཤིང་རྟ་དང་། །མྱུར་དུ་རྒྱལ་པོ་རབ་ཏུ་སོང་། །གང་ན་རྒྱལ་བའི་མཆོད་རྟེན་ཡོད། །སྐད་ཅིག་གིས་ནི་དེ་ཡུལ་དུའོ། །རྣམ་པ་སྣ་ཚོགས་མཆོད་པ་ཡིས། །རྒྱལ་པོ་དེས་ནི་དེ་ལ་མཆོད། །དེ་ཚེ་རྒྱལ་བའི་མཆོད་རྟེན་གྱིས། །ས་རྣམས་མ་ལུས་མཛེས་པར་བྱས། །བདག་ཉིད་ཆོས་རྒྱལ་མྱ་ངན་མེད། །སྨོན་ལམ་དག་ནི་འདེབས་པར་བརྩོན། །དགེ་བའི་རྩ་བ་འདི་དོན་གྱིས། །བླ་ན་མེད་པའི་སངས་རྒྱས་ཤོག །དེ་བཞིན་དེས་ཀྱང་རིག་ནས་ནི། །རྒྱལ་པོ་ཆོས་ནི་སྟོན་པར་བྱེད། །དེ་ནི་ཤི་ནས་ལྷ་རུ་འགྲོ། །ངེས་པར་བྱང་ཆུབ་གཞོལ་བར་འགྱུར། །ལོ་ནི་བརྒྱད་ཅུ་རྩ་བདུན་དུ། །ས་སྟེང་མཆོད་རྟེན་མཆོད་པར་འགྱུར། །ལོ་ནི་བརྒྱ་དང་ལྔ་བཅུར་འཚོ། །གནོད་པ་མེད་པའི་རྒྱལ་ཐབས་བྱེད། །དེ་རང་ལས་ལས་བྱུང་བ་ཡི། །ལུས་ལ་ནད་ནི་ཡོངས་སུ་འབྱུང་། །ནད་དེས་གནོད་ཅིང་སྡུག་བསྔལ་ནས། །ཤི་ནས་མཐོ་རིས་འགྲོ་བར་འགྱུར། །ལྷ་ཡི་ཕུན་སུམ་ཚོགས་པ་ཆེ། །ཐོབ་ནས་རྗེས་སུ་མྱོང་བར་བྱེད། །དེ་ནི་ཡིད་གཞུངས་རིམ་གྱིས་སུ། །རྙེད་པར་དཀའ་བའི་བྱང་ཆུབ་ཐོབ། །རྡོ་རྗེ་པདྨའི་རིགས་དག་ནི། །སྔགས་ཀྱང་དེ་ཚེ་འགྲུབ་པར་འགྱུར། །ཛམ་བྷ་ལ་སོགས་གནོད་སྦྱིན་ཡང་། །འདི་ཡི་བསྟན་པའི་རྗེས་སུ་འཇུག །རྫུ་འཕྲུལ་ཆེན་པོ་འཕྲོག་མ་སོགས། །གནོད་སྦྱིན་མོ་ཡང་ཡང་དག་འགྲུབ། །འཁོར་ལོས་སྒྱུར་བས་བསྐྱེད་པ་ཡི། །འཁོར་ལོས་སྒྱུར་བའི་སྔགས་ཀྱང་གྲུབ། །གང་དག་རྒྱལ་བས་བསྟན་པའི་སྔགས། །རིག་པའི་རྒྱལ་པོ་རྫུ་འཕྲུལ་ཆེ། །གཙུག་ཏོར་ལ་སོགས་ཐམས་ཅད་དང་། །གང་གཞན་རྒྱལ་བས་གསུངས་པའང་ཡིན། །དེ་ཡི་དུས་ནི་རབ་བཟང་ལ། །སྒྲུབ་པ་དམ་པ་དག་ཀྱང་བྱ། །དམ་པས་ཐ་མ་བསྒྲུབ་མི་བྱ། །དམ་པ་ཐོབ་པར་བྱ་ཕྱིར་རོ།