སེམས་ཅན་གདུག་པ་ཐམས་ཅད་ལ། །བཟླས་པ་ཙམ་གྱིས་རེངས་པར་བྱེད། །རྣམ་པ་སྣ་ཚོགས་ལས་བྱེད་ཅིང་། །ཁྱད་པར་དུ་ཡང་གཞན་ཉིད་བྱེད། །རྒན་ཞུགས་ཚིག་ཀྱལ་རབ་སྨྲས་པ། །དེར་ནི་མི་སྨྲར་མཐུར་བལྟས་འདུག །དེ་ཡི་རྫུ་འཕྲུལ་ལ་དད་ནས། །དེ་ཡི་མོད་ལ་རྣམ་པར་བཏུལ། །དེ་ཚེ་ཉན་ཐོས་མཆོག་གི་ནི། །གདུང་སྦྱོང་ཤིང་གི་དྲུང་དུ་ཁྱེར། །རྫུ་འཕྲུལ་ཆེན་པོ་འདོད་ཆགས་བྲལ། །དགེ་སློང་དེ་ནི་རྐང་གིས་སོང་། །དེར་སོང་དེས་ནི་ཐུབ་པའི་སྐུ། །ཤིང་ལ་ཡོད་པར་རབ་ཏུ་མཐོང་། །ལྷ་ཡི་ཚོགས་ནི་དུ་མས་ཀྱང་། །མཆོད་པ་ཆེན་པོ་བྱེད་པ་དང་། །གཽ་ཏ་མ་ནི་ཐུབ་པ་ཡི། །སྐུ་ནི་ཤིང་གི་སྟེང་བཞག་མཐོང་། །འོད་སྲུང་ཆེན་པོ་རྨད་བྱུང་བ། །སྐལ་བ་ཆེན་པོ་དེ་མཐོང་ནས། །རྫུ་འཕྲུལ་ཆེན་པོས་དགེ་སློང་རྣམས། །ཐམས་ཅད་སྨྲེ་སྔགས་འདོན་པར་བྱེད། །ལྷ་དང་འབྱུང་པོའི་ཚོགས་ཀུན་ནི། །ཧ་ཧའི་རྣམ་པ་རབ་འདོན་ཅིང་། །དེ་ལྟར་མྱ་ངན་སྐྱེས་པ་ཡི། །ཉམ་ཐག་སྒྲ་ནི་ཤིན་ཏུ་ཆེ། །རྫུ་འཕྲུལ་ཆེན་པོ་ལྷ་དང་ཀླུ། །དེ་ནས་ཀུན་གྱིས་རབ་བསུ་ནས། །རྐང་གཉིས་མཆོག་ལ་ཕྱག་བྱོས་ཞེས། །སྐལ་བ་ཆེ་ལའང་རབ་ཏུ་སྨྲས། །ལྷ་ཚོགས་མི་དང་བཅས་པ་དང་། །འབྱུང་པོ་ཀུན་གྱི་ཚོགས་དག་དང་། །མི་བདག་དྲང་སྲོང་གནོད་སྦྱིན་དག །ཁྱོད་ལ་སྡོད་ཅིང་གཞོལ་བ་ཡིན། །ཤིང་ལ་མེ་གཏོང་འབད་གྱུར་ཀྱང་། །སྐུ་སྦྱོང་ཤིང་ནི་སྦར་མི་ནུས། །དེ་ནས་དེ་ནི་སྐྱོན་བྲལ་བ། །རྫུ་འཕྲུལ་ཆེན་པོ་སྐལ་བ་ཆེས། །གདུང་སྦྱོང་ཤིང་གི་སྨད་ཆ་ལ། །རྫུ་འཕྲུལ་ཆེན་པོ་དེས་ཕྱག་བྱས། །དེ་བཞིན་གཤེགས་པ་རྗེས་དྲན་ནས། །བསྐོར་བ་དག་ཀྱང་མང་དུ་བྱས། །དེ་ཚེ་ལྕགས་ཀྱི་སྒྲོམ་དྲལ་ནས། །ཞབས་གཉིས་དག་ཀྱང་རྣམ་བརྐྱང་ལ། །ཡང་དང་ཡང་དུ་ཞབས་བྱུགས་ནས། །ཞབས་གཉིས་སྤྱི་བོས་ཕྱག་བྱས་ནས། །ཐུབ་མཆོག་མཆོག་གི་ཞབས་གཉིས་ལ། །ལན་མང་དག་ཏུ་རྣམ་པར་བལྟས། །དེས་ནི་ཞབས་གཉིས་ཡང་ཞུགས་ཏེ། །ལྕགས་ཀྱི་སྒྲོམ་ལ་ཡང་དག་གནས། །རྫུ་འཕྲུལ་ཆེན་པོ་འདོད་ཆགས་བྲལ། །དེ་ནི་དེ་ནས་ལངས་འདུག་པ། །རྫུ་འཕྲུལ་ཆེན་པོ་འདོད་ཆགས་བྲལ། །དགྲ་བཅོམ་རྣམས་ཀྱིས་ཡོངས་སུ་བསྐོར།