།ཞི་བའི་འཁོར་ལོ་ཡང་དག་ལྡན། །ཉམས་དགའ་ཀ་ཤིའི་གྲོང་སྤངས་ནས། །དེ་ཚེ་བདག་ནི་མཉན་ཡོད་སོང་། །དེ་ཚེ་མུ་སྟེགས་གདུལ་བྱའི་ཕྱིར། །ཆོ་འཕྲུལ་ཆེན་པོའང་བྱས་པ་ཡིན། །མི་ཡུལ་དག་ཏུ་རྫུ་འཕྲུལ་ནི། །དེ་ཚེ་ཡང་དག་བསྟན་པར་བྱས། །མུ་སྟེགས་མང་པོའི་གནས་དག་ཏུའང་། །དེ་ཚེའང་རབ་ཏུ་དགའ་བར་བྱས། །ཡུལ་མིང་མེ་ཐབ་ཅེས་བྱ་བར། །ལྷ་ལས་བབས་པ་བཟང་པོ་བྱས། །སུམ་ཅུ་རྩ་གསུམ་དག་ཏུ་ཡང་། །ཆོས་ཉིད་ལ་ནི་བརྒྱ་བྱིན་སྦྱར། །དེ་ནས་འོག་མིན་ལྷ་སོགས་དང་། །ཚངས་སོགས་བརྒྱ་བྱིན་བཅས་པ་དང་། །རྣམ་ཐོས་གནོད་སྦྱིན་དབང་དང་བཅས། །རྒྱལ་ཆེན་བཞི་ཡི་རིས་དག་དང་། །རྟག་ཏུ་མྱོས་དང་གཞོང་ཐོགས་དང་། །པི་ཝང་གསུམ་པ་ཕྲེང་ཐོགས་དང་། །ལྷ་དང་གནོད་སྦྱིན་ཚོགས་རྣམས་ཀུན། །ས་བླ་ལྷ་དང་བར་སྣང་གནས། །འཕགས་པ་གནོད་སྦྱིན་ཚོགས་བདག་དང་། །ལྷ་དང་ལྷ་མིན་ཐམས་ཅད་ཀྱང་། །ཆོས་ཀྱི་འབྲས་བུ་ལྡན་པར་བྱས། །མྱ་ངན་འདས་གསུམ་རྗེས་འགྲོ་བྱས། །སེམས་ཅན་བསམ་གྱིས་མི་ཁྱབ་པའང་། །དེ་ཚེ་ལེགས་པ་ཉིད་ལ་བཙུད། །དེ་དག་རྩིས་ཀྱི་གྲངས་མེད་པ། །འཁོར་བའི་མཐའ་བཞིན་དེ་མཐའ་མེད། །སྟོང་ཆེན་པོ་ཡི་འཇིག་རྟེན་གྱི། །ཁམས་དང་འདྲ་བར་བསམ་མི་ཁྱབ། །རྟག་ཏུ་སེམས་ཅན་མང་པོ་ནི། །བདེན་པའི་དོན་ལ་ཡང་དག་སྦྱར། །དེ་ཚེ་དེར་ནི་ང་འོངས་ནས། །གནས་གཙང་སྟེང་དུ་གནས་ནས་ཀྱང་། །ཐེག་པ་གསུམ་ལ་རྗེས་འཇུག་པའི། །དམ་ཆོས་སྔགས་ནི་རབ་ཏུ་བསྐོར། །སེམས་ཅན་གདུལ་བྱ་ལ་བརྟེན་ནས། །ང་ཡིས་ཆོ་གའི་རྒྱལ་པོ་འདི། །འཇིག་རྟེན་མང་ལ་རབ་བསྟན་ནས། །འཇམ་པའི་དབྱངས་ལའང་གཏད་པ་ཡིན། །ང་ནི་འཇིག་རྟེན་མྱ་ངན་འདས། །ས་སྟེང་སྟོངས་པར་གྱུར་པ་ན། །དེ་ནས་འཇམ་དཔལ་སེམས་ཅན་ལ། །སངས་རྒྱས་མཛད་པ་བྱེད་པར་འགྱུར། །ཐུབ་དབང་ཡོངས་སུ་མྱ་ངན་འདས། །དམ་པའི་ཆོས་ནི་བསྲུང་བའི་ཕྱིར། །དེ་ཚེ་རྟག་ཏུ་སྲུང་བར་ནི། །འཇམ་པའི་དབྱངས་ནི་འགྱུར་བ་ཡིན། །སྔགས་ནི་རབ་ཏུ་དབྱེ་དོན་དུ། །ཆོ་ག་རྒྱ་ཆེན་བསྟན་པ་ཡིན། །