།ཐམས་ཅད་ཀྱི་ཡང་མདོར་བསྡུ་ན་འཁྲུལ་འཁོར་གྱི་གཟུགས་སམ་དེ་ཉིད་ཀྱི་གཟུགས་བརྙན་བྱས་ནས་ཁྲོ་བོའི་རྒྱལ་པོ་གཤིན་རྗེ་གཤེད་ཀྱི་རིག་པ་ཅི་སྲིད་གཟུགས་བརྙན་རབ་ཏུ་འགུལ་བའམ་རབ་ཏུ་གཡོ་བའམ་རྡུལ་འབྱུང་བའི་བར་དུ་བཟླས་པ་བྱས་ན་རང་ཉིད་ཀྱི་གཟུགས་ཀྱིས་འོང་བར་འགྱུར་ཏེ། གང་སྨྲས་པ་དེ་ཐམས་ཅད་ཡང་དག་པར་སྒྲུབ་པར་བྱེད་དོ། །དེ་བཞིན་དུ་གང་གཞན་ཡང་གཞོན་ནུ་མ་བཞི་གནོད་སྦྱིན་མ་ཆེན་པོའི་མིང་པོ་ཏུམ་བུ་རུ་ཞེས་བྱ་བ་ཡང་དག་པར་རྟེན་པ། གྲུའི་ཐེག་པ་ལ་ཡང་དག་པར་ཞོན་པ། འཇིག་རྟེན་ཐམས་ཅད་ཀྱིས་རབ་ཏུ་མཆོད་པ། སེམས་ཅན་རྣམས་རྗེས་སུ་འཛིན་པར་བྱེད་པ་དེ་དག་ཀྱང་ཆོ་ག་འདི་བཞིན་དུ་བྱའོ། །དཔེར་ན་རས་སམ་རྩིག་པའམ་སྤང་ལེབ་ལ་མཚོའི་དཀྱིལ་དུ་བྲི་བར་བྱ་སྟེ། གྲུའི་ཐེག་པ་ལ་ཞོན་པ་ཕུ་བོ་མིང་པོའི་རྗེས་སུ་འགྲོ་བ་བུ་མོ་བཞི་པོ་ཉིད་ཀྱང་རྒྱ་མཚོའི་ནང་དུ་ཞུགས་ཤིང་མཉམ་པར་འདུག་པའོ། །དེ་དག་མི་སྣང་གནས་བཞག་ནས། །ཁྲོ་བོའི་བཟླས་པ་ཡང་དག་བརྩམ། །དེ་ཚེ་གཡོ་འགུལ་རྡུལ་འབྱུང་བར། །དེ་དག་ཀུན་ནི་སྐྱེ་འགྱུར་བར། །དེ་ཚེ་གྲུབ་པ་ཡིན་ཤེས་ནས། །སྔགས་ཀྱི་བཟླས་པ་ཡོངས་སུ་བཏང་། །མཚན་མོའི་ཐ་མར་རང་ཚུལ་ཉིད། །དགེ་དང་མི་དགེ་སྟོན་པར་འགྱུར། །སྐད་ཅིག་གིས་ནི་ཟློས་པ་ཡིས། །དོན་རྣམས་ཐམས་ཅད་སྒྲུབ་པར་འགྱུར། །ཁྲོ་བོས་བཀུག་ཅིང་རྒྱས་བྱས་ནས། །སྨྲས་པ་ཐམས་ཅད་བྱེད་པར་འགྱུར། །རྟག་ཏུ་ཉི་མ་སོགས་ཀྱི་གཟའ། །དེ་བཞིན་དྲང་སྲོང་སྲིན་པོ་དང་། །ནམ་མཁའ་ལྡིང་དང་ཤ་ཟས་ཀྱང་། །རྫུ་འཕྲུལ་ཆེན་པོ་དེ་དག་མཆོད། །དབང་ཕྱུག་ཆེ་སོགས་འབྱུང་པོས་ཀྱང་། །རྫུ་འཕྲུལ་ཆེན་པོ་དེ་དག་མཆོད། །དེ་དག་གིས་བཤད་ཆོ་ག་དང་། །སྔགས་རྒྱུད་རྒྱ་ཆེ་བཅས་པ་ཡི། །ཐམས་ཅད་དེ་དག་ཁྲོ་རྒྱལ་གྱི། །འབད་པ་མེད་པར་དབང་དུ་འགྱུར། །གང་དག་སྔགས་ནི་ཅི་ཡོད་པ། །ཁྲོ་བོ་འཆོལ་བ་རྙོག་འབྱུང་བ། །དེ་ཀུན་ཁྲོ་བོའི་རྒྱལ་པོ་ཡི། །དེ་དག་བསྒོ་བ་མཉན་པར་བསྟན། །གང་ཡང་འཕགས་པའི་སྔགས་དག་ནི། །ཐམས་ཅད་ཀུན་འགྲོའི་ཁྱད་པར་ཅན།