གང་དམ་ཚིག་འདི་ལས་འདའ་བར་བྱེད་པ་དེ་དག་ནི་ཨ་རྫ་ཀའི་དོག་པ་བཞིན་དུ་མགོ་ཚལ་པ་བརྒྱར་འགས་པར་འགྱུར་ཏེ། དེ་ནི་བྱང་ཆུབ་སེམས་དཔའི་བྱིན་གྱི་རླབས་ཀྱང་དེ་ཡིན་ནོ། །དེ་ནས་འཇམ་དཔལ་གཞོན་ནུར་གྱུར་པས་རང་གི་སྔགས་ཀྱི་སྤྱོད་པའི་དོན་དུ་ཆོས་ཀྱི་ཚིག་སྨྲས་པ། ཆོས་གཅིག་ལ་ཡང་དག་པར་བསམས་ན་བྱང་ཆུབ་སེམས་དཔའ་སེམས་དཔའ་ཆེན་པོའི་སྔགས་འགྲུབ་པར་འགྱུར་ཏེ། གཅིག་པོ་གང་ཞེ་ན་འདི་ལྟ་སྟེ། ཆོས་ཐམས་ཅད་སྤྲོས་པ་མེད་པའི་རྣམ་པར་རྗེས་སུ་མཐོང་བའོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་གཉིས་ལ་རབ་ཏུ་གནས་ན་སྔགས་འགྲུབ་པར་འགྱུར་ཏེ། གཉིས་པོ་གང་ཞེ་ན་བྱང་ཆུབ་ཀྱི་སེམས་མི་གཏོང་བ་ཉིད་དང་། སེམས་ཅན་ཐམས་ཅད་ལ་སེམས་མཉམ་པའོ། །ཆོས་གསུམ་དང་ལྡན་ན་སྔགས་ཀྱི་སྤྱོད་པ་ཡོངས་སུ་རྫོགས་པར་འགྱུར་ཏེ། གསུམ་པོ་གང་ཞེ་ན། སེམས་ཅན་ཐམས་ཅད་ཡོངས་སུ་མི་གཏོང་བ་ཉིད་དང་། བྱང་ཆུབ་སེམས་དཔའི་ཚུལ་ཁྲིམས་ཀྱི་སྡོམ་པ་སྲུང་བ་དང་། རང་གི་སྔགས་ཡོངས་སུ་མི་གཏོང་བ་ཉིད་དོ། །ཆོས་བཞི་དང་ཡང་དག་པར་ལྡན་ན་དང་པོ་སེམས་བསྐྱེད་པའི་བྱང་ཆུབ་སེམས་དཔའི་སྔགས་འགྲུབ་པར་འགྱུར་ཏེ། བཞི་པོ་གང་ཞེ་ན། རང་གི་སྔགས་ཡོངས་སུ་མི་གཏོང་བ་ཉིད་དང་། གཞན་གྱི་སྔགས་རྗེས་སུ་སྤྱོད་པ་མེད་པ་ཉིད་དང་། སེམས་ཅན་ཐམས་ཅད་ལ་བྱམས་པས་གནས་པ་ཉིད་དང་། སྙིང་རྗེ་ཆེན་པོས་ཡོངས་སུ་བསྒོས་པའི་སེམས་པ་ཉིད་དོ། །ཆོས་བཞི་པོ་འདི་དག་དང་ལྡན་ན་དང་པོ་སེམས་བསྐྱེད་པའི་བྱང་ཆུབ་སེམས་དཔའི་སྔགས་འགྲུབ་པར་འགྱུར་རོ། །ཆོས་ལྔ་དང་ལྡན་ན་བྱང་ཆུབ་སེམས་དཔའི་སྡེ་སྣོད་ལ་འཇུག་ཅིང་སྔགས་ཀྱི་སྤྱོད་པ་སྒྲུབ་པ་ཡོངས་སུ་རྫོགས་པར་འགྱུར་ཏེ། ལྔ་པོ་གང་ཞེ་ན། རྣམ་པར་དབེན་པའི་ཕྱོགས་ཡང་དག་པར་བསྟེན་པ་ཉིད་དང་། །བས་མཐའ་དགོན་པ་སྟེན་པར་བྱེད་པ་ཉིད་དང་། སེམས་ཅན་གཞན་ལ་ཞེ་སྡང་མེད་པ་ཉིད་དང་། འཇིག་རྟེན་པའི་སྔགས་ལ་མི་ལྟ་བ་ཉིད་དང་། ཚུལ་ཁྲིམས་དང་ཐོས་པ་དང་སྤྱོད་པ་ལ་གནས་པར་བྱེད་པ་ཉིད་དེ་ཆོས་ལྔ་པོ་འདི་དག་དང་ལྡན་ན་སྔགས་སྤྱོད་པའི་དོན་འགྲུབ་ཅིང་ཡོངས་སུ་རྫོགས་པར་འགྱུར་རོ།