།ཇི་སྟེ་གནས་མལ་ལ་སོགས་པ་དང་སྟན་དང་གོས་ལ་སོགས་པ་རྣམ་པ་སྣ་ཚོགས་སམ་བཞོན་པ་དང་ཐེག་པ་དང་ལྷམ་དང་གདུགས་ལ་སོགས་པ་ཡོ་བྱད་ཐམས་ཅད་དང་ལྷག་མ་ནི་བཟའ་བ་དང་། བཏུང་བ་དང་། བཅའ་བ་ལ་སོགས་པ་དང་ལུས་ཐམས་ཅད་ལ་དགོས་པའི་ཆ་བྱད་ཐམས་ཅད་དང་། མེ་ཏོག་དང་སོ་རྩི་དང་འབྲས་བུ་དང་སྤོས་ལ་སོགས་པ་འདི་དག་ཐམས་ཅད་ལ་ཐལ་བའི་ཕྱེ་མས་གཏོར་ན་དགྲ་དེ་དག་གི་ལུས་ལ་ཤིག་དང་མ་ཀུ་ཏའི་སྲིན་བུ་རྣམས་ཀྱིས་ཀུན་ནས་ཁྱབ་པར་འགྱུར་ཏེ། ཤིང་ཇི་ལྟ་བ་བཞིན་དུ་ཟ་བར་འགྱུར་རོ། །རྨི་ལམ་ངན་པ་ཡང་མཐོང་བར་འགྱུར་རོ། །ཞག་བདུན་གྱིས་ཀྱང་འཆི་བར་འགྱུར་ཏེ། སྨན་པ་ཐམས་ཅད་དང་ལྷ་ཐམས་ཅད་ཀྱིས་ཀྱང་བཟློག་པར་མི་ནུས་སོ། །སྔགས་ཐམས་ཅད་ཀྱིས་ཀྱང་བསྲུང་བར་མི་ནུས་ཏེ། གང་གིས་ཐལ་བ་གཏོར་བར་བྱེད་པ་ནི་མ་གཏོགས་སོ། །ཇི་སྟེ་སླར་གསོ་བ་བྱེད་ན་ནི་ཤིང་མངར་དང་ཨུཏྤ་ལ་སྔོན་པོ་དང་ཙནྡན་དཀར་པོ་གཅིག་ཏུ་བྱས་ལ་ཆུ་གྲང་མོ་ལ་བཏགས་ཏེ། དེ་ནས་སྤྱི་བོ་ནས་བཟུང་སྟེ་རྐང་པའི་མཐིལ་གྱི་བར་དུ་དེའི་ལུས་ལ་བྱུགས་ཤིང་འཕགས་པ་འཇམ་དཔལ་གྱི་རྩ་བའི་སྔགས་བཟླས་ན་སོས་པར་འགྱུར་རོ། །གཞན་ཡང་བུད་མེད་རྣམས་ལ་ལས་སུ་བྱ་བ་ནི། མཐུན་པའི་རླུང་གི་ཕྱོགས་གང་དུ་འདོད་པ་དེར་སོང་ནས་བུད་མེད་མཁའ་འགྲོ་མ་མ་རུངས་པ་ང་རྒྱལ་ཅན་ཐམས་ཅད་ལ་ཡང་སྦྱོར་བ་བྱ་སྟེ་གཞན་ལ་ནི་མ་ཡིན་ནོ། །མཐུན་པའི་རླུང་ཡོད་པ་དེ་ཉིད་ལ་གནས་ནས། བཅོམ་ལྡན་འདས་ཡིད་ལ་བསམས་ཏེ་ཐལ་བ་གཏོར་ན་མོ་མཚན་དང་ནུ་མ་ཐམས་ཅད་མི་སྣང་བར་འགྱུར་རོ། །སྐྱེས་པ་ལའང་ཁ་སྤུ་དང་བ་སྤུ་མེད་པ་དང་མོ་མཚན་དང་ནུ་མ་ཡང་རབ་ཏུ་འབྱུང་བར་འགྱུར་རོ། །དེ་ལྟ་བུར་རྣམ་པ་མང་པོ་དུ་མའི་ལས་ཀྱང་བྱེད་པའམ། གཞན་བྱེད་དུ་གཞུག་པར་འགྱུར་རོ། །ཡང་ན་གང་དགའ་བ་སྐྱེ་བ་དེ་བྱེད་དུ་གཞུག་པར་འགྱུར་རོ། །བུད་མེད་དམ་སྐྱེས་པ་གང་ལ་སེམས་དགའ་བ་སྐྱེ་བ་དེ་ལ་ཐལ་བ་དེ་བྱིན་ན་ཇི་ལྟར་འདོད་པའི་ལས་བྱེད་དུ་གཞུག་པར་འགྱུར་རོ། །སྦྱོར་བའང་བསླབ་པར་བྱའོ། །དེ་ལྟར་ནད་ཆེན་པོ་དག་གིས་ཀྱང་འདེབས་སུ་གཞུག་པར་བྱའོ། །བཅོམ་ལྡན་འདས་ཡིད་ལ་བསམས་ནས། ཐལ་བའི་ལག་པས་སྤྱི་བོར་རེག་ན་ཀླད་པ་ཟུག་གཟེར་སྐྱེ་བར་འགྱུར་རོ། །