།གཞན་ཡང་ལས་སུ་འགྱུར་བ་ནི་དབེན་པའི་ཕྱོགས་གཙང་མར་གོས་གཙང་མ་བགོས་ཏེ། །ཁང་སྟོང་དུ་རབ་ཏུ་ཞུགས་ནས་མིའི་རུས་པའི་སྲེག་བླུགས་ཀྱིས་སྟོང་རྩ་བརྒྱད་སྦྱིན་སྲེག་བྱས་ཏེ། དེ་ནས་ཐལ་བ་དེ་ལག་པ་གཉི་གས་བླངས་ལ། གོས་གཙང་མའི་དུམ་བུ་ལ་སོ་སོར་བཅིངས་ཏེ་ཐུམ་པོ་གཉིས་སུ་བྱས་ལ། ཁམ་པོར་ཁ་སྦྱར་གཉིས་ཀྱི་ནང་དུ་སོ་སོར་བཞག་ལ། བདག་ཉིད་སྲུང་བ་ཆེན་པོ་བྱས་ནས་རྫས་དེ་བླངས་ལ། ཁྱིམ་དུ་སླར་ཞུགས་ནས་མཚན་མོ་དུར་ཁྲོད་ཆེན་པོར་སོང་ནས། མར་ངོའི་བཅུ་བཞིའམ་ཚེས་བརྒྱད་ལ་མི་སྲེག་པའི་སར་བཞག་ཅིང་ལྷོ་ཕྱོགས་སུ་བལྟས་ནས་ཁམ་པོར་ཁ་སྦྱར་གཉིས་བླངས་ལ་ལངས་ཤིང་གཅེར་བུར་བྱས་ཏེ་སྐྲ་བཤིག་པ་དང་ཁྲོ་བ་དང་བཅས་པས་འཇིགས་པ་མེད་པར་བྱ་སྟེ། རིག་པ་སྟོང་ཕྲག་བཅུ་བཟླས་པ་བྱས་ན་ཐལ་བ་དེ་གྲུབ་པར་འགྱུར་རོ། །མི་གང་སུ་དག་རྫས་དེ་སློང་བར་གྱུར་ན་སྦྱིན་པར་མི་བྱའོ། །གལ་ཏེ་ཚན་ཁར་སློང་བར་བྱེད་ན་ནི་ཁྲོ་བོའི་རྒྱལ་པོ་དྲན་ནས་ཡི་གེ་ཧཱུྃ་རབ་ཏུ་སྦྱར་བ་བྱས་ན་དེའི་མོད་ལ་འབྱེར་བར་འགྱུར་རོ། །བགེགས་ཐམས་ཅད་རྣམ་པར་འཇོམས་པ་ཡང་ཆོ་ག་འདི་ཉིད་དོ། །ལག་པ་གཡོན་པ་དང་གཡས་པས་བླངས་པའི་ཐལ་བས་ནི་རྟགས་མཚན་བྱ་ཞིང་བག་ཡོད་པས་བསྲུང་བ་ཡང་བྱ་ལ། ཐོ་རངས་ཉི་མ་འཆར་བའི་དུས་སུ་སླར་འོང་བར་བྱ་བ་ན་ཁྲུས་བྱས་ཤིང་གཙང་ཞིང་གཙང་བའི་གོས་བགོས་ཏེ་རང་གི་ཁྱིམ་དུ་འཇུག་པར་བྱ་སྟེ། རང་གི་གནས་སམ་ཇི་ལྟར་འདོད་པར་འགྲོ་བར་བྱའོ། །དེ་ནས་ལག་པ་གཡས་པ་གང་གིས་བླངས་པའི་ཐལ་བ་དེས་མི་དང་རྐང་གཉིས་དང་རྐང་བཞི་དང་སྲོག་ཆགས་འབྱུང་པོ་ཐམས་ཅད་དང་། ལྷ་དང་བཅས་པའི་ཀླུ་དང་གནོད་སྦྱིན་རྣམས་ཀྱི་སྤྱི་བོར་གཏོར་ན་དབང་དུ་འགྱུར་རོ། །གང་ལག་པ་གཡོན་པས་བླངས་པའི་ཐལ་བ་དེས་ནི་མིའི་བུད་མེད་ཐམས་ཅད་ཀྱི་སྤྱི་བོར་གཏོར་ན་དབང་དུ་འགྱུར་རོ། །ལག་པ་གཡས་པས་བླངས་པའི་ཐལ་བ་གང་ཡིན་པ་དེས་མི་རྣམས་ཀྱི་ལྟེ་བའི་ཕྱོགས་སམ། ཕོ་མཚན་གྱི་ཕྱོགས་སུ་གཏོར་ན་གྲོང་པའི་ཆོས་བསྟེན་པ་ལ་ནུས་པ་མེད་པར་འགྱུར་རོ། །གང་ཞིག་བུད་མེད་ལ་མངོན་པར་ཆགས་པ་དེའི་གསང་བའི་གནས་སུ་ཐལ་བའི་ཕྱེ་མས་གཏོར་ན་སྐྱེས་བུ་གཞན་བརྟེན་པ་ལ་ནུས་པ་མེད་པར་འགྱུར་རོ།