།འཕགས་པ་འཇམ་དཔལ་གྱི་རྩ་བའི་ཆོ་ག་བྱང་ཆུབ་སེམས་དཔའི་སྡེ་སྣོད་ཕལ་པོ་ཆེ་ཐེག་པ་ཆེན་པོ་ཤིན་ཏུ་རྒྱས་པའི་མདོ་ལས། ཁྲོ་བོའི་རྒྱལ་པོ་གཤིན་རྗེ་གཤེད་ཀྱི་མངོན་སྤྱོད་དང་ལེགས་པར་སྡོམ་པའི་ལེའུ་རབ་འབྱམ་ལས་སུམ་ཅུ་རྩ་བཞི་པ་རྫོགས་སོ།། །།དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཞི་བའི་བློ་གྲོས་ཞེས་བྱ་བ་འཁོར་དེ་ཉིད་དུ་འདུས་ཤིང་འདུག་པར་གྱུར་པ་དེ་སྟན་ལས་ལངས་ཏེ། སངས་རྒྱས་ཐམས་ཅད་ལ་ཕྱག་འཚལ་ནས། འཁོར་གྱི་དཀྱིལ་འཁོར་གྱི་དབུས་སུ་འདུག་སྟེ། བཅོམ་ལྡན་འདས་ཤཱཀྱ་ཐུབ་པ་ལ་ལ་ལན་གསུམ་བསྐོར་བ་བྱས་ནས་ཞབས་གཉིས་ལ་བཏུད་དེ། གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་དེ་ལ་བལྟས་ནས་ཚིག་འདི་སྨྲས་སོ། །ཕྱག་ན་རྡོ་རྗེ་གང་ཁྱོད་སེམས་ཅན་ཐམས་ཅད་ལ་གནོད་པར་བྱེད་པ་དང་། འདོད་པ་དང་ལྡན་པའི་སྔགས་དང་རྒྱུད་བཤད་ན། ཀྱེ་རྒྱལ་བའི་སྲས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ངེས་པར་ཆོས་འདི་ནི་མ་ཡིན་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་ནི་གང་གི་ཕྱིར་སྙིང་རྗེ་ཆེན་པོས་རབ་ཏུ་ཕྱེ་ཞིང་། བྱང་ཆུབ་སེམས་དཔའི་སྤྱད་པ་སྤྱོད་ཅིང་སེམས་ཅན་ཐམས་ཅད་ཀྱི་དོན་གྱི་ཕྱིར། ཕན་པའི་ལྷག་པའི་བསམ་པ་ལ་རབ་ཏུ་ཞུགས་ན་འཁོར་བའི་འཆིང་བ་ལས་གྲོལ་བར་འགྱུར་རོ། །ཀྱེ་རྒྱལ་བའི་སྲས་གཞན་ཡང་སེམས་ཅན་ལ་གནོད་པར་བྱེད་པའི་ཆོས་སྟོན་པ་ནི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་ནི་སེམས་ཅན་ཐམས་ཅད་ཀྱི་ཆེད་དུ་གསུངས་པ་མ་ཡིན་ཏེ། སྙིང་རྗེ་ཆེན་པོ་དང་ལྡན་པའི་ཕྱིར་སེམས་ཅན་ཐམས་ཅད་ལ་ཕན་པའི་ལྷག་པའི་བསམ་པ་ལ་རབ་ཏུ་ཞུགས་པ་ཡིན་ནོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེས་བྱང་ཆུབ་སེམས་དཔའ་ཞི་བའི་བློ་གྲོས་ལ་སྨྲས་པ། ཇི་ལྟར་ཁྱོད་སྨྲས་པ་དང་ཇི་ལྟར་ཁྱོད་རབ་ཏུ་སྟོན་པ་དེ་བཞིན་དུ་ཞི་བའི་བློ་གྲོས་བྱང་ཆུབ་སེམས་དཔས་བསླབ་པར་བྱ། དེ་བཞིན་དུ་བསྒྲུབ་པར་བྱ། ཇི་ལྟར་སངས་རྒྱས་དང་བྱང་ཆུབ་སེམས་དཔའ་རྫུ་འཕྲུལ་ཆེན་པོ་དང་ལྡན་པ་དེ་བཞིན་དུ་བདག་གིས་ཀྱང་བསྟན་པར་བགྱིའོ། །དོན་དམ་པར་ནི་ཡང་དག་པའི་མཐའ་ལ་ཡང་དག་པར་བརྟེན་ནས་ཆོས་ཀྱི་མཐའ་ལས་གྲོལ་བ་ཐོབ་པར་འགྱུར་རོ།