།ཅང་མི་སྨྲ་བར་གྱུར་ནས་གནས། །དེ་ནས་དཔལ་ལྡན་རྡོ་རྗེ་འཆང་། །ཕྱིར་ཡང་རྡོ་རྗེ་རབ་ཏུ་བླངས། །དེ་ཚེ་རྡོ་རྗེ་བླངས་ནས་ཀྱང་། །ཁྲོ་རྒྱལ་མཐུ་ནི་ཤེས་ནས་དགའ། །འཕགས་པ་འཇམ་དཔལ་གྱི་རྩ་བའི་ཆོ་ག་བྱང་ཆུབ་སེམས་དཔའི་སྡེ་སྣོད་ཕལ་པོ་ཆེ་ཐེག་པ་ཆེན་པོ་ཤིན་ཏུ་རྒྱས་པའི་མདོ་ལས། གཤིན་རྗེ་གཤེད་ཀྱི་ཡོངས་སུ་བསྔགས་པ་དང་སྔགས་ཀྱི་བདག་ཉིད་ཆེན་པོའི་ངེས་པར་སྡོམ་པའི་ལེའུ་རབ་འབྱམ་ལས་སུམ་ཅུ་རྩ་གསུམ་པ་རྫོགས་སོ།། །།དེ་ནས་གསང་བའི་བདག་པོ་ལག་ན་རྡོ་རྗེས་ཐམས་ཅད་དང་ལྡན་པའི་འཁོར་གྱི་དཀྱིལ་འཁོར་ཆེན་པོ་ལ་བལྟས་ཏེ། གནས་གཙང་མའི་སྟེང་ན་འདུག་པར་གྱུར་པའི་ཚོགས་དེ་དག་ལ་སྨྲས་པ། དང་པོ་རེ་ཞིག་གྲོགས་པོ་ཁྱེད་ཅག་ཁྲོ་བོའི་རྒྱལ་པོ་གཤིན་རྗེ་གཤེད་ཀྱི་སྟོབས་དང་ཕ་རོལ་གནོན་པ་དཔག་ཏུ་མེད་པ། གདུལ་དཀའ་འདུལ་བར་བྱེད་པ། གཤིན་རྗེའི་འཚོ་བ་མཐར་བྱེད་པ། སེམས་ཅན་མ་རུངས་པ་ཚར་གཅོད་པ་དེ་གཙོར་བྱེད་པ་བྱང་ཆུབ་སེམས་དཔའ་འཇམ་དཔལ་གྱིས་སྨྲས་པ། དེའི་རས་རིས་ཀྱི་ཆོ་ག་ཡོད་དེ་དེ་ཉོན་ཅིག །ཚེས་གྲངས་དང་ནི་རྒྱུ་སྐར་དང་། །སྨྱུང་བ་དག་ཀྱང་མི་བྱ་སྟེ། །དགྲ་ཡི་འཇིགས་པ་བྱུང་བ་ན། །རས་རིས་འདི་ནི་བྲི་བར་བྱ། །མར་ངོའི་ཟླ་ཕྱེད་དག་གནས་ཏེ། །ཚེས་གྲངས་བཅུ་བཞིའམ་བརྒྱད་དག་ལ། །བྲམ་ཟེ་དམ་པ་མཆོག་དག་གི། །དུར་ཁྲོད་ཤི་བའི་རོ་རྙེད་ན། །དེ་ནི་མཚན་མོ་མུན་པར་བླངས། །དེ་ཡི་ཁྲག་གིས་ཚོན་རྩི་བྱ། །རས་ནི་ཆུ་ཡིས་ལན་གསུམ་བཀྲུ། །དེ་ནས་དེ་ནི་བསྐམ་པར་བྱ། །འདྲི་བྱེད་གདུག་སེམས་ཁྲོ་ལྡན་ཞིང་། །འཇིགས་པར་བྱེད་པས་བྲི་བར་བྱ། །མར་ངོའི་ཟླ་ཕྱེད་དུར་ཁྲོད་དུ། །ཞག་ནི་གསུམ་མམ་བདུན་དུ་བྲི། །ཚེས་བརྒྱད་བཅུ་བཞིའི་ནུབ་མོར་ནི། །ཞག་ཆེན་མར་མེ་སྦར་བ་ལ། །དེར་གནས་རི་མོ་བྱེད་པ་ནི། །རྟག་ཏུ་གཡས་ཀྱི་ཕྱོགས་སུ་བལྟ། །མི་ཡི་ཐོད་པས་གདན་བྱས་ཤིང་། །མཉམ་པར་བཞག་སྟེ་བསྲུང་བ་བྱ། །དགྲ་ཡི་སྡུག་བསྔལ་གྱིས་ཉེན་ན། །ཡང་ན་སྔགས་པ་རང་གིས་བྲི། །དང་པོའི་མཚན་མོར་རྩོམ་པ་ན། །དགྲ་རྣམས་ལུས་ལ་ཚ་བ་འབྱུང་། །གཉིས་པར་ཚ་བ་ཆེན་པོ་ཡིས། །དགྲ་རྣམས་བརྒྱལ་བས་གནོད་པར་འགྱུར།