།སྔོན་གྱི་དེ་བཞིན་གཤེགས་པས་གསུངས། །སེམས་ཅན་རྣམས་ལ་ཕན་འདོད་ནས། །འཇམ་པའི་དབྱངས་ཀྱིས་སྦྱར་བ་ཡིན། །སེམས་ཅན་ཡིད་ལ་འདོད་པ་དག །ཡིད་ལ་རེ་བའི་ཕན་འདོད་གང་། །རྫུ་འཕྲུལ་ཆེན་པོ་སྔགས་ལྡན་པས། །མྱུར་དུ་དེ་དག་སྒྲུབ་པར་བྱེད། །ཕྱག་རྒྱ་འདི་ནི་རབ་མཆོག་སྟེ། །ཡིད་ལ་རེ་བ་རྫོགས་ཞེས་བརྗོད། །འདི་ནི་ཕྱག་རྒྱ་རབ་མཆོག་སྟེ། །ལས་ཀུན་རབ་ཏུ་སྒྲུབ་བྱེད་པའོ། །མྱུར་དུ་སྔགས་རྣམས་སྒྲུབ་བྱེད་ཅིང་། །རྒྱ་ཆེ་ཉིད་ཀྱི་རྫས་དང་བཅས། །ཐུབ་པའི་ཟླ་བ་དེ་ཡིས་ནི། །ཟླ་བའི་འོད་ལ་རབ་ཏུ་བསྟན། །ཟླ་བས་པདྨའི་རིགས་དག་ལ། །དེས་ནི་ཕྱག་རྒྱ་འདི་ལ་སྦྱར། །སྔགས་མཁན་ཇི་ལྟར་འདོད་པ་བཞིན། །རྣམ་པ་སྣ་ཚོགས་ལས་རྣམས་བྱེད། །ལག་གཉིས་དེ་བཞིན་བསྡུ་བྱས་ནས། །མཛུབ་མོ་གཉིས་ནི་བསྒྲེང་བར་བྱ། །གུང་མོའི་སོར་མོའི་རྩེ་མོ་གཉིས། །ཅུང་ཟད་སྨད་པ་རྟ་བབས་ཡིན། །དེ་ཉིད་ཡང་དག་བསྒྲེང་བྱས་ན། །རྟ་བབས་བཟང་པོར་གསུངས་པ་ཡིན། །དེ་ཉིད་ཕན་ཚུན་སྦྱར་བྱས་པ། །སངས་རྒྱས་རུ་དུང་སྒྲ་རུ་བསྟན། །མཐེ་བོའི་གཙོ་བོ་བསྒྲེང་བྱས་པ། །མཁས་པས་རྒྱལ་བའི་སྒྲ་རུ་ཤེས། །ལག་གཉིས་དེ་བཞིན་ཡང་དག་སྦྱར། །མཛུབ་མོའི་རྩེ་མོ་ཡང་དག་དགུག །སོར་མོ་ཐམས་ཅད་སྦྱར་བྱས་ལ། །ཅུང་ཟད་ཡངས་པར་འབྱུང་བ་ནི། །དེ་ནི་སངས་རྒྱས་རྔ་ཆེན་མཁྱེན། །ཆོས་ཀྱི་རྔ་ནི་བསྒྲེང་བྱས་པའོ། །དེ་ནས་ལག་གཅིག་ཐལ་མོ་ནི། །གཡས་པ་གཡོན་པའི་སྟེང་དུ་བསྒྲེང་། །འོག་ཏུ་རབ་ཏུ་སྦྱར་བ་ནི། །གླང་པོའི་རྣམ་པར་ཡང་དག་སྦྱར། །གཡས་པའི་གུང་མོའི་སོར་མོ་ནི། །གླང་པོའི་སྣ་འདྲར་རབ་ཏུ་བྱ། །འཁོར་བའི་ཕ་རོལ་ཕྱིན་པ་ཡིས། །ཕྱག་རྒྱ་དེ་ནི་གླང་པོར་བསྟན། །ཕྱག་རྒྱ་འདི་ནི་ཕྱག་རྒྱ་ཆེ། །རྫོགས་སངས་རྒྱས་ཀྱིས་རབ་ཏུ་བསྟན། །ལས་རྣམས་མཐའ་དག་བྱེད་པ་སྟེ། །འཇིག་རྟེན་ཀུན་གྱིས་མཆོད་པ་ཡིན། །ལག་གཡས་བརྐྱང་ཞིང་རབ་བསྒྲེང་བ། །དེ་ནི་མི་འཇིགས་སྦྱིན་པར་བརྟགས། །ལག་པ་གཡོན་པ་བརྐྱང་བྱས་པའི། །མཁྲིག་མའི་ཚིགས་ལ་རབ་བཞག་པའོ། །གུང་མོ་མཛུབ་མོ་སྦྱར་བྱས་ལ། །མཐེ་བོ་གཉིས་ནི་བར་དུ་གཞུག །