ནམ་ཞིག་ཅིག་ན་གྲུབ་པར་འདོད། །ཤིན་ཏུ་ཡུན་རིང་དུས་སོང་ནས། །སྔགས་རྣམས་གྲུབ་པར་སྣང་བའོ། །ཆོ་ག་ལྡན་པའི་སྔགས་ཀྱིས་ནི། །མྱུར་དུ་གྲུབ་པ་རབ་ཏུ་འཐོབ། །འབྲས་བུ་འགྲུབ་པར་མཐོང་བ་སྟེ། །འབྲས་མེད་སྔགས་ནི་གསུང་བ་མིན། །གསང་སྔགས་འབྲས་བུ་ལྡན་པ་ནི། །ཚེ་འདི་ཉིད་ལ་གྲུབ་པར་གསུངས། །གྲུབ་བྱེད་འབྲས་བུ་ལས་མ་ཡིན། །ལས་མེད་པར་ཡང་འབྲས་མི་འདོད། །འབྲས་བུ་ལས་དང་ཡང་དག་ལྡན། །འབྲས་བཅས་ལས་སུ་བསྟན་པ་ཡིན། །དེ་བས་སྐྱེ་དང་རྒ་སྤངས་པ། །དེ་ལྟར་ཡང་དག་བྱུང་གྱུར་པ། །འཇིག་རྟེན་ཞི་བར་གསུངས་པ་སྟེ། །ཞི་བ་སྲིད་ལས་རྣམ་གྲོལ་ཡིན། །བདག་ཉིད་ཆེན་པོ་དེར་འགྲོར་གཏོགས། །སངས་རྒྱས་ཆོས་ནི་རྗེས་སུ་བསྟན། །འཇིག་རྟེན་ཕྱིན་ཅི་ལོག་དུས་སུ། །དེ་ལ་གྲུབ་པ་རབ་ཏུ་སྣང་། །ཚེ་འདི་ཉིད་ལའང་གྲུབ་འགྱུར་ཏེ། །ཚེ་རབས་གཞན་དུའང་འབྱུང་བར་འགྱུར། །ཞི་བའི་ལམ་ནི་འདུས་མ་བྱས། །མཐར་ཐུག་ཞི་བའི་བར་དུ་འགྱུར། །གང་དུ་འཇིག་རྟེན་རྣམ་བསྟན་པ། །ཞི་བའི་གནས་ནི་དྲི་མེད་བཟང་། །སངས་རྒྱས་ཉིད་ནི་ལེགས་བསྟན་པ། །རྒྱལ་བས་ཀུན་ཏུ་བསྟན་པ་ཡིན། །དེ་ལ་མཐར་ནི་དེ་དག་ཕྱིན། །སྔགས་གྲུབ་པར་ནི་གསུངས་པ་ཡིན། །རང་རིག་སོ་སོའི་རྒྱལ་བ་ཡིས། །སྔགས་འདི་བསྟན་པ་མ་ཡིན་ཏེ། །ཐུབ་ཟླ་རྫུ་འཕྲུལ་ཆེན་པོ་ཡིས། །འཇིག་རྟེན་དག་ལ་སྔགས་བསྟན་ཏོ། །ཚེ་འདིར་ལུས་ཅན་རྣམས་ལ་ནི། །མངོན་སུམ་དུ་ནི་གྲུབ་པ་བསྟན། །དེ་ཉིད་སྟོང་པ་རིག་པ་ཡིས། །སྔགས་ནི་སངས་རྒྱས་ཉིད་དུ་སྟོན། །རྩོད་དུས་ཐ་མའི་དུས་དག་ཏུ། །ཞི་བའི་དེ་ཉིད་ཁྱད་པར་དུ། །སྔགས་འགྲུབ་པར་ནི་མི་འགྲོ་ཞིང་། །མྱུར་བའི་ལས་ལའང་འགྲུབ་པ་མེད། །དེ་ཡི་དུས་སུ་སྦྱོར་བ་ནི། །ཆོ་ག་མཐོང་བའི་ལས་དག་གིས། །སྔགས་རྒྱུད་ཤེས་པས་སྒྲུབ་བོ་ཞེས། །བསྟན་པ་འདི་ལ་ཐུབ་པས་གསུངས། །དེ་བཞིན་གཤེགས་པ་བཞུགས་པ་ན། །གྲུབ་མཆོག་མྱུར་དུ་གྲུབ་པར་འདོད། །དེ་བཞིན་བར་མའི་དུས་དག་ཏུ། །བར་མའི་གྲུབ་པ་ཉེ་བར་བསྟན། །ཐ་མའི་དུས་ལ་བརྟེན་ནས་ནི། །ཐ་མའི་གྲུབ་པར་གསུངས་པ་ཡིན།