།རྐང་གཉིས་དམ་པ་བཞུགས་པ་ན། །སྔགས་རྣམས་མ་ལུས་བཤད་པ་དག །དེ་ཡི་ཚེ་ན་འགྲུབ་པར་འགྱུར། །འཕགས་པ་འཇམ་དཔལ་གྱི་རྩ་བའི་ཆོ་ག་བྱང་ཆུབ་སེམས་དཔའི་སྡེ་སྣོད་ཕལ་པོ་ཆེ་ཐེག་པ་ཆེན་པོ་ཤིན་ཏུ་རྒྱས་པའི་མདོ་ལས། ཞིང་དང་དུས་ཀྱི་ཆོ་ག་ངེས་པའི་ལེའུ་རབ་འབྱམ་ལས། ཉི་ཤུ་རྩ་བཞི་པ་རྫོགས་སོ།། །།དེ་ནས་བཅོམ་ལྡན་འདས་ཤཱཀྱ་ཐུབ་པས་གཞན་ཡང་གནས་གཙང་མའི་གཞལ་མེད་ཁང་ལ་གཟིགས་ནས་འཇམ་དཔལ་གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ་གཞོན་ནུར་གྱུར་པ་རས་རིས་ནི་སྔར་བསྟན་ཏེ། སེམས་ཅན་ལ་ཡོད་པའི་སྤྱོད་པ་དགེ་བ་དང་མི་དགེ་བའི་མཚན་མ་རྣམས་ནི་བཤད་པར་བྱ་ཡི་ཉོན་ཅིག །དེ་ནས་འཇམ་དཔལ་གཞོན་ནུར་གྱུར་པ་སྟན་ལས་ལངས་ཏེ། བཅོམ་ལྡན་འདས་ཀྱི་ཞབས་གཉིས་ལ་སྤྱི་བོས་བཏུད་ནས་ཐལ་མོ་སྦྱར་ཏེ་འདི་སྐད་ཅེས་གསོལ་ཏོ། །བཅོམ་ལྡན་འདས་སེམས་ཅན་རྣམས་ནི་གཞན་གྱི་ལུས་ལ་འཇུག་པའི་སེམས་ཅན་རྣམས་ཏེ། འཕགས་པ་དང་ལྷའི་སྐྱེ་གནས་དང་གྲུབ་པ་དང་དྲི་ཟ་དང་གནོད་སྦྱིན་དང་སྲིན་པོ་དང་ཤ་ཟ་དང་ལྟོ་འཕྱེ་ཆེན་པོ་ལ་སོགས་པ་ལས་སྣ་ཚོགས་ཀྱིས་བྱས་པའི་ལུས་རྣམ་པ་སྣ་ཚོགས་ལ་བརྟེན་ཅིང་གནས་པ། ཆ་བྱད་རྣམ་པ་སྣ་ཚོགས་དང་རྟགས་སྣ་ཚོགས་དང་མི་དང་མི་མ་ཡིན་པ་དང་འབྱུང་པོ་ཐམས་ཅད་ཀྱི་སེམས་ཀྱི་སྤྱོད་པ་བཅོམ་ལྡན་འདས་བསྟན་པའི་དུས་ལགས། བདེ་བར་གཤེགས་པ་བསྟན་པའི་དུས་ནི་ལགས་ཏེ། དེའི་དུས་ལ་བབ་པར་མཁྱེན་ན་ལེགས་པར་བཤད་དུ་གསོལ། དེ་སྐད་ཅེས་རྒྱལ་བའི་མཆོག་འཇིག་རྟེན་གྱི་འདྲེན་པ་གཽ་ཏ་མ་བདུན་པ་ལ་གསོལ་བ་བཏབ་ནས། འཇམ་དཔལ་གཞོན་ནུར་གྱུར་པ་ཅང་མི་སྨྲ་བར་གྱུར་ཏེ། རང་གི་སྟན་ལ་འདུག་པར་གྱུར་ཏོ། །དེ་ནས་བཅོམ་ལྡན་འདས་ཤཱཀྱ་ཐུབ་པས་སེམས་ཅན་རྣམས་ཀྱི་སེམས་ཀྱི་སྤྱོད་པ་དང་མཚན་མ་ཤེས་པ་དང་རྟགས་དང་དུས་གསུངས་པ། གཞན་གྱི་ལུས་ཞུགས་སེམས་ཅན་ནི། །སྔགས་ཀྱི་སྦྱོར་བས་དྲང་བར་བྱ། །ཁ་ཅིག་ཟས་ལ་ཆགས་པ་ཡི། །ས་སྟེང་མི་ནི་འཛིན་པར་བྱེད། །གཞན་དག་ཁྲོ་ལྡན་སེམས་ཀྱིས་ནི། །ས་སྟེང་དག་ཏུ་མི་བཟད་པས། །