དུས་གསུམ་དུ་ཁྲུས་བྱེད་ཅིང་གོས་ལན་གསུམ་བརྗེ་བས་ཡི་གེ་འབུམ་བྱས་ན་སྔར་བསྙེན་པ་བྱས་པར་འགྱུར་རོ། །ཁ་ཚར་གྱི་རྩེ་མོ་མ་བཅད་པའི་རས་ལ་རི་མོ་མཁན་གསོ་སྦྱོང་བྱས་པས། ཚོན་མ་འདྲེས་པ་དག་གིས་འཕགས་པ་འཇམ་དཔལ་པདྨའི་གདན་ལ་ཆོས་འཆད་ཅིང་བཞུགས་པ། རྒྱན་ཐམས་ཅད་ཀྱིས་བརྒྱན་པ། གཞོན་ནུའི་གཟུགས་སུ་འདུག་པ་བླ་གོས་ཕྲག་པར་གཟར་བ་འདྲིར་གཞུག་པར་བྱའོ། །གཡོན་དུ་འཕགས་པ་སྤྱན་རས་གཟིགས་དབང་ཕྱུག་ཕྱག་ན་པདྨ་བསྣམས་པ། གཡས་སུ་ནི་འཕགས་པ་ཀུན་ཏུ་བཟང་པོ། །སྟེང་དུ་ནི་རིག་པ་འཛིན་པ་གཉིས་ཕྲེང་བ་ཐོགས་ཤིང་སྤྲིན་གྱི་ནང་ནས་བྱུང་བ་བྲི་བར་བྱའོ། །འོག་ཏུ་ནི་སྒྲུབ་པ་པོ་ལག་ན་སྤོས་སྣོད་ཐོགས་པའོ། །ཁོར་ཡུག་ཏུ་ནི་རིའི་རྩེ་མོའི་འོག་ཏུ་ནི་པདྨའི་མཚོ་འདྲིར་གཞུག་པར་བྱའོ། །སྐུ་གདུང་དང་བཅས་པའི་མཆོད་རྟེན་དང་རས་རིས་ནུབ་ཏུ་བསྟན་ཏེ་རབ་ཏུ་བཞག་ལ་མཆོད་པ་རྒྱ་ཆེན་པོ་བྱས་ནས་མར་གྱི་མར་མེ་ཡང་རབ་ཏུ་སྦར་ཞིང་སྣ་མའི་མེ་ཏོག་ལ་རེ་རེ་ལ་ཡང་མངོན་པར་བཟླས་ནས་མེ་ཏོག་སྟོང་རྩ་བརྒྱད་འཇམ་དཔལ་གྱི་ཞལ་ལ་གཏོར་རོ། །དེ་ནས་ཟབ་པ་ཆེན་པོའི་ཡི་གེ་ཧཱུྃ་གི་སྒྲ་ཐོས་པའམ་རས་རིས་རབ་ཏུ་འགུལ་བར་འགྱུར་རོ། །ཡི་གེ་ཧཱུྃ་གི་སྒྲས་ནི་ས་ཀུན་ལ་དབང་བའི་རྒྱལ་པོར་འགྱུར་རོ། །རས་རིས་འགུལ་བས་ནི་རྒོལ་བ་ཐམས་ཅད་ལ་ལན་འདེབས་ནུས་པ་དང་། འཇིག་རྟེན་པ་ཐམས་ཅད་ཀྱི་བསྟན་བཅོས་ཤེས་པར་འགྱུར་རོ། །ཅི་སྟེ་མ་གྲུབ་ཀྱང་ལས་ཐམས་ཅད་ལ་ནུས་པ་དང་ལྡན་པར་འགྱུར་རོ། །འདི་ནི་ཆོ་ག་དང་པོའོ། །ཨ་ག་རུའི་ཡམ་ཤིང་སོར་ཕྱེད་དང་གཉིས་ཀྱི་ཚད་ལ། ཏུ་རུཥྐའི་ཐང་ཆུས་སིལ་ཧ་རས་བཏགས་པས་སེང་ལྡེང་གི་མདག་མ་དུ་བ་མེད་པ་ལ་མཚན་ཐོག་ཐག་ཏུ་སྦྱིན་སྲེག་བྱས་ན། སྐྱ་རེངས་འཆར་བ་ཙམ་ན་འཕགས་པ་འཇམ་དཔལ་མཐོང་བར་འགྱུར་ཞིང་། དེ་ཅི་འདོད་པའི་མཆོག་སྩོལ་བར་འགྱུར་ཏེ། འདོད་པ་དབང་དུ་བྱ་བ་ནི་མ་གཏོགས་སོ། །དེ་ཉིད་ཀྱི་རས་རིས་ཀྱི་མདུན་དུ་ཙནྡན་གྱི་སྤོས་ཀྱི་རྒྱུན་ཆད་པ་མེད་པར་མཚན་ཐོག་ཐག་ཏུ་བདུགས་ཏེ། བཟླས་པ་བྱས་ན་དེའི་འོག་ཏུ་འཕགས་པ་འཇམ་དཔལ་མངོན་སུམ་དུ་གཤེགས་ཏེ་ཟབ་མོའི་ཆོས་སྟོན་པ་དེ་ལ་མོས་པར་འགྱུར་རོ།