།དེ་ཚེ་གནས་གཙང་ལྷ་ཚོགས་ལ། །རྒྱལ་བ་མཆོག་གིས་གསུངས་པ་ནི། །ཆོ་གའི་རྒྱལ་པོ་རྒྱ་ཆེ་བ། །འཇིག་རྟེན་ཀུན་ལ་ཕན་པའི་ཕྱིར། །འཇམ་པའི་དབྱངས་ཀྱིས་བསྟན་པ་ལ། །གྲོགས་པོ་དེ་ནི་ང་ཡིས་བསྟན། །འཕགས་པ་འཇམ་དཔལ་གྱི་རྩ་བའི་ཆོ་ག་བྱང་ཆུབ་སེམས་དཔའི་སྡེ་སྣོད་ཕལ་པོ་ཆེ་ཐེག་པ་ཆེན་པོ་ཤིན་ཏུ་རྒྱས་པའི་མདོ་ལས། ཆོ་གའི་བྱ་བ་འཇམ་དཔལ་གྱི་ཆོ་ག་རབ་འབྱམ་ལས། ལེའུ་ཉི་ཤུ་རྩ་གཉིས་པ་རྫོགས་སོ།། །།དེ་ནས་བཅོམ་ལྡན་འདས་ཤཱཀྱ་ཐུབ་པས་གཞན་ཡང་གནས་གཙང་མའི་གཞལ་མེད་ཁང་ལ་གཟིགས་ནས་འཇམ་དཔལ་གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ་ཁྱོད་ཀྱི་ལས་ཀྱི་ཆོ་གའི་ལེའུ་ལས་རས་རིས་ཀྱི་ཆོ་ག་བདུན་པ་ཡོད་དེ། གང་གིས་དུས་ཀྱི་མཐའ་མ་དེ་ལ་བསྒྲུབ་པར་གྱུར་ན་དེ་ལ་དོན་ཡོད་པར་འགྲུབ་པར་འགྱུར་ཏེ། འབྲས་བུ་དང་བཅས་པ་བདེ་བ་འབྱུང་བ། བདེ་བར་རྣམ་པར་སྨིན་པ། མཐོང་བའི་ཆོས་ལ་མྱོང་བར་འགྱུར་བ། ངན་སོང་ཐམས་ཅད་ལས་ཟློག་པར་བྱེད་པ། ངེས་པར་བྱང་ཆུབ་ལ་གཞོལ་བར་བྱེད་པ་འགྲུབ་པར་འགྱུར་རོ། །དེ་ནས་བཅོམ་ལྡན་འདས་ཤཱཀྱ་ཐུབ་པས་འཇམ་དཔལ་གཞོན་ནུར་གྱུར་པའི་སྙིང་པོ་གསུངས་པ་ནི། ཡི་གེ་དྲུག་པ་འགྲོ་བ་དྲུག་ལས་གྲོལ་བར་བྱེད་པའི་བདག་ཉིད་བསམ་གྱིས་མི་ཁྱབ་པ། མི་མཉམ་པ། ཟླ་མེད་པ། རྫུ་འཕྲུལ་ཆེ་བ། སྲིད་པའི་རྒྱ་མཚོ་ཐམས་ཅད་དང་སྡུག་བསྔལ་གསུམ་གྱི་སྡུག་བསྔལ་ལས་གྲོལ་བར་བྱེད་པ། འབྱུང་པོ་ཐམས་ཅད་ཀྱིས་བཟོད་པར་དཀའ་བ། འཇིག་རྟེན་ཐམས་ཅད་ཀྱིས་མ་གོས་པ། འབྱུང་པོ་ཐམས་ཅད་ཀྱིས་མི་ཐུབ་པ། སྲེད་པའི་ལས་ཐམས་ཅད་རྣམ་པར་སྦྱོང་བར་བྱེད་པ། སངས་རྒྱས་ཀྱི་ཆོས་རྣམས་ཐོབ་པར་བྱེད་པ། མ་རུངས་པ་ཐམས་ཅད་ཟློག་པར་བྱེད་པ། སངས་རྒྱས་ཐམས་ཅད་ཀྱིས་རྗེས་སུ་ཡི་རང་བར་མཛད་པ། ཕུན་སུམ་ཚོགས་པ་ཐམས་ཅད་བྱེད་པ། འཇམ་དཔལ་གྱི་བསྟན་པ་ལ་སྔགས་ཐམས་ཅད་ཀྱི་མཆོག་དེ་གང་ཞེ་ན། ཨོྃ་བཱ་ཀྱེ་དྃ་ན་མཿ། འདིའི་ཆོ་གར་འགྱུར་བ་ནི། ཚོད་རྔད་དམ། ནས་ཆན་ཁྱོར་གང་ངམ། སློང་མོའི་ཟས་ཀྱིས་འཚོ་ལ། དུས་གསུམ་དུ་ཁྲུས་བྱེད་ཅིང་གོས་ལན་གསུམ་བརྗེ་བས་ཡི་གེ་འབུམ་བྱས་ན་སྔར་བསྙེན་པ་བྱས་པར་འགྱུར་རོ།