ངེས་པར་འཇམ་དཔལ་གཞོན་ནུར་གྱུར་པ་ཇི་ལྟ་བ་མཐོང་བར་འགྱུར་རོ། །རས་རིས་ཀྱི་ཆོ་ག་གཉིས་པ་རྫོགས་སོ།། །།གསེར་རམ་དངུལ་ལས་གཞོན་ནུའི་གཟུགས་བྱས་ཏེ་ཕྱག་གཡས་པ་མཆོག་སྦྱིན་པ་དང་། གཡོན་པ་བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་མའི་གླེགས་བམ་འཛིན་པ་འདི་ལྟ་བུ་སྐུ་གདུང་གི་ཟ་མ་ཏོག་མདུན་དུ་བཞག་ལ་ཡི་གེ་གཅིག་པའི་བཟླས་པ་འབུམ་བྱའོ། །མཆོད་པ་རྣམས་ནི་ཉིན་པར་བྱའོ། །ཞབས་གཡོན་པའི་མདུན་དུ་བུ་མོ་ལ་ཁ་ཟས་སྦྱིན་པར་བྱའོ། །གླུ་དང་རོལ་མོ་དང་གླེགས་བམ་བཀླག་པར་ཡང་བྱའོ། །བཟླས་པ་ཡོངས་སུ་རྫོགས་པ་དང་མེ་ཏོག་གསུམ་གྱིས་མཆོད་ཡོན་གསོལ་ཏེ་སླར་གཤེགས་སུ་གསོལ་ལོ། །ཆོ་ག་སྔ་མ་བཞིན་དུ་སྤྱན་དྲང་བ་དང་གཤེགས་སུ་གསོལ་བར་བྱའོ། །པདྨའི་ཕྱག་རྒྱ་བཅིངས་ནས་ནི་བཟླས་པ་བྱའོ། །རྒྱ་མཚན་གྱི་ཕྱག་རྒྱས་ནི་སྤྱན་དྲང་བར་བྱའོ། །བཀྲ་ཤིས་ལྡན་གྱི་ཕྱག་རྒྱས་ནི་བཞུགས་སུ་གསོལ་ལོ། །གང་བའི་ཕྱག་རྒྱས་ནི་མཆོད་ཡོན་ནོ། །རྟགས་གཅིག་པའི་ཕྱག་རྒྱས་ནི་མེ་ཏོག་དབུལ་ལོ། །ཡིད་ལ་རེ་བའི་ཕྱག་རྒྱས་ནི་མར་མེའོ། །གཡོ་བའི་ཕྱག་རྒྱས་ནི་སྤོས་སོ། །རྨ་བྱའི་གདན་གྱི་ཕྱག་རྒྱས་ནི་དྲིའོ། །སྲོག་ཤིང་གི་ཕྱག་རྒྱས་ནི་བཤོས་སོ། །ཆོ་ག་འདི་ཉིད་ཀྱིས་མཚན་མོ་དང་ཉི་མ་རེ་རེ་ཞིང་ཇི་སྲིད་བཟླས་པ་རྫོགས་ཀྱི་བར་དུ་བྱའོ། །ཕྱི་ནས་ནི་ལས་རྣམས་བྱའོ། །སྣ་མའི་མེ་ཏོག་གིས་རྒྱ་མཚོར་འགྲོ་བའི་ཆུ་བོ་ལ་འབུམ་གྱིས་གཏོར་ན་ཡུལ་ཐོབ་པར་འགྱུར་རོ། །མཚན་མོ་སྣ་མའི་མེ་ཏོག་གི་ཚོགས་བཅོམ་ལྡན་འདས་ཀྱི་མདུན་དུ་བྱས་ནས་ཉལ་ན། བཅོམ་ལྡན་འདས་བྱང་ཆུབ་སེམས་དཔས་ཡོངས་སུ་བསྐོར་བ་ཆོས་འཆད་པ་མཐོང་བར་འགྱུར་རོ། །གང་གི་དོན་དུ་བྱེད་པ་དེ་ཉིད་ཀྱི་ལས་བྱའོ། །གསོ་སྦྱོང་བྱས་ཤིང་ཡར་ངོའི་ཚེས་ནས་བརྩམས་ཏེ། ག་པུར་སྦྲང་རྩི་དང་བསྲེས་པའི་སྤོས་ཀྱིས་སྦྱིན་སྲེག་བྱས་ན་རྒྱལ་ཐབས་ཐོབ་པར་འགྱུར་རོ། །བཟླས་པ་བྱེ་བ་བྱས་ན་འཇམ་དཔལ་རང་ཉིད་མཐོང་བར་འགྱུར་རོ། །ཆོས་འཆད་པར་ཡང་མཛད་དེ། དེ་དང་ལྷན་ཅིག་སྨྲ་བ་དང་མངོན་སུམ་དུ་སྣང་བར་ཡང་འགྱུར་རོ།