།མ་འོངས་པའི་དུས་ལ་བལྟོས་ནས་དུས་ཀྱི་ཐ་མ་བསྟན་པ་ནུབ་པའི་དུས་ཚོད་ལ་དེ་བཞིན་གཤེགས་པའི་ཐ་མ་བདག་གིས་ཀྱང་བསྟན་ཏེ། རྩོད་པའི་དུས་དང་བསྟན་པ་འཇིག་པའི་དུས་སུ་ངའི་བསྟན་པ་ཡང་དག་པར་བསྲུང་བའི་དོན་བྱེད་པར་འགྱུར་རོ། །འདིའི་ཆོ་ག་གཞན་ཡང་མདོར་བསྡུས་ནས་བརྗོད་པར་བྱ་བ་ནི་འཇམ་པའི་དབྱངས་གཞོན་ནུ་ཉོན་ཅིག །བདག་ཉིད་ཆེན་པོའི་ཆོ་ག་རྒྱ་ཆེ་བ་འདིའི་ཆོ་གའི་རྒྱལ་པོའི་དབང་པོ་བརྗོད་པར་བྱ་སྟེ། དང་པོར་རེ་ཞིག་རིའི་རྩེ་མོར་འཛེགས་ཏེ། འབུམ་ཕྲག་སུམ་ཅུ་བཟླས་པ་བྱས་ན་སྔར་བསྙེན་པ་བྱས་པར་འགྱུར་རོ། །འོ་མས་འཚོ་ཞིང་མི་སྨྲ་བའི་བརྟུལ་ཞུགས་དང་སྔགས་གཞན་ལ་མི་རྟེན་པ་དང་། གཞན་ལ་མི་སེམས་པ་དང་། སྐྱབས་གསུམ་ཡོངས་སུ་བླངས་པ་དང་། བྱང་ཆུབ་ཏུ་སེམས་བསྐྱེད་པ་དང་། ཁྲིམས་ལྔའི་སྡོམ་པ་ཡང་དག་པར་བླངས་པ་དང་། བྱང་ཆུབ་སེམས་དཔའི་སྡོམ་པ་ཡང་དག་པར་བླངས་པས་བཟླས་པ་བྱས་ལ་དེས་ལས་རྣམས་བྱ་བ་སྟེ། དང་པོར་རེ་ཞིག་རས་ལ་རི་མོ་བྱ་བ་ནི་རི་མོ་མཁན་གསོ་སྦྱོང་བྱས་ལ་ཚོན་མ་འདྲེས་པ་དག་གིས་བྲིའོ། །གཙང་མའི་རས་ཀྱི་དུམ་བུ་གང་ཡང་རུང་བའམ་དར་ལ་ཙནྡན་དང་ག་པུར་དང་གུར་གུམ་གྱི་ཆུས་གཏོར་ལ། གཙང་བའི་ས་ཕྱོགས་སུ་གཙང་བའི་རི་མོ་བྱེད་པ་དཀར་གསུམ་ཟ་ཞིང་གོས་དཀར་པོ་གྱོན་པས་ཟླ་བ་ཉ་བའི་བཅྭ་ལྔ་ལ་ཉི་མ་འཆར་བའི་དུས་སུ་རྣམ་པར་དག་པའི་རྒྱུ་སྐར་ལ་ཉི་མ་ཕྱེད་པའི་བར་དུ་བྲི་བར་བྱ་སྟེ་དེ་ནས་བྲི་བ་སྤང་བར་བྱའོ། །དེ་བཞིན་དུ་ཉིན་རེ་ཞིང་ཡང་ཡོངས་སུ་རྫོགས་ཀྱི་བར་དུ་བྱའོ། །དང་པོར་རེ་ཞིག་རས་ལ་ཚེ་དཔག་ཏུ་མེད་པའི་འཇིག་རྟེན་གྱི་ཁམས་བྲི་བར་བྱའོ། །རས་ཁྲུ་གང་ཙམ་མམ་བདེ་བར་གཤེགས་པའི་མཐོ་གང་གི་ཚད་དམ། རས་ཁྲུ་བཞི་པ་ལ་ཁོར་ཡུག་ཏུ་ཚེ་དཔག་ཏུ་མེད་པའི་འཇིག་རྟེན་གྱི་ཁམས་བྲིའོ། །པདྨ་རཱ་ག་དང་ཨིནྡྲ་ནཱི་ལ་དང་ཤེལ་དང་རིན་པོ་ཆེ་མརྒད་ཀྱི་རས་རིས་ཀྱི་འོག་གི་ཕྱོགས་སུ་མཛེས་པར་བྱའོ། །དེ་དག་གི་སྟེང་གི་ཕྱོགས་སུ་རིན་པོ་ཆེའི་གཞལ་མེད་ཁང་མཛེས་པའི་རྣམ་པ་དང་རྒྱལ་མཚན་དང་བ་དན་མཛེས་པའི་རྣམ་པར་བསྒྲེང་བ་དང་དེའི་དབུས་སུ་ཚེ་དཔག་ཏུ་མེད་པ་རྣམ་པར་གདོན་མི་ཟ་བའི་དབང་པོའི་རྒྱལ་པོ་དེ་བཞིན་གཤེགས་པ་ཆོས་འཆད་པ་སེང་གེའི་ཁྲི་ལ་བཞུགས་པ།