ཆོས་ཀྱི་རྒྱལ་པོ་ཆོས་ཀྱི་འཁོར་ལོ་རབ་ཏུ་བསྐོར་བ་འཇིག་རྟེན་ཐམས་ཅད་ཀྱི་བདག་པོ་སྐྱེས་བུ་དམ་པ་རྐང་གཉིས་རྣམས་ཀྱི་མཆོག །དེ་བཞིན་གཤེགས་པ་རིན་ཆེན་ཏོག་ཅེས་བྱ་བ་རྒྱལ་བའི་མཆོག་ཆོས་འཆད་པ་ཀུན་ནས་འབར་བའི་འོད་ཀྱི་དཀྱིལ་འཁོར་དང་ལྡན་པའོ། །འོག་ཏུ་ནི་ཚངས་པ་དང་འཕགས་པ་ཕྱག་ན་རྡོ་རྗེ། སྟེང་དུ་ནི་ཕྲེང་བ་འཛིན་པའི་ལྷའི་བུ་གཉིས་འོག་ཏུ་སྒྲུབ་པ་པོ་དེའི་མདུན་དུ་དུས་གསུམ་དུ་ཨ་ག་རུ་སྲེག་ཅིང་འབུམ་ཕྲག་བཅུ་བཟླས་པ་བྱའོ། །དེ་ནས་ལས་སུ་བྱ་བ་ནི་དང་པོ་འཁོར་ལོའི་སྒྲུབ་པ་བྱེད་པར་འདོད་ན། ལྕགས་བཟང་པོའི་རང་བཞིན་ལས་རྩིབས་བཅུ་གཉིས་པའི་འཁོར་ལོ་བྱས་ཏེ། ཆོ་འཕྲུལ་གྱི་ཟླ་ཕྱེད་ལ་བཅོམ་ལྡན་འདས་ཀྱི་སྤྱན་སྔར་དུས་གསུམ་དུ་ཨ་ག་རུའི་དུད་པས་བདུག་ཅིང་འབུམ་ཕྲག་བཅུ་བཟླས་པ་བྱའོ། །ཐ་མར་ཟླ་བ་ཉ་བ་ལ་མཆོད་པ་རྒྱ་ཆེན་པོ་བྱས་ནས་ལག་པས་བཟུང་སྟེ། ཇི་སྲིད་རབ་ཏུ་འབར་བའི་བར་དུ་བཟླས་པ་བྱའོ། །དེ་བཟུང་ན་རིག་པ་འཛིན་པའི་འཁོར་ལོས་སྒྱུར་བར་འགྱུར་རོ། །གང་གིས་མཐོང་བ་དེ་དང་ལྷན་ཅིག་ནམ་མཁའ་ལ་འགྲོ་བར་འགྱུར་རོ། །དེ་ནས་གདུགས་བསྒྲུབ་པར་འདོད་ན། གདུགས་ཁ་དོག་སྣ་ཚོགས་པ་སར་པ་བྱས་ལ་གསེར་གྱི་འཁོར་ལོས་མཚན་པ་ཀ་ཤི་ཀའི་གོས་འཕྱང་བ། དེ་ཉིད་ཀྱི་ཆོ་གས་མགོ་ལ་གདུགས་བཟུང་བར་བྱས་ཏེ། བཟླས་པ་བྱས་ན་རིག་པ་རང་ཉིད་ཉེ་བར་བཞུགས་པར་འགྱུར་རོ། །འདི་ཉིད་ཀྱིས་བཅོམ་ལྡན་འདས་ཀྱི་སྤྱན་སྔར་དུས་གསུམ་དུ་ཨ་ག་རུའི་དུད་པས་བདུགས་ཏེ། འབུམ་ཕྲག་བཅུ་བཟླས་པ་བྱས་ལ། ཐ་མར་ཟླ་བ་ཉ་བ་ལ་མཆོད་པ་རྒྱ་ཆེན་པོ་བྱས་ནས་ལག་པས་བཟུང་སྟེ། ཇི་སྲིད་དུ་རབ་ཏུ་འབར་བའི་བར་དུ་བཟླས་པ་བྱའོ། །དེ་ཐོགས་ན་རིག་པ་འཛིན་པའི་འཁོར་ལོས་སྒྱུར་བར་འགྱུར་རོ། །ཟླ་བ་རེ་རེ་ཞིང་ཟླ་བ་ཉ་བ་དང་ཆོ་འཕྲུལ་གྱི་ཟླ་བ་ཕྱེད་ལྔའི་བར་གྱིས་འགྲུབ་པར་འགྱུར་རོ། །འདི་གྲུབ་པ་ཙམ་གྱིས་ཆོས་ཐམས་ཅད་མངོན་སུམ་དུ་འགྱུར་རོ། །མངོན་པར་ཤེས་པ་ཐམས་ཅད་རབ་ཏུ་ཐོབ་པར་འགྱུར་རོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་མངོན་པར་དགྱེས་པ་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་རྗེས་སུ་བསྔགས་པ་འགྲུབ་པར་འགྱུར་རོ།