མགོན་པོ་འཁོར་ལོའི་བདག་པོ་ཡི། །ཆོ་ག་འདི་ནི་རྒྱ་ཆེ་བས། །གང་གི་བསྐལ་པའི་ཚད་དུ་ཡང་། །རྒྱལ་བས་ཀྱང་ནི་བཤད་མི་ནུས། །མི་རྣམས་ལ་ནི་ཕན་པའི་ཕྱིར། །ཆོ་ག་ཡི་ནི་ཕྱོགས་གཅིག་ཙམ། །མདོར་བསྡུས་ནས་ནི་བཤད་པ་ཡིན། །དེ་ཚེ་དེ་སྐད་གསུངས་ནས་ནི། །དཔལ་ལྡན་འཇམ་དབྱངས་རྫུ་འཕྲུལ་ཆེ། །གཙང་མའི་གནས་ཀྱི་སྟེང་བཞུགས་པའི། །སངས་རྒྱས་དེ་ལ་སྐུལ་བར་བྱེད། །གསུངས་ཤིག་གསུངས་ཤིག་དཔའ་བོ་ཆེ། །རྐང་གཉིས་དམ་པ་རྫོགས་སངས་རྒྱས། །དུས་མཐའ་འཇིགས་པའི་དུས་སུ་ནི། །མི་རྣམས་བདེ་བ་སྐྱེད་པའི་ཕྱིར། །མཐུ་ཆེན་སྔགས་ཀྱི་རྒྱལ་པོ་སྟེ། །གཟི་བརྗིད་ཆེན་པོ་འདི་ཡིས་ནི། །རས་རིས་ཇི་ལྟར་གྲུབ་པར་འགྱུར། །མྱུར་དུ་རས་རིས་འགྲུབ་པར་གསུངས། །འཕགས་པ་འཇམ་དཔལ་གྱི་རྩ་བའི་ཆོ་ག་བྱང་ཆུབ་སེམས་དཔའི་སྡེ་སྣོད་ཕལ་པོ་ཆེ་ཐེག་པ་ཆེན་པོ་ཤིན་ཏུ་རྒྱས་པའི་མདོ་ལས། ཡི་གེ་གཅིག་པ་འཁོར་ལོས་སྒྱུར་བ་འབྱུང་བའི་ལེའུ་རབ་འབྱམ་ལས་བཅུ་དགུ་པ་རྫོགས་སོ།། །།དེ་ནས་བཅོམ་ལྡན་འདས་ཤཱཀྱ་ཐུབ་པས་གནས་གཙང་མའི་གཞལ་མེད་ཁང་ལ་གཟིགས་ནས། འཇམ་དཔལ་གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ་ཉོན་ཅིག །མདོར་ན་ཡི་གེ་གཅིག་པ་འཁོར་ལོས་སྒྱུར་བ་རྫུ་འཕྲུལ་ཆེན་པོའི་རས་རིས་ཀྱི་ཆོ་གར་འགྱུར་བ་རྒྱ་ཆེ་བ་ནི་སྔར་བསྟན་ཏོ། །དེ་ནི་དུས་ཀྱི་ཐ་མའི་དུས་སུ་སེམས་ཅན་རྣམས་བརྩོན་འགྲུས་ཆུང་བར་འགྱུར་ཞིང་། ཤེས་རབ་ཆུང་བ་དང་། ཡིད་གཞུངས་པ་དམན་པའི་ཕྱིར་རས་རིས་ཀྱི་ཚད་རྒྱ་ཆེ་བའི་སྦྱོར་བ་སྒྲུབ་པ་ཉམས་པར་འགྱུར་བས། སེམས་ཅན་རྣམས་ལ་ཕན་པར་འདོད་པས་ཟློས་པ་པོས་ཇི་ལྟར་དངོས་གྲུབ་མཆོག་ཐོབ་པར་འགྱུར་བ་དེ་ལྟར་ངས་མདོར་བཤད་པར་བྱ་སྟེ། སྒྲུབ་པ་མཆོག་བྱེད་པར་འདོད་པས་རས་མ་ཉམས་པ་ཁ་ཚར་མ་བཅད་པ་སྐྲ་དང་བྲལ་བ་དག་ལ་ཚོན་མ་འདྲེས་པ་དག་གིས་བཅོམ་ལྡན་འདས་འདྲིར་གཞུག་པར་བྱ་སྟེ། ཆོས་ཀྱི་རྒྱལ་པོ་ཆོས་ཀྱི་འཁོར་ལོ་རབ་ཏུ་བསྐོར་བ་འཇིག་རྟེན་ཐམས་ཅད་ཀྱི་བདག་པོ་སྐྱེས་བུ་དམ་པ་རྐང་གཉིས་རྣམས་ཀྱི་མཆོག