དེ་བཞིན་རྒྱལ་པོ་འཇིག་རྟེན་དང་། །རྒྱུ་སྐར་མང་པོ་གསུངས་པ་སྟེ། །སྟོང་ཕྲག་དྲུག་ཅུ་རྩ་བཞིའོ། །དུས་ཀྱི་ཐ་མ་འདི་ལ་ནི། །འདི་དག་གི་ནི་ནུས་པ་ཡོད། །ཆོ་ག་རྒྱལ་འདི་བདེ་དོན་དུ། །དེ་ཙམ་ཤེས་པར་གསུངས་པ་ཡིན། །རང་ཉིད་འོད་ལྡན་སེམས་ཅན་ནི། །དེ་ཡི་དུས་སུ་རྫོགས་ལྡན་ཡིན། །ཐམས་ཅད་ནམ་མཁའ་ལ་འགྲོ་ཞིང་། །རྒ་དང་འཆི་བ་རྣམ་པར་སྤངས། །དེ་ཡི་དུས་སུ་རྒྱུ་སྐར་མེད། །ཉི་མ་ཟླ་བ་སྐར་མ་མེད། །ལྷ་དང་ལྷ་མིན་འཇིག་རྟེན་མེད། །དང་པོའི་དུས་ནི་དུས་མཆོག་ཡིན། །མིང་མེད་རིགས་ཀྱང་ཡོད་མ་ཡིན། །ཚེས་དང་སྐྱེ་བའི་སྐར་མ་མེད། །སྨྱུང་བ་མེད་ཅིང་སྔགས་ཀྱང་མེད། །དགེ་དང་མི་དགེའི་ལས་ཀྱང་མེད། །འདི་དག་རང་དགར་སྤྱོད་པ་སྟེ། །བཟའ་དང་བཟའ་བར་བྱ་བའང་མེད། །འདི་དག་ནད་མེད་དག་པ་སྟེ། །རྟག་ཏུ་སེམས་ཅན་རྣམ་མང་པོ། །དེ་ནས་དུས་ནི་བྲི་བ་ན། །འཇིག་རྟེན་སྣོད་མིན་རབ་ཏུ་འཇུག །སྔོན་གྱི་ལས་ཀྱིས་དྲངས་ནས་ནི། །དེ་ནས་ས་ཡི་སྟེང་དུ་འགྲོ། །ས་སྟེང་ལྷ་གནས་གཞལ་མེད་ཁང་། །ལྷ་དང་ལྷ་མིན་ཡང་དག་བྱུང་། །བར་མའི་དུས་སུ་ཕྱིན་གྱུར་ནས། །མི་ཡི་ལུས་ལ་ཡང་དག་བརྟེན། །བཟའ་དང་བཏུང་ལ་བརྐམ་ཆགས་པས། །འོད་དེ་དག་ནི་རབ་ཏུ་ཉམས། །ལུས་ནི་སྲ་བ་ཉིད་གྱུར་ཅིང་། །དགེ་དང་མི་དགེ་རྣམ་པར་སྤྱོད། །དེ་ནས་ཉིན་ཞག་ཟླ་བ་དང་། །གཟའ་ཡི་འོད་ནི་བྱུང་བར་གྱུར། །དེ་ནས་བཟུང་ནས་གང་ཅུང་ཟད། །སྐར་མའི་དཔྱད་ཤེས་པ་ཉིད་དང་། །སེམས་ཅན་རྗེས་སུ་གཟུང་བར་བརྗོད། །ངས་ནི་དེ་དག་བསྟན་པ་ཡིན། །སྔོན་ནི་དྲང་སྲོང་ཆ་བྱད་གྱུར། །བློ་ལྡན་ཚངས་པའི་ཆ་བྱད་དང་། །དབང་ཕྱུག་ཆེན་པོའི་ལུས་བསྟན་ཅིང་། །ཡང་ན་ཁྱབ་འཇུག་ཆ་བྱད་ཀྱིས། །ནམ་མཁའ་ལྡིང་གི་ལུས་སྤྱད་དང་། །གནོད་སྦྱིན་སྲིན་པོ་དྲི་ཟ་དང་། །ཤ་ཟ་དག་གིས་ལུས་ཉིད་གྱུར། །སྐྱེ་དང་སྐྱེ་བར་བདག་ཉིད་སྐྱེས། །བྱང་ཆུབ་སེམས་དཔའ་མཁས་པར་ནི། །དེ་དང་དེར་ནི་སྐྱེ་བ་ལ། །བྱང་ཆུབ་སེམས་དཔའི་སྤྱོད་དོན་ཕྱིར། །རྟག་ཏུ་སྐྱེ་བའི་དབང་གིས་སོ། །བདག་ཉིད་དེ་ཚེ་དུས་དག་ཏུ། །སྔོན་ནི་བྱང་ཆུབ་སེམས་དཔར་གྱུར། །མི་ཤེས་མུན་པས་བསྒྲིབས་པ་ཡི། །བདག་ནི་དེ་ཚེ་བྱིས་པར་གྱུར།