དེ་བས་རྣམ་ཀུན་འབད་ནས་ནི། །རྐྱེན་ལ་རག་ལས་བྱ་བ་ཡིན། །ཟློས་པའི་སྔགས་རྣམས་རྟག་ཏུ་ནི། །གྲུབ་པ་རྒྱུ་ལ་ལྟོས་པ་ཡིན། །འདི་དག་རྐྱེན་གྱི་ཡན་ལག་ནི། །ལས་ནི་བདག་གིར་བྱེད་པས་མཚོན། །མི་མཚོན་སྔགས་རྣམས་ཐམས་ཅད་ནི། །བགེགས་ལས་ཤིན་ཏུ་མི་བཟད་འགྱུར། །དེ་བས་འདི་དག་ཐམས་ཅད་ཀྱི། །ཡན་ལག་ཏུ་ནི་ཐུབ་པས་གསུངས། །ས་དབང་རྒྱལ་པོ་ཐམས་ཅད་མཁྱེན། །བྱང་ཆུབ་སྙིང་པོར་ཏིང་འཛིན་ཐོབ། །སྔགས་ནི་ཡོངས་སུ་གསུངས་པ་ན། །བགེགས་རྣམས་མ་ལུས་རབ་ཏུ་འཇིག །རྨི་ལམ་ངན་དང་མཚན་མ་ངན། །བཟོད་པར་དཀའ་བའང་རྣམ་པར་འཇོམས། །ཀུན་མཁྱེན་བདག་ཉིད་ཆེན་པོ་ཡི། །དེ་ཐུགས་བྱང་ཆུབ་ལ་ཞུགས་པ། །མ་རུངས་བདུད་ཀྱི་སེམས་ཀྱིས་ནི། །བགེགས་ཆེན་འཇིགས་པར་ག་ལ་འགྱུར། །དེ་ནས་འཇིགས་པ་ཆེན་པོ་ནི། །དེས་ནི་རྒྱུ་མཚན་མེད་པར་སྣང་། །རྣམ་པ་སྣ་ཚོགས་འཇིགས་པ་རྣམས། །དེ་ལ་རྒྱུ་མཚན་མེད་པར་འབྱུང་། །དེ་ནི་བསོད་ནམས་སྟོབས་བསྐྱེད་པ། །ཡུན་རིང་དུས་སུ་ཡོངས་སུ་བསྔགས། །དེ་ཡི་སྔགས་ཀྱི་སྟོབས་ཀྱིས་ནི། །དེ་ཚེ་བདུད་ནི་བཅོམ་པར་འགྱུར། །རྫུ་འཕྲུལ་ལྡན་ཞིང་བརྩོན་འགྲུས་ཆེ། །དེ་ནི་འོད་ཆེན་ལྡན་པར་གྱུར། །དེ་ཡི་སྔགས་ཀྱིས་མཐུ་ཡིས་ནི། །བྱང་ཆུབ་དམ་པ་ཐོབ་པར་གྱུར། །རྨི་ལམ་ངན་པ་ཉེར་འཇིག་པ། །སྔགས་དེ་འདིར་ནི་བཤད་པར་བྱ། །གང་དག་ས་ལ་སྤྱོད་པ་ཡི། །འབྱུང་པོའི་ཚོགས་ཀུན་རབ་ཉོན་ཅིག །རྨི་ལམ་ངན་པ་བཟོད་དཀའ་དང་། །མ་རུངས་སེམས་ཅན་ཟློག་བྱེད་པ། །རྒྱལ་བ་སཱ་ལའི་དབང་པོ་ཡི། །སྔོན་ནི་སྔགས་རྒྱལ་ཡོངས་གསུངས་པ། །ལྷ་ཡི་ཚོགས་དང་གཟའ་རྣམས་དང་། །རྒྱུ་སྐར་སྐར་མཁན་རྣམས་ཉོན་ཅིག །གཟའ་དང་རྒྱུ་སྐར་སྐར་མ་རྣམས། །མ་རུངས་ཚར་གཅད་དོན་དང་ནི། །འབྱུང་པོ་རྣམས་ནི་ཐམས་ཅད་ཀྱང་། །ཞི་བའི་སེམས་ནི་རབ་བསྐྱེད་ཕྱིར། །གང་དག་ས་ལ་སྤྱོད་པ་དག །རྐང་མེད་རྐང་མང་དག་དང་ནི། །རྐང་གཉིས་དང་ནི་རྐང་བཞི་དང་། །མདོར་ན་སེམས་ཅན་ཐམས་ཅད་ནི། །འགྲོ་བ་དང་ནི་གནས་པ་ཡི། །འབྱུང་པོའི་ཚོགས་རྣམས་ཀུན་ཉོན་ཅིག