སྔགས་ཟློས་པ་ཡི་ཆེད་དུ་ནི། །རྒྱུད་རྣམས་མཐའ་དག་ས་སྟེང་གསུངས། །སྔགས་རྒྱུད་མ་ལུས་དོན་དག་ནི། །བྱང་ཆུབ་རྣམ་གསུམ་གཞོལ་བ་སྟེ། །སངས་རྒྱས་རྣམས་ཀྱི་ཡེ་ཤེས་དག །ཆོ་ག་འདིར་ནི་རབ་ཏུ་བསྟན། །སེམས་ཅན་རྣམས་ལའང་ཕན་པའི་ཕྱིར། །འཇིག་རྟེན་ཀུན་ལ་རབ་ཏུ་བསྐོར། །གཞན་ལ་ཆོ་ག་རབ་སྣང་བ། །ཆོ་གའི་རྒྱལ་པོ་འདི་ལའང་ཡོད། །ཐུབ་མཆོག་ཐུབ་པའི་སྲས་དག་གིས། །གཞན་དུ་ཆོ་ག་གང་བསྟན་པ། །སྔགས་རྣམས་ཐམས་ཅད་འདི་ལ་ཡོད། །དེ་ན་ཆོ་ག་རྒྱ་ཆེན་ཡིན། །དེ་ཉིད་ཕྱིར་ན་ཐུབ་དབང་གིས། །ལུས་ཅན་ཀུན་ལ་གསུངས་པ་ཡིན། །གང་དུ་ཆོ་གའི་རྒྱལ་པོ་འདིས། །དབང་འགྱུར་མིན་དང་བཀུག་མིན་པ། །ས་སྟེང་འཇིག་རྟེན་གསུམ་འདི་ན། །རིག་པའི་སྔགས་རྒྱལ་དེ་ཡོད་མིན། །ཐུབ་པའི་ཟླ་བ་རབ་ནུབ་ཅིང་། །ས་ཡི་དཀྱིལ་འཁོར་སྟོངས་པ་ན། །ཆོ་ག་འཇིག་རྟེན་འདིར་གནས་པ། །བསྟན་པའི་དོན་ནི་བྱེད་པར་འགྱུར། །འཇམ་པའི་དབྱངས་ནི་རྟག་ཏུ་དགེ། །འབྱུང་པོ་ཀུན་ལ་གཞོན་ནུ་ནི། །དེ་ཚེ་སངས་རྒྱས་མཛད་པ་ནི། །འཇིག་རྟེན་བསྟན་ལ་བྱེད་པར་འགྱུར། །ཆོ་གའི་རྒྱལ་པོ་མཐུ་ལ་ནི། །ཡུན་རིང་དུས་སུ་འདོད་པ་རྣམས། །ལན་ཅིག་ཐོས་ཀྱང་གྲོལ་འགྱུར་ཏེ། །རྟག་ཏུ་དེ་ལ་འགྲུབ་པར་འགྱུར། །སངས་རྒྱས་ཀུན་གྱི་གསུང་དག་ནི། །རྟག་ཏུ་དགེ་བ་དོན་ཡོད་འགྱུར། །སྔགས་རྣམས་ཀུན་ལ་སྔགས་པ་ནི། །བཟླས་དང་སྦྱིན་སྲེག་རྟག་འདོད་པའོ། །དུས་གསུམ་དག་ཏུ་ཤེས་བྱ་ལ། །མཁྱེན་པ་གང་དུ་རབ་འཇུག་པ། །དེ་བཞིན་འདི་ལ་འཇུག་བྱེད་པ། །ཆོ་གའི་རྒྱལ་པོ་དམ་པ་ཡིན། །སངས་རྒྱས་རྣམས་ཀྱི་བསྟན་པ་ནི། །སྔགས་སུ་རབ་གནས་དེ་འདིར་གསུངས། །སྔགས་དེ་རྣམ་པར་མི་རྟོག་པར། །ཆོ་ག་དེ་འདིར་གསུངས་པ་ཡིན། །དོན་དང་དོན་མིན་སེམས་ཅན་གྱི། །དགེ་དང་མི་དགེ་བྱེད་པར་འགྱུར། །དེ་ཚེ་འགྲོ་བ་བློ་བཞིན་དུ། །འཇིག་རྟེན་ཀུན་གྱི་དགེ་མི་དགེ། །དེ་ཉིད་ཆོ་ག་འདིར་སྤྲོས་པ། །དེ་བཞིན་གཤེགས་པ་སྤྲོས་པ་མེད། །འཇིག་རྟེན་འདས་པ་རྫོགས་སངས་རྒྱས། །འཇིག་རྟེན་ཕྱིར་ནི་འདིར་གསུངས་སོ།