།བརྩེ་དང་སྙིང་རྗེ་ལྡན་མཁས་པ། །ཡོན་ཏན་མང་འདོད་འཇིག་རྟེན་ཤེས། །རྟག་ཏུ་སྔགས་རྣམས་ཟློས་ལ་གུས། །རྒྱལ་བ་ལ་ནི་སྲོག་ཀྱང་གཏོང་། །དེ་བཞིན་ཉན་ཐོས་སྲས་རྣམས་དང་། །བསེ་རུ་ལ་ཡང་རྟག་ཏུ་གཏོང་། །སྟོབས་ལྡན་འཇིག་རྟེན་གཙོ་བོ་དང་། །རིགས་ནི་གཉིས་པ་བཟང་པོ་ཡིན། །ཡན་ལག་ཐམས་ཅད་མ་ཚང་མེད། །མ་རུངས་རྟག་ཏུ་བབ་ཅོལ་བྱེད། །གཏོང་ལྡན་ཚུལ་ལྡན་དགྲ་ལས་རྒྱལ། །ཆོས་དང་ཆོས་མིན་རྣམ་དཔྱོད་བྱེད། །ཧ་ཅང་སྦོམ་མིན་རྗུད་པའང་མིན། །ཧ་ཅང་རིང་མིན་ཐུང་བའང་མིན། །བར་མའི་མི་ནི་མཆོག་ཡིན་ཏེ། །དེ་ཡི་གྲུབ་པ་མཆོག་ཏུ་འགྱུར། །སེན་མོ་ཟངས་མདོག་ལེགས་སྣུམ་དང་། །ལག་མཐིལ་དམར་དང་གཙང་བ་དང་། །རྐང་པའི་མཐའ་དམར་སྣུམ་པ་དང་། །འཁོར་ལོ་སྭ་སྟི་ཀས་བརྒྱན་དང་། །རྒྱལ་མཚན་རྟ་བབས་ཉ་དང་ནི། །བ་དན་པདྨ་ཐོ་བ་དང་། །མི་གང་རྐང་པ་ལག་པ་ལ། །མཚན་ནི་འདི་དག་ཡོད་གྱུར་པ། །དེ་འདྲའི་སྐྱེས་བུ་དམ་པ་ལ། །གྲུབ་པ་མཆོག་ཏུ་བརྟག་པར་བྱ། །མཆེ་བ་དཀར་ཞིང་བཟང་བ་དང་། །མཐོ་བའི་རི་བོ་དང་འདྲ་དང་། །སྣ་བཟང་མཐོ་ཞིང་མིག་དཀྱུས་རིང་། །སྨིན་མ་སྟུག་ཅིང་ཀོས་ཀོ་བཟང་། །བ་ཡི་རྫི་མ་འཇིག་རྟེན་མཚན། །ནག་པའི་ལྟ་བའི་མིག་འབྲས་མཚན། །དཔྲལ་བའི་དབྱེས་གང་རྒྱ་ཆེ་ཞིང་། །མགོ་བོ་གདུགས་འདྲའི་རྣམ་པ་བཟང་། །མགོ་བོ་གཙུག་ཏོར་འདྲ་བ་དང་། །རྣ་བ་བཟང་བ་དམ་པ་ཡིན། །རྟག་ཏུ་སེང་གེའི་འགྲམ་འདྲ་དང་། །མ་མཆུ་བིམ་པ་སྨིན་འདྲའི་མདོག །གང་གི་ལྕེ་ནི་རབ་སྣང་བ། །པདྨ་འདབ་མ་དམར་འདྲའི་མདོག །མགྲིན་པ་བུམ་པ་འདྲ་བ་དང་། །ཐལ་གོང་རྒྱས་ཤིང་ཡང་དག་འཕགས། །མཆན་ཁུང་ཐོང་ཀ་བཟང་བ་མཆོག །དེ་བཞིན་བརླ་ནི་རྒྱ་ཆེ་དང་། །ལྟེ་བའི་ཕྱོགས་ཀྱང་ཆུང་བ་དང་། །རྐེད་པ་རྒྱ་ཆེ་བཟང་བ་དང་། །ལྟེ་བ་ཟབ་ཅིང་གཡས་སུ་འཁྱིལ། །ཀུན་ནས་དཀར་མེད་བ་སྤུ་དང་། །ལག་རིང་ལག་ནི་ཆེ་བ་དང་། །རྐེད་པ་སེང་གེ་འདྲ་བའི་མཚན། །གང་གི་བརླ་ནི་ཟླུམ་པ་དང་། །གྲུ་མོ་ཉམས་མེད་ཟླུམ་པ་དང་། །བྱིན་པ་ཨེ་ན་ཡ་ལྟ་བུར། །ཟླུམ་པའི་ནང་ནི་ཟླུམ་པོར་གྲུབ། །རྐང་པ་ཤ་དང་ལྡན་པ་དང་། །སོར་མོ་རྣམས་ཀྱི་རིང་བ་དང་། །དམར་ཞིང་སེན་དམར་སྣུམ་པ་དང་། །ཤ་རྒྱས་པས་ནི་སྣུམ་པ་ཡིན། །