།དེ་བས་ལས་རྣམས་ཀུན་ལ་ནི། །ཁྱད་པར་དུ་ནི་སྦྱིན་སྲེག་བྱ། །བྱང་ཆུབ་སེམས་དཔའི་སྡེ་སྣོད་ཕལ་པོ་ཆེ་ཐེག་པ་ཆེན་པོ་ཤིན་ཏུ་རྒྱས་པའི་མདོ་ལས། འཕགས་པ་འཇམ་དཔལ་གྱི་རྩ་བའི་ཆོ་ག་ལས། ལེའུ་བཅུ་བཞི་པ་འཁོར་ལོས་སྒྱུར་བའི་རས་རིས་ཀྱི་ཆོ་གའི་དཀྱིལ་འཁོར་སྒྲུབ་པའི་ཐབས་རབ་འབྱམ་རྫོགས་སོ།། །།དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེ་འཁོར་གྱི་ནང་དེར་འདུས་ཤིང་འཁོད་པར་གྱུར་ཏེ། འདུག་པ་དེ་སྟན་ལས་ལངས་ནས་ལན་གསུམ་བསྐོར་བ་བྱས་ཏེ། བཅོམ་ལྡན་འདས་ཀྱི་ཞབས་གཉིས་ལ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ལེགས་སོ་ལེགས་སོ། །ལེགས་པར་རབ་ཏུ་བསྟན་པ་དང་། མཆོག་ཏུ་ལེགས་པར་གསུངས་པའི་རིག་པ་ཐམས་ཅད་ཀྱི་སྔགས་ཀྱི་སྦྱོར་བ། ཆོས་ཆེན་པོའི་སྤྲིན་ལས་ངེས་པར་བྱུང་བ། དེ་བཞིན་གཤེགས་པ་ཐམས་ཅད་ཀྱི་སྙིང་པོ། རིག་པ་ཆེན་པོའི་རྒྱལ་པོ་འཁོར་ལོས་སྒྱུར་བ། ཆོ་ག་ཆེན་པོ་རྒྱ་ཆེ་བ་དོན་ཐམས་ཅད་ཡོངས་སུ་རྫོགས་པར་བྱེད་པ། འབྲས་བུ་དང་བཅས་པ་སྒྲུབ་པར་བྱེད་པ། བྱང་ཆུབ་ཀྱི་ལམ་བླ་ན་མེད་པ། བྱ་བའི་བྱེ་བྲག་ཡང་དག་པར་སྡོམ་པ་དང་བཟླས་པ་དང་སྦྱིན་སྲེག་དང་། རིག་པ་དང་སྤྱོད་པའི་རྗེས་སུ་འབྲང་བ་རྣམས་ཀྱི་ལམ་འབྲས་བུ་བརྟེན་པའི་ལས་ཀྱི་རྐྱེན་སྐྱེད་པའི་རྒྱུ་དང་མཚན་མ། རྨད་དུ་བྱུང་བའི་སྟོབས་བཅུ། ནོད་པར་བྱེད་པའི་དགེ་བའི་རྩ་བ། བྱང་ཆུབ་ཀྱི་སྙིང་པོ་ནོད་པར་བྱེད་ཅིང་། ངེས་པར་ཕ་རོལ་དུ་འགྲོ་བར་བྱེད་པ་དེ་བཅོམ་ལྡན་འདས་དེ་ནི་ལེགས་སོ། །སྔགས་སྒྲུབ་པར་བྱེད་པ་དང་། རྗེས་སུ་མཐུན་པའི་རྨི་ལམ་ན་མཐོང་བར་བྱེད་པའི་མཚན་མ་དེ་སྟོན་པས་བཤད་དུ་གསོལ། གང་གིས་རིག་པ་ཐམས་ཅད་སྒྲུབ་པའི་རྗེས་སུ་དཔྱོད་པའི་སེམས་ཅན་གྲུབ་པའི་མཚན་མའི་ལས་རྩོམ་པར་བྱེད་པར་འགྱུར་བ་དང་། འབྲས་བུ་དང་བཅས་པའི་རིག་པ་ཐམས་ཅད་ཀྱི་མཚན་མར་འགྱུར་བའོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཤཱཀྱ་ཐུབ་པས་བྱང་ཆུབ་སེམས་དཔའ་ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །གནོད་སྦྱིན་གྱི་བདག་པོ་ཁྱོད་སྐྱེ་བོ་མང་པོ་ལ་ཕན་པ་དང་སྐྱེ་བོ་མང་པོ་ལ་བདེ་བ་དང་འཇིག་རྟེན་ལ་སྙིང་བརྩེ་བ་དང་སྐྱེ་བོའི་ཚོགས་ཆེན་པོའི་དོན་དང་ཕན་པ་དང་བདེ་བ་དང་རིག་པ་ཐམས་ཅད་སྒྲུབ་པར་བྱེད་པའི་སེམས་ཅན་རྣམས་ཀྱི་དོན་གྱི་ཕྱིར་ལེགས་སོ་ལེགས་སོ།