།ལྷའི་བུ་དང་ཀླུ་རྣམས་ལ་ཡང་ཅི་རྙེད་པའི་མེ་ཏོག་གིས་མཆོད་པར་བྱའོ། །དེ་ནས་མཚན་ཕྱེད་ཀྱི་དུས་སུ་ཆོ་འཕྲུལ་གྱི་ཟླ་ཕྱེད་ཀྱི་ཟླ་བ་ཉ་བ་ལ། རས་རིས་ཀྱི་མདུན་དུ་པདྨའི་རྣམ་པ་ལྟ་བུའི་མེ་ཐབ་བྱས་པ་ལ། ཙནྡན་དཀར་པོའི་ཤིང་གིས་མེ་སྦར་ནས། གུར་གུམ་དང་ག་པུར་བསྲེས་པས་སྲེག་བླུགས་ཅི་འབྱོར་པས་སྟོང་རྩ་བརྒྱད་སྦྱིན་སྲེག་བྱའོ། །དེ་ནས་བསྲུང་བ་བྱའོ། །དེ་ནས་བཅོམ་ལྡན་འདས་ཤཱཀྱ་ཐུབ་པ་ལས་འོད་ཟེར་བྱུང་སྟེ། རས་ཀྱི་རི་མོའི་འཁོར་ཡུག་ནས་གཅིག་ཏུ་འབར་བར་འགྱུར་ཏེ། སྒྲུབ་པ་པོས་གུར་གུམ་དང་། ཙནྡན་གྱིས་བཏགས་པའི་ཙནྡན་དཀར་པོའི་མེ་ཏོག་གིས་མཆོད་ཡོན་དབུལ་ལོ། །དེ་ནས་སྒྲུབ་པ་པོས་རིངས་པའི་ཚུལ་གྱིས་རས་རིས་ལ་ལན་གསུམ་བསྐོར་བ་བྱས་ཏེ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་། རང་སངས་རྒྱས་ཐམས་ཅད་དང་འཕགས་པ་ཉན་ཐོས་རྣམས་ལ་ཕྱག་བྱས་ནས། སྒྲུབ་པ་པོས་བྲིས་པའི་རས་རིས་ཀྱི་མཐའ་མའི་ཕྱོགས་ནས་འཇིགས་པ་མེད་པས་རས་རིས་གཟུང་བར་བྱའོ། །དེ་ནས་བཟུང་བ་ཙམ་གྱིས་འཕུར་ཏེ། སེ་གོལ་གཏོགས་པ་ཙམ་གྱིས་ཚངས་པའི་འཇིག་རྟེན་དུ་ཕྱིན་པར་འགྱུར་ཏེ། མེ་ཏོག་ཅན་གྱི་འཇིག་རྟེན་གྱི་ཁམས་སུ་རབ་ཏུ་གནས་པར་འགྱུར་ཏེ། གང་དུ་བཅོམ་ལྡན་འདས་མེ་ཏོག་ཡང་དག་པར་སྐྱེས་པའི་རྒྱལ་པོའི་དབང་པོ་དེ་བཞིན་གཤེགས་པ་དེ་བཞུགས་ཏེ། འཚོ་ཞིང་གཞེས་ལ་ཆོས་ཀྱང་སྟོན་ཏོ། །འཕགས་པ་འཇམ་དཔལ་ཡང་མངོན་དུ་མཐོང་ངོ་། །ཆོས་ཀྱང་ཐོས་སོ། །བྱང་ཆུབ་སེམས་དཔའ་དུ་མ་དག་ཀྱང་མཐོང་ཞིང་། དེ་དག་ལ་བསྙེན་བཀུར་ཡང་བྱེད་དེ་བསྐལ་པ་ཆེན་པོ་སྟོང་དུ་རྒ་བ་དང་འཆི་བ་མེད་ཅིང་གནས་པར་འགྱུར་རོ། །རས་རིས་ཀྱང་དེ་ན་གནས་པར་འགྱུར་རོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་བྱིན་གྱིས་བརླབས་པར་འགྱུར་རོ། །དེ་དག་གིས་བྱིན་གྱིས་བརླབས་པར་ཡང་ཡང་དག་པར་ཤེས་སོ། །སངས་རྒྱས་ཀྱི་ཞིང་སྟོང་ཡང་འདའ་བར་བྱེད་དོ། །ལུས་སྟོང་ཡང་སྟོན་པར་བྱེད་དོ། །རྫུ་འཕྲུལ་གྱི་མཐུ་དུ་མ་ཡང་འབྱིན་པར་བྱེད་དོ། །འཕགས་པ་འཇམ་དཔལ་ཡང་དགེ་བའི་བཤེས་གཉེན་དུ་འགྱུར་རོ། །ངེས་པར་བྱང་ཆུབ་ལ་གཞོལ་བར་འགྱུར་རོ།