།པདྨའི་སྡོང་བུ་མཛེས་པ་རིན་པོ་ཆེ་མརྒད་འདྲ་བ། པདྨའི་མེ་ཏོག་དུ་མ་ཁ་མ་བྱེ་བ་དང་། ཕྱེད་ཙམ་བྱེ་བ་དང་ཁ་བྱེ་བ་དང་ལྡན་པ། མཚོ་ཆེན་པོ་མ་དྲོས་པ་ལས་སྐྱེས་པ་ཀླུའི་རྒྱལ་པོ་དགའ་བོ་དང་ཉེ་དགའ་གཉིས་པདྨའི་སྡོང་བུ་ལ་འཛིན་པ། ཀླུའི་རྒྱལ་པོ་དེ་དག་གི་ཁ་དོག་དཀར་བ། གདེངས་ཀ་བདུན་གྱིས་ཉེ་བར་བརྒྱན་པ། ལུས་རྒྱན་ཐམས་ཅད་ཀྱིས་བརྒྱན་པ། ལུས་ཀྱི་སྟོད་མི་ལ་སྦྲུལ་གྱི་གདེངས་ཀས་མཚན་པ། འཕགས་པ་འཇམ་དཔལ་ལ་ལྟ་བ། ལུས་ཕྱེད་ཆུའི་ནང་དུ་ནུབ་པ་ནོར་བུ་རིན་པོ་ཆེ་དང་གོས་ཀྱིས་ཉེ་བར་མཛེས་པ་བྲི་བར་བྱའོ། །མཚོ་ཆེན་པོ་ཀུན་གྱི་འོག་ཏུ་སྒྲུབ་པ་པོ་རས་རིས་ཀྱི་གཡས་ཕྱོགས་ཀྱི་མཐའི་ཟུར་དུ་འཕགས་པ་འཇམ་དཔལ་གྱི་ཞལ་གྱི་དཀྱིལ་འཁོར་ལ་ལྟ་བ། སྤོས་སྣོད་ལག་ན་ཐོགས་པ་མགོ་དང་པུས་མོའི་ལྷ་ང་འདུད་པ། ཆ་བྱད་དང་ཁ་དོག་སྔ་མ་ཅི་ལྟ་བ་བཞིན་བྲི་བར་བྱའོ། །འཕགས་པ་འཇམ་དཔལ་གྱི་སྟེང་རས་ཀྱི་ཟུར་གཉིས་སུ་ལྷའི་བུ་མེ་ཏོག་གི་ཕྲེང་བ་འཛིན་པ། ནམ་མཁའ་ལ་ལྡིང་བ། སྤྲིན་གྱི་ནང་ནས་བྱུང་བ། མེ་ཏོག་གི་ཚོགས་ཆེན་པོ་འཐོར་བ་ཤིན་ཏུ་མཛེས་པ་བྲི་བར་བྱའོ། །རས་རིས་ཀྱི་འཁོར་ཡུག་ཏུ་མེ་ཏོག་ནཱ་ག་གེ་སར་ལ་སོགས་པས་རབ་ཏུ་གཏོར་བར་བྲི་བར་བྱའོ། །ཅི་ལྟར་འདོད་པའི་གཟུགས་དེ་བཞིན་དུ་བྲི་བར་བྱའོ། །འཕགས་པ་འཇམ་དཔལ་ཆོས་འཆད་པ་དང་། འཕགས་པ་ཀུན་དུ་བཟང་པོ་དང་འཕགས་པ་སྤྱན་རས་གཟིགས་ལག་ན་རྔ་ཡབ་གཡོབ་པ་བྲི་བར་བྱའོ། །ཡང་ན་སྒྲུབ་པ་པོ་ཅི་ལྟར་འདོད་པ་བཞིན་དུ་རས་རིས་ཀྱི་གཟུགས་ངེས་པར་བྲི་བར་བྱ་སྟེ། ཅི་ལྟར་འདོད་པའི་ཆ་བྱད་དམ། ཅི་ལྟར་འདོད་པའི་དབྱིབས་སམ། སྒྲུབ་པ་པོ་ཅི་ལྟ་ཅི་ལྟར་འདོད་པ་དེ་ལྟ་དེ་ལྟར་བྲི་བར་བྱའོ། །དབུས་སུ་འཕགས་པ་འཇམ་དཔལ་གཡས་གཡོན་དུ་འཕགས་པ་འཇིག་རྟེན་དབང་ཕྱུག་དང་། ཀུན་དུ་བཟང་པོ་ཅི་ལྟར་འདོད་པར་ངེས་པར་བྲི་བར་བྱའོ། །ཡང་ན་ཅི་རྙེད་པའི་རས་ཀྱི་དུམ་བུ་མཐོ་གང་ངམ། ཁྲུ་གང་ལ་བདག་ཉིད་དམ་གཞན་གྱིས་སམ། རི་མོ་མཁན་གསོ་སྦྱོང་བྱས་པའམ་གསོ་སྦྱོང་མ་བྱས་པ་དད་པའམ་མ་དད་པའམ། གཙང་བ་འམ་མི་གཙང་བ་འམ། ཚུལ་ཁྲིམས་དང་ལྡན་པ་འམ་ཚུལ་ཁྲིམས་འཆལ་པའི་རི་མོ་མཁན་གྱིས་ཀྱང་བྲི་བར་བྱའོ།