རྒྱུ་ཡོད་རྐྱེན་ཡོད་དོ། །གང་ཞིག་མདོ་སྡེའི་དབང་པོའི་རྒྱལ་པོ་འདི་འཇམ་དཔལ་གྱི་རྩ་བའི་ཆོ་ག་རིག་པའི་སྤྱོད་པ་རྗེས་སུ་སྒྲུབ་པ་ལས་སྒྲུབ་པའི་ཐབས་ལ་ཡང་དག་པར་གཞོལ་བ། ཆོས་ཀྱི་སྤྲིན་ལ་རྟེན་པ་ལ་ཡང་དག་པར་འཇུག་ཅིང་རྗེས་སུ་འབྲང་བར་བྱེད་པ་དང་། འཛིན་པར་འགྱུར་བ་དང་། ཀློག་པར་འགྱུར་བ་དང་། དད་པར་འགྱུར་བ་དང་། གླེགས་བམ་ལ་འདྲི་བ་བྱས་ནས་མཆོད་པར་འགྱུར་བ་དང་། ཙནྡན་གྱི་ཕྱེ་མ་དང་བྱུག་པ་དང་། བདུག་པ་དང་། ཕྲེང་བ་དང་། གདུགས་དང་། རྒྱལ་མཚན་དང་། བ་དན་རྣམ་པ་སྣ་ཚོགས་པའམ། ཚིག་གི་བྱེ་བྲག་གིས་སམ། སིལ་སྙན་རྣམ་པ་སྣ་ཚོགས་དང་། ཕེག་རྡོབ་པ་དག་གམ་ཐ་ན་རྗེས་སུ་ཡི་རང་བ་དང་ལྡན་པའི་སེམས་རྒྱུད་ལ་ཐོབ་པ་འམ། བ་སྤུ་ལྡང་བར་བྱེད་པ་འམ། རིག་པའི་མཐུ་ཐོས་ནས་དགའ་བ་སྐྱེས་པ་འམ། རྗེས་སུ་ཡི་རང་བར་འགྱུར་བ་འམ། སྤྱོད་པ་ཐོབ་པར་འགྱུར་བ་དེ་དག་ནི་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སངས་རྒྱས་བཅོམ་ལྡན་འདས་སུ་འགྱུར་བར་ལུང་བསྟན་ཏེ། དེས་ན་རྒྱལ་བ་དེ་ལྟར་འཛུམ་པ་མཛད་ཀྱི་གཞན་དུ་ནི་མ་ཡིན་ནོ། །འདིར་དང་པོར་རེ་ཞིག་ཆོ་གའི་རྒྱལ་པོ་འདི་ལ་དམ་ཚིག་མཐོང་བ་སྔོན་དུ་བྱ་བ་རྣམས་བྱས་པ་དང་དབང་བསྐུར་བ་ཐོབ་པ། རྩ་བའི་སྔགས་སམ་སྙིང་པོ་འམ་ཉེ་བའི་སྙིང་པོ་འམ། སྔགས་གང་ཡང་རུང་བ་བཟུང་ནས་ཡི་གེ་གཅིག་པ་འམ། གང་འདོད་པ་དགོན་པ་ཆེན་པོར་སོང་སྟེ་འབུམ་ཕྲག་གསུམ་བཟླ་བར་བྱའོ། །འབྲས་བུ་དང་ཆུས་འཚོ་བ་འམ། རྩ་བ་དང་། ལོ་མའི་བཟའ་བ་བྱས་ན། སྔོན་དུ་བྱ་བ་བྱས་པར་འགྱུར་རོ། །དེ་ནས་རིའི་རྩེ་མོར་འཛེགས་ནས་རས་རིས་ཆེན་པོའི་ཚད་ནུབ་ཕྱོགས་སུ་མངོན་དུ་ལྟ་བ་བཞག་པ་བྱས་ལ་བདག་ཉིད་ཤར་དུ་བལྟས་ཏེ། ཀུ་ཤའི་ཁྲེས་ལ་འདུག་ནས། པདྨ་དཀར་པོ་ལ་ཙནྡན་དང་གུར་གུམ་གྱིས་བཏགས་ཏེ། བཅོམ་ལྡན་འདས་ཤཱཀྱ་ཐུབ་པ་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་། རང་སངས་རྒྱས་དང་ཉན་ཐོས་དག་ལ་འབུམ་ཕྲག་གཅིག་རི་མོའི་རས་རིས་ཀྱི་འོག་ཏུ་དབུལ་བར་བྱའོ། །ག་པུར་གྱི་བདུག་པ་ཡང་ཅི་འབྱོར་པས་བདུག་གོ། །ལྷའི་བུ་དང་ཀླུ་རྣམས་ལ་ཡང་ཅི་རྙེད་པའི་མེ་ཏོག་གིས་མཆོད་པར་བྱའོ།