།དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཐམས་ཅད་ཆོས་མཉན་པའི་ཕྱིར་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འཁོད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེ་བྱང་ཆུབ་སེམས་དཔའ་བྱེ་བ་ཕྲག་དུ་མས་བསྐོར་ཅིང་། ལྷ་བྱེ་བ་ཕྲག་དུ་མས་བསྐོར་ཏེ། རིག་སྔགས་འཆང་བརྒྱ་ཕྲག་དུ་མས་མདུན་དུ་བདར་བས་རྫུ་འཕྲུལ་དང་མཐུ་ཆེན་པོ་དང་། བཀོད་པ་ཆེན་པོ་དང་། མེ་ཏོག་དང་། སྤོས་དང་། མེ་ཏོག་ཕྲེང་དང་། བདུག་པ་དང་། རོལ་མོའི་སྒྲ་དང་། སིལ་སྙན་དང་། ཕེག་རྡོབ་པ་ཆེན་པོས་དེ་བཞིན་གཤེགས་པ་དགེ་སློང་གི་དགེ་འདུན་དང་། བྱང་ཆུབ་སེམས་དཔའི་ཚོགས་དང་བཅས་པ་ལ་མངོན་པར་མཆོད་དོ། །དེ་ནས་དེའི་ཚེ་བྱང་ཆུབ་སེམས་དཔའ་བཀོད་པའི་རྒྱལ་པོས་ལྷའི་བཀོད་པ་དང་། བཀོད་པའི་མཐུ་དང་། མེ་ཏོག་གི་ཆར་ཆེན་པོས་དེ་བཞིན་གཤེགས་པ་ལ་མཆོད་པ་ཆེན་པོ་བྱས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གིས་འདུས་པ་ཆེན་པོ་དེ་མཐོང་ནས། ཆོས་ཀྱི་འབེལ་བའི་གཏམ་འདོད་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་དེ་དག་གི་སེམས་ཐུགས་ཀྱིས་མཁྱེན་ནས། བྱང་ཆུབ་སེམས་དཔའ་བཀོད་པའི་རྒྱལ་པོ་དེ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་སོང་ལ་ས་ཆེན་པོ་འདི་ལྟོས་ཤིག །དེ་ནས་བྱང་ཆུབ་སེམས་དཔའ་བཀོད་པའི་རྒྱལ་པོས་ས་ཆེན་པོ་བལྟས་སོ། །བལྟས་ནས་ཀྱང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ས་ཆེན་པོ་བལྟས་ལགས་ཏེ། བཅོམ་ལྡན་འདས་བཅོམ་ལྡན་འདས་ཀྱིས་སེམས་ཅན་ཐམས་ཅད་ལ་བདེ་བའི་འདུས་པ་ཆེན་པོ་མཛད་པ་མཐོང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། བཀོད་པའི་རྒྱལ་པོ་སྲོག་ཆགས་དྲུག་ཁྲི་བཞི་སྟོང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་དེང་ཁོ་ན་ལུང་བསྟན་པར་འགྱུར་རོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེས་བཅོམ་ལྡན་འདས་ཀྱི་ཞབས་གཉིས་ལ་གཏུགས་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ལྷ་དང་། ཀླུ་དང་། གནོད་སྦྱིན་དང་། སྲིན་པོ་དང་། མི་དང་། སྤྱོད་པ་པ་དང་། ཀུན་ཏུ་རྒྱུ་མང་པོ་འདུས་ལགས་སོ། །བདེ་བར་གཤེགས་པ་སེམས་ཅན་མང་པོ་འདུས་ལགས་སོ། །བཅོམ་ལྡན་འདས་ཆོས་མཉན་པའི་དུས་ནི་འདི་ལགས་སོ།