མདུན་རི་གླང་པོ་ཆེ་འདུད་པ་ལྟ་བུ། གསེར་ལྡན་གྱི་རྒྱུན་དབང་གི་ཕྱོགས་ནས་དལ་བུའི་འབབ་པ་སོགས་སའི་དཔྱད་ལེགས་རྒུ་མ་ཚང་བ་མེད་པའི་དབུས་སུ་དཔལ་ས་ལྡན་ལྷུན་གྲུབ་སྟེང་གི་ཆོས་གྲྭ་ཆེན་པོ། དགེ་འདུན་གྱི་སྡེ་རྣམས་ཀྱང་། རྗེ་བཙུན་ས་སྐྱ་པ་ཆེན་པོ་ཡབ་སྲས་ནས་ཉེ་བར་བརྒྱུད་དེ། རྗེ་བཙུན་ཐམས་ཅད་མཁྱེན་པ་རྡོ་རྗེ་འཆང་ཀུན་དགའ་བཟང་པོས་ངེས་གསང་གི་གནད་ཐམས་ཅད་ལེགས་པར་ཕྱེ་བའི་རྒྱུན་དྲི་མ་མེད་པ་འཛིན་པར་མཛད་ཅིང་། ཀློག་པ་ཐོས་བསམ་གྱི་འཁོར་ལོ་དང་། བྱ་བ་ནན་ཏན་གྱི་འཁོར་ལོ་རྣམ་པ་གཉིས་ཀྱིས་དུས་འདའ་བ་རྒྱུད་སྡེ་མང་པོའི་བསྐྱེད་རྫོགས་ཀྱི་རྣལ་འབྱོར་ཟབ་མོ་དང་། དཀྱིལ་འཁོར་གྱི་ལས་རབ་འབྱམས་དང་། སྨིན་གྲོལ་གྱི་བཀའ་ཟབ་མོ་སོགས་མ་ནུབ་ཅིང་ཆེས་གསལ་བ་སོགས་རྣམ་གྲངས་དུ་མས་བསྔགས་པར་འོས་པ་འདི་ཉིད་དུ། རྒྱལ་ཁབ་ཀྱི་ཕོ་བྲང་ཆེན་པོ། བདེ་བར་གཤེགས་པའི་སྐུ་གཟུགས་ལུགས་མ་དང་། རི་མོར་བྲིས་པ་སོགས་དང་། སྡེ་སྣོད་གསུམ་གྱི་པུསྟ་ཀ་དུ་མ་སོགས་རིན་ཐང་དང་བྲལ་བའི་རིན་པོ་ཆེའི་ཚོགས་དུ་མས་བྱུར་བུར་བཀང་བས་གཙུག་ལག་ཁང་ཆེན་པོར་གྱུར་པ། འཕགས་ཡུལ་གྱི་རནྡྷ་ཀུ་ཊ་བི་ཧ་ར་ཇི་ལྟ་བ་བཞིན་དུ་གྲགས་པ་མངོན་པར་གསལ་བ་འདིའོ། །གཉིས་པ་དེ་ལྟ་བུའི་ཡུལ་དུ་བྱུང་བའི་མིའི་དབང་པོ་འདིའི་རིགས་རྒྱུད་ཀྱི་ཁྱད་པར་ནི། མི་དབང་འདི་ཉིད་ཀྱི་དྲུང་ཡིག་པ་འཇམ་དབྱངས་དགའ་བའི་བློ་གྲོས་ཀྱིས་ཡིག་ཚང་ཁུངས་མ་ལས་བཏུས་པའི་གཏམ་གྱི་སྦྱོར་བ་བྱས་པ་ལྟར་འགོད་ན། །དེའང་བོད་ཆེན་པོའི་ལྗོངས་འདིར་སྤྱིར་སྒྲ་འབྲུ་སྟོང་སྒ་སྟེ་རུས་ཆེན་བཞི་དང་། སྒོ་ལྷ་སྡེ་དཀར་པོའི་རིགས་ཏེ་མི་རིགས་ལྔ་བྱུང་བར་གྲགས་པ་ལས་ཕྱི་མ། དེ་ལས་ཀྱང་བྱེ་བྲག་ཏུ་རྔུ་ཆེན་རྒྱལ་མོ་ཚོ་བཅོ་བརྒྱད་དུ་གྲགས་པ་འགར་ཀེ་འགོལ་གསུམ། གསུང་གསེར་འབྲོམ་གསུམ། ཅི་འབུ་གཞག་གསུམ། ཤོལ་སྟག་ཕྱིང་གསུམ། གཅེ་སིང་རམ་གསུམ། ཕྱུག་པོ་བུ་གསུམ་རྣམས་ལས་འགར་གྱི་རིགས་འགར་ཆེན་ཡེ་ཤེས་བཟང་པོ་དང་། འགར་དམ་པར་གྲགས་པ་སྐུ་མཆེད་གཉིས་བྱུང་སྟེ། དེ་ལས་ཕྱི་མ་ནི། དྲུང་ཡིག་པས་བཀོད་པའི་ཡི་གེ་དེ་ཉིད་དང་བསྟུན་ན་སྤོ་བོ་ཕུ་ལུང་དགོན་པ་སོགས་དང་སྦྱར་བས་ལོ་རྒྱུས་མ་དག་པ་མ་གཏོགས་འགར་དམ་པ་ཆོས་སྡིངས་པ་ཡིན་པར་མངོན་ཏེ།