།ཞེས་ཡུལ་ཉི་ཤུ་རྩ་བཞིའི་ཡ་གྱལ་དུ་གསུངས་ཤིང་། བོད་ཉིད་ཀྱི་ནང་གསེས་སུའང་རྡོ་རྗེའི་གནས་ཆེན་པོ་རྣམས་ཅི་རིགས་པར་ཚང་བ་ཡིན་ཏེ་གྲུབ་པའི་རྣལ་འབྱོར་གྱི་དབང་ཕྱུག་ཆེན་པོ་རྣམས་ཀྱིས་ནང་གི་རྟེན་འབྲེལ་ཁྱད་པར་བ་རྣམས་བསྒྲིགས་པའི་ཡུལ་གྱི་གནད་གསང་ཐམས་ཅད་མ་ཚང་བ་མེད་པར་ཡོད་པའི་ཕྱིར་རོ། །དེ་ལྟ་བུའི་ཡོན་ཏན་དང་ལྡན་པའི་བསིལ་ལྡན་གྱི་ལྗོངས་སམ། ལྷ་མོ་དྲི་མ་མེད་པའི་འོད་ལུང་བསྟན་པའི་མདོ་ལས་གདོང་དམར་ཅན་གྱི་ཡུལ་དུ་གསུངས་པ་འདི་ཉིད་ལ་བོད་དང་བོད་ཆེན་པོ་ཞེས་གཉིས་སུ་གྲགས་པ་ལས། བོད་ཆེན་པོའི་ལྗོངས་འདི་ནི་བོད་སྤྱིའི་འདྲ་དཔེ་སྟོད་དུ་མངའ་རིས་སྐོར་གསུམ་རྫིང་ལྟ་བུ་དང་། །བར་དུ་དབུས་གཙང་རུ་བཞི་ཡུར་བ་ལྟ་བུ་དང་། སྨད་དུ་མདོ་ཁམས་སྒང་དྲུག་ཞིང་ལྟ་བུའི་ཚུལ་དུ་བཤད་པའི་ཕྱི་མ་ཡིན་ཞིང་། དེ་ལས་མདོ་ཁམས་སྨད་དུ་གཏོགས་པའི་སའི་ཆ་གླིང་གི་ཡུལ་ཞེས་བྱ་བ་འདི་ནི་སྒང་དྲུག་ལས་ཟལ་མོ་སྒང་དུ་གྲགས་པ་སྟེ། ཆུ་བོ་ཆེན་པོ་བཞི་ལས་འབྲི་དང་ཤར་ཟླའི་ཆུ་ཀླུང་ཆེན་པོ་གཉིས་ཀྱི་བར་དུ་ཆུད་པ། བདེ་གཤེགས་ཕག་མོ་གྲུ་པ་དང་། ཀཐོག་པ་དམ་པའི་མཚན་ཅན་དང་། གྲུབ་ཆེན་གསལ་སྟོང་ཤོ་སྒོམ་དང་། གྲུབ་པའི་དབང་ཕྱུག་ཀརྨ་པཀྵི་དང་། རྒྱལ་བའི་སྲས་པོ་སྤོམ་བྲག་པ་ལ་སོགས་པ་གྲུབ་པ་བརྙེས་པའི་རྡོ་རྗེ་སློབ་དཔོན་མང་པོ་བསམ་བཞིན་དུ་སྲིད་པ་ཉེ་བར་བཟུང་ཞིང་། དེ་དག་ལ་སོགས་པ་མཁས་ཤིང་གྲུབ་པའི་རྒྱལ་བའི་སྲས་པོ་མང་པོས་ཞབས་ཀྱིས་བཅགས་ཤིང་བྱིན་གྱིས་བརླབས་པས་སྐྱེ་དགུ་རྣམས་རང་བཞིན་གྱིས་དགེ་བ་ཅན་དུ་གནས་པའི་ཡུལ། སློབ་དཔོན་པདྨ་སཾ་བྷ་ཝ་ལ་སོགས་པའི་སྤྱན་སྔར་དམ་མནོས་པའི་འབྱུང་པོ་ཆེན་པོ་དཀར་ཕྱོགས་ལ་དགའ་བ་རྣམས་ཀྱིས་ཡོངས་སུ་སྲུང་ཞིང་བདེ་བར་གཤེགས་པའི་བསྟན་པ་གཙོ་བོར་སྒྲུབ་པ་ཉམས་ལེན་གྱི་སྒོ་ནས་ཆེས་ཤིན་ཏུ་གསལ་བའི་ཕྱོགས། བསྔགས་པ་དུ་མས་བསྔགས་པར་འོས་པ་འདི་ཉིད་དོ། །དེ་ལས་ཀྱང་ལེགས་བྱས་རྒྱ་ཆེན་པོ་འདི་མངོན་པར་འདུ་བྱེད་པའི་ཡུལ་དངོས་ནི་གཡས་རི་གཡུ་འབྲུག་འགྱིང་བ་ལྟ་བུ། གཡོན་རི་སེང་གེ་གནམ་དུ་འཕྱོ་བ་ལྟ་བུ། རྒྱབ་རི་ཤེལ་གྱི་མཆོད་རྟེན་ལྟ་བུ། མདུན་རི་གླང་པོ་ཆེ་འདུད་པ་ལྟ་བུ།