དྲུང་ཡིག་པས་བཀོད་པའི་ཡི་གེ་དེ་ཉིད་དང་བསྟུན་ན་སྤོ་བོ་ཕུ་ལུང་དགོན་པ་སོགས་དང་སྦྱར་བས་ལོ་རྒྱུས་མ་དག་པ་མ་གཏོགས་འགར་དམ་པ་ཆོས་སྡིངས་པ་ཡིན་པར་མངོན་ཏེ། དེ་ནི་སིངྷ་ལའི་སློབ་དཔོན་ཨཱརྱ་དེ་ཝའི་རྣམ་འཕྲུལ་དུ་གྲགས། ཡབ་མེས་རྣམས་རྡོ་རྗེ་འཇིགས་བྱེད་ཀྱི་རྣལ་འབྱོར་པ་ཡིན་པས་སྐུ་ཆུང་ངུའི་དུས་ནས་འཇིགས་བྱེད་ལ་ཐུགས་དམ་མཛད། འབྲི་ཁུང་དུ་བྱོན་ནས་འཇིག་རྟེན་གསུམ་གྱི་མགོན་པོ་བརྟེན་ཏེ་གྲུབ་པའི་དབང་ཕྱུག་ཆེན་པོར་གྱུར། ཙ་རིར་བྱོན་ཏེ་གསང་སྔགས་ཀྱི་སྤྱོད་པ་བསྐྱངས། དྭགས་པོ་འགར་ཕུག་ཏུ་བཞུགས་པའི་ཚེ་བོད་ཀྱི་ལྷ་འདྲེ་ཐམས་ཅད་འདུས་ནས་སྐུ་ལུས་ཟངས་ཐལ་དུ་འགྲོ་བའི་མཚོན་ཆ་མང་པོ་བརྒྱབ་ཀྱང་ཉམ་ང་མེད་པས་ཐམས་ཅད་ཀྱིས་སྐྱབས་སུ་སོང་སྟེ་སྲོག་སྙིང་ཕུལ། ཕྲིན་ལས་མང་པོ་མཛད་ནས་ཕྱིས་སྤོ་བོར་ཕེབས། དེར་ཆོས་ཡེ་མི་དར་བ་ལ་རྫུ་འཕྲུལ་དང་ཐབས་མཁས་ཀྱིས་སྐྱེ་བོ་དད་པར་བྱས་ནས་ཕུ་ལུང་དགོན་པ་རིན་ཆེན་གླིང་གི་གཞི་བཏིང་ནས་ཞི་བར་གཤེགས། དེ་ནས་ཉིད་ཀྱི་དབོན་པོ་ཨུ་རྒྱན་ལ་སོགས་པ་ཁམས་ནས་འོངས་ཏེ་དེའི་འཕྲོ་བསྐྱངས། དེ་ལས་དབོན་རྒྱུད་རིམ་བྱུང་བ་ཕུ་ལུང་སྡེ་པ་ཐོག་ཀ་བར་གྲགས་ཏེ་དུས་ཕྱིས་ཀྱི་བར་དུ་ཡོད་དོ། །འགར་ཆེན་ཡེ་ཤེས་བཟང་པོས་སླང་མདོ་དྲུག་གིས་འཆི་བདག་གིར་མཛད་དེ། དེའི་སྲས་གཉིས་ཀྱི་བསོད་ནམས་རིན་ཆེན་གྱིས་འགྲོ་མགོན་ཆོས་རྒྱལ་འཕགས་པའི་ཞབས་པད་ས་བརྟེན་ནས་གསོལ་དཔོན་གྱི་ལས་ཀ་བཟུང་། གོང་མ་སེ་ཆེན་གན་གྱིས་དམག་དང་འཇའ་ས་སོགས་བྱིན་ཏེ་ཆེན་པོའི་གོ་སར་དབང་བསྐུར། དེ་ནས་སྐུ་ཚེའི་སྨད་ལ་ས་དམར་ཡང་དགོན་དུ་ཚོགས་པ་སྟོང་ཕྲག་ཙམ་བསྐྱངས། དེའི་དབོན་པོ་རྔུ་རྒུ་རུ་ལ་སྲས་དགུ་བྱུང་བའི་ནང་ནས་སྟོང་དཔོན་ཟླ་བ་བཟང་པོ་ཞེས་པ་ལ་གོང་མ་མཆོད་ཡོན་གྱིས་ས་དམར་སྟོང་དཔོན་གྱི་ལས་ཀ་གནང་བས་མངོན་པར་མཐོ་བ་བྱུང་། དེའི་སྲས་གཉིས་ལས་རྡུ་རྒྱལ་བ་བཟང་པོའི་སྲས་པདྨ་བསྟན་སྲུང་། དེའི་སྲས་དཀར་ཆེན་བྱང་ཆུབ་འབུམ། དེའི་སྲས་རྡུ་ཆོས་རྡོར་བ་ནི་གསང་ཆེན་རྙིང་མའི་གྲུབ་ཐོབ་ཆེན་པོར་གྱུར། དེའི་མཆེད་ཡོ་དགེ་འདུན་རྒྱལ་མཚན་གྱི་སྲས་མགོན་པོ་གཟུངས་སོགས་ལས་བརྒྱུད་དེ་དེང་སང་གི་བར་དུ་ས་དམར་ཕྱོགས་འདིར་རྒྱུན་མ་ཆད་པར་ཡོད་དོ། །