གཟབས་མ་འདྲི་བའི་ཡི་གེ་པ་སྔ་སོར་བོད་ཆེན་གྱི་ལྗོངས་འདིར་ཧ་ཅང་མཁས་པ་མེད་མོད་ཀྱི། ལེགས་བྱས་རྒྱ་ཆེན་པོ་འདིའི་དབུ་བཙུགས་པ་ཙམ་ནས་མ་བོས་པར་ཡང་བསོད་ནམས་ཆེན་པོའི་མགྲོན་དུ་འོངས་པའི་ཡི་གེ་པ་མང་པོ་འདུས་པ་ལ་སོ་སོའི་ཡོ་བྱད་ཐམས་ཅད་བླ་ནས་སྦྱར་ཏེ། འཇམ་དབྱངས་སྤྲུལ་པ་ཐོན་མི་སཾ་བྷོ་ཊའི་རྣམ་དཔྱོད་ཀྱི་ཟློས་གར་ལས། བོད་ཡུལ་གྱི་ཡི་གེ་གསར་དུ་བྱོན་པ་ནས་བརྩམས་ཏེ། ཕྱིས་ཁྱུང་པོ་གཡུ་ཁྲིས་ཐིག་ཁོངས་ནས་དྲངས་ཤིང་རོང་པོས་ལྷན་ཐབས་མཛད་པའི་རྒྱུན་ཇི་ལྟ་བ་བཞིན་དུ་མ་ཆོས་ཉི་ཤུ་རྩ་གཅིག །བུ་ཆོས་བཅུ་དྲུག །སྤྱི་ཆོས་གསུམ་བཅས་ཆོས་བཞི་བཅུའི་མཚན་ཉིད་ཚང་བར་འབད་པ་ཆེན་པོས་སྦྱོང་བརྡར་བྱེད་དུ་འཇུག་པ་གནང་ནས། དེ་དག་དུས་ཐུང་དུར་བྱངས་ཤིང་མཁས་པར་གྱུར་པ།དཔོན་ཡིག་པ་དྲུག་ཅུ་ལྷག་ཙམ་གྱིས་ལྷུན་གྲུབ་སྟེང་གི་བླ་བྲང་ཆེན་པོའི་ནང་དུ་པར་ཡིག་འབྲི་བའི་གྲྭ་བཙུགས་པ་དང་། དེ་བཞིན་དུ་པར་བརྐོས་པ་བཞི་བརྒྱ་ལྷག་དང་། ཞུས་དག་པ་བཅུ་སྐོར། ཤིང་བཟོ་བ། ཤོག་བུ་མཁན་པོ།སྣག་ལས་པ། ཤོག་ལས་པ་སོགས་ལས་ཚན་ཤིན་ཏུ་མང་བ་བར་མ་ཆད་དུ་བསྟེན་པའི་རིམ་པས་ཞུས་དག་ཟིན་པ་དང་པར་ཡིག་འདྲི། དེ་ཟིན་ནས་པར་ཡིག་ལ་ཡིག་མཁན་སོ་སོས་བར་ཞུས་ལན་གཉིས་དང་། ཞུས་དག་མཁན་པོ་རྣམས་ཀྱིས་ལན་གཉིས་ཏེ་བཞི་བཞིར་ཞུས་དག་བྱེད། དེ་ཟིན་ནས་པར་བརྐོས་པ་རྣམས་ལ་སོ་སོར་སྤྲོད་པ་སོགས་ལས་སྤྱིའི་དོ་དམ་པ་གྲུབ་དབང་བྱང་ཆུབ་གླིང་པའི་དབོན་རྒྱུད་དུ་སྐྱེས་ཤིང་བརྡ་དག་པར་བྱེད་པའི་སྦྱོར་བ་སོགས་ལ་མཁས་པས་གསུང་རབ་ལ་ལྟ་བའི་མིག་གྲུངས་པོར་གྱུར་པ་དགེ་སློང་ཀརྨ་དཔལ་གྲུབ་དང་། མི་དབང་ཉིད་ཀྱི་ཞབས་ཕྱི་ནང་འཁོར་བ་ཡིག་རྩིས་དང་སྒྱུ་རྩལ་སོགས་ལ་བྱང་ཞིང་གཞུང་དྲང་ལ་ཚུགས་ཐུབ་པ། ཁོག་ཡངས་ལ་དཀྱེལ་ཆེ་བ། ཕྱི་རྒྱ་བསྲུངས་ནས་ཞིབ་ཏིག་མི་འཆོར་བ་སོགས་ཡ་རབས་ཀྱི་ཡོན་ཏན་དང་ལྡན་པ་དྲུང་ཡིག་ཚེ་རིང་འཕེལ་གྱིས་བྱས་ཏེ་ས་བྱ་ནས་ཆུ་གླང་བར་བགྲང་བྱ་ལྔའི་ངོ་མཐོང་བར་བརྩོན་པ་ཆེན་པོས་བསྒྲུབས་པ་ཡིན་ནོ།