སྒྲ་སྦྱོར་བམ་པོ་གཉིས་པ་དང་། ཐོན་མིའི་སུམ་རྟགས་དང་། སྨྲ་སྒོ་རྩ་འགྲེལ་དང་། གཞན་ཡང་མཁས་པ་དག་གིས་བརྩམས་པའི་བརྡ་ལེགས་པར་སྦྱོར་བའི་བསྟན་བཅོས་རྣམས་དང་བསྟུན་ཏེ།སྔོན་རྗེས་ཀྱི་འཇུག་པ་གཉིས། དེ་དགོས་པ་ཅིའི་ཕྱིར་ཚུལ་ཇི་ལྟར་འཇུག་པ། དེ་སོ་སོའི་རྟགས་ཀྱི་དབྱེ་བ་དང་དུས་གསུམ་གྱི་སྒྲུབ་པ་ཐ་དད་པ། དེ་ལའང་སྤྱིར་བཏང་དམིགས་བསལ། ཚིག་ཕྱི་མ་དང་སྦྲེལ་བའི་མཚམས་སྦྱོར། རྣམ་དབྱེ་དང་ཚིག་ཕྲད་ལ་སོགས་པ་ཚུལ་ཇི་ལྟ་བ་བཞིན་དུ་བགྱིས་ཏེ། ཁོ་བོས་ངག་བཀོད་བྱས་པ་བཞིན་དུ་བློ་གསལ་གཞན་དག་གིས་ལན་མང་དུ་བསྒྲགས་ནས་ཞུས་དག་ལེགས་པར་བགྱིས་ཤིང་། དོགས་གནས་ཆེ་བ་རྣམས་དཔྱིས་ཕྱིན་པར་རང་ཉིད་ཀྱིས་གཏན་ལ་ཕབ་སྟེ། གསུང་རབ་བཞུགས་ཚོགས་ཆེས་པ་དང་། ཞུས་དག་མཁན་པོ་བློ་གྲོས་དམན་པས་ཕྱེ་མ་ལེབ་ཀྱིས་ནམ་མཁའི་མཐའ་ཉུལ་བ་ལྟ་བུར་གྱུར་པའི་ཕྱིར་མ་རྟོགས་པ་དང་། ལོག་པར་རྟོག་པ་གཏན་མེད་དོ་ཞེས་སྨྲ་བར་མི་ནུས་ཀྱང་། སྔོན་ཙཱི་ནའི་ཡུལ་དུ་གོང་མ་ཏཱ་མིན་གཡུང་ལོ་ཆེན་པོས་བཀའ་འགྱུར་རོ་ཅོག་གི་པར་བཞེངས་པ་དང་། འདི་ཉིད་ཀྱི་མ་ཕྱི་ས་ཐམ་རྒྱལ་པོས་བཞེངས་པ་འདི་སོགས་ལས་ཁྱད་པར་དུ་འཕགས་ཤིང་དཔྱོད་ལྡན་གྱིས་ཡིད་རྟོན་པའི་གནས་སུ་འོས་པར་སེམས་སོ། །གསུམ་པ་བཞེངས་ཚུལ་དངོས་ནི་པར་ཡིག་འབྲི་བའི་ཡོ་བྱད་ཀྱི་ཤོག་བུ་དང་སྣག་ཚ་ལ་སོགས་པ་དང་། པར་གཞིའི་ཤིང་རྣམས་དང་བཅས་པ་ཐམས་ཅད་ལ་དབང་ཡོད་ཀྱིས་མི་སེར་བསྐུལ་ཅིང་ཁྲལ་ལེན་པ་སོགས་མི་མཛད་པ་སྨོས་ཅི་དགོས། ཀོ་རིན་ཐང་ཡུལ་དུས་ལ་དཔག་པ་ལས་ལྷག་པར་སྩལ་ཏེ། ཐམས་ཅད་རྒྱུ་དག་ཅིང་ཕུན་སུམ་ཚོགས་པར་མཛད་ནས། གཟབས་མ་འདྲི་བའི་ཡི་གེ་པ་སྔ་སོར་བོད་ཆེན་གྱི་ལྗོངས་འདིར་ཧ་ཅང་མཁས་པ་མེད་མོད་ཀྱི།