ཕྱིས་ཀྱི་མཁས་པ་དག་གིས་གཞུང་དེ་གཉིས་རང་ལ་བརྟེན་པ་དང་། ཡིག་རྙིང་རྣམས་དང་ཡང་སྒོ་བསྟུན་ནས་བརྡ་དག་གི་བསྟན་བཅོས་རྣམས་བརྩམས་པ་ཡིན་མོད། འོན་ཀྱང་རྩ་བར་ཡན་ལག་མ་ཚང་བའི་རྒྱུས་དོན་འགའ་ཞིག་མི་གསལ་བ་དང་། མ་རྫོགས་པ་རྣམས་ལ་རང་སྟོབས་ཀྱིས་དཔྱད་པའི་ཚུལ་མི་མཚུངས་པ་སྣ་ཚོགས་བྱུང་བའི་རྒྱུ་མཚན་གྱིས་ཡིན་པས། འདིར་ཡང་མཐའ་གཅིག་ཏུ་ངེས་པ་མ་བྱས་པར། འདུལ་མདོ་རྒྱུད་གསུམ་སོ་སོར་སྡེབ་སྦྱོར་གྱི་སྲོལ་མཚུངས་པར་བྱས།ནང་གསེས་སུ་སྡེབ་སྦྱོར་ཅུང་མི་འདྲ་བ་ཕྱོགས་གང་བྱས་ཀྱང་སྐྱོན་དུ་མི་འགྱུར་སྙམ་པ་རྣམས་འདྲ་མིན་དེ་ཀ་སོར་བཞག་ལས། གཅིག་འགྲོས་ཁོ་ན་མ་བྱས་ཤིང་། མ་མྱ་དང་ས་སྩོགས་དང་རལ་གྲི་ལ་རལ་གྱི་སོགས། ཡུལ་སྐད་ལ་ཤོར་བར་གྲགས་པ་རྣམས་མཁས་པ་དག་གིས་ཀྱང་མི་བཞེད་པས་དོར། ད་དྲག་ནི་སུམ་རྟགས་ཀྱི་དགོངས་པར་འབྱོར་མོད་ཀྱི་ཕྱིས་བློ་ལྡན་ཤེས་རབ་སོགས་ཀྱིས་ཡི་གེ་ཟོར་ཡང་བའི་ཆེད་དུ་བསྡུས་པ་བཞིན་དུ་བྱས་ཏེ།དབུའི་རྒྱ་སྐད་རྣམས་ལེགས་སྦྱར་ཁོ་ན་ལྟར་བཅོས་པ་དང་། གཞི་ཟུར་ཆག་ཅན་འགའ་ཞིག་རང་མལ་དུ་བཞག །ཡུལ་དང་མེ་ཏོག་དང་སྲོག་ཆགས་ལ་སོགས་པའི་མིང་ལེགས་སྦྱར་དུ་ཡོད་པ་རྣམས་དང་། མདོ་ཕྱོགས་ལ་སྔོན་གྱི་ལོ་ཙཱ་བ་དག་གིས་བོད་ཀྱིས་ཇི་བཞིན་ཀློག་བདེ་བའི་ཁྱད་ཀྱིས། གོ་ཏ་མ་ལ་འགོའུ་ཏ་མ་སོགས་བྲིས་པ་ལྟ་བུ་དང་། ལེགས་སྦྱར་ཉིད་དང་མཐུན་པ་སོགས་ཅི་རིགས་པར་སྣང་བས་དེ་ག་ལྟར་སོར་བཞག་ལ། མི་བཅོས་སུ་མི་རུང་བ་འགའ་ཞིག་བཅོས། སྔགས་སྐོར་རྣམས་ལ་དཔྱད་བཟོད་པ་དག་ལེགས་སྦྱར་ཉིད་དང་སྒོ་བསྟུན་ནས་བཅོས་པ་སོགས་མདོར་ན། བཀས་བཅད་བྱེ་བྲག་ཏུ་རྟོགས་བྱེད་ཆེན་མོ་དང་། སྒྲ་སྦྱོར་བམ་པོ་གཉིས་པ་དང་།