ལྷོ་རྫོང་བཀའ་འགྱུར་ལ་བརྟེན་ནས་དག་པར་བཅོས། དེར་མི་བཞུགས་པའི་མདོ་རྒྱུད་ཚད་ལྡན་འགའ་ཞིག་ལྷོ་རྫོང་བཀའ་འགྱུར་དང་གཞན་ལས་རྙེད་པའང་བསབས། འདུལ་བ་ཕྲན་ཚེགས་སོགས་ལ་ཆད་ངེས་པ་འགའ་ཞིག་འགྲེལ་པ་དང་བསྟུན་ནས་ཐེམ་སྤང་མ་བཞིན་བཅུག །ཁྱད་པར་སྔགས་ཀྱི་སྐོར་ལ། ངན་སོང་སྦྱོང་རྒྱུད་བརྟག་པ་ཕྱོགས་གཅིག་པ་དང་། གསང་བ་འདུས་པ་དང་། དཔལ་གཏུམ་པོ་ཁྲོ་བོའི་རྒྱུད་དང་། ཀྱེ་རྡོར་བརྟག་གཉིས་དང་། བདེ་མཆོག་ཉུང་ངུ་དང་། བདེ་མཆོག་སྡོམ་འབྱུང་རྣམས་རྒྱ་དཔེའི་སྟེང་ནས་ཞུས་དག་བྱས་ཤིང་། རྒྱ་དཔེའི་ཁུངས་མི་གཅིག་པའི་ཚིག་ཁྱད་བྱུང་བ་རྣམས་སོ་སོའི་རྒྱ་འགྲེལ་ལ་ལེགས་པར་བརྟགས་ནས་གཏན་ལ་ཕབ། གཞན་རྒྱ་འགྲེལ་ཡོད་རིགས་ཕལ་ཆེར་ལ་ཐེ་ཚོམ་གང་བྱུང་དུ་འགྲེལ་པ་ཉིད་ཀྱིས་བཅོས། གསང་སྔགས་རྣམས་ཀྱང་སྔགས་བཏུ་ཡོད་པའི་རིགས་ལ་དེ་ཉིད་དང་བསྟུན། མེད་པ་རྣམས་ལའང་མཐའ་གཅིག་ཏུ་སཾ་སྐྲྀ་ཏའི་སྐད་དུ་ངོས་བཟུང་བྱར་མི་བཏུབ་པ་འགྲོ་ལྡིང་བའི་སྐད་དང་། པི་ཤཱ་ཙིའི་སྐད་དང་། ཟུར་ཆག་དང་། གསང་བའི་བརྡའི་སྐད་ལ་སོགས་པ་ཅན་རྣམས་ནི་དཔེ་མཐུན་ཤས་ཆེ་བ་གཙོ་བོར་བཟུང་། ལེགས་སྦྱར་དངོས་ཡིན་པ་རྣམས་ལའང་སྒྲའི་གཞུང་རྣམས་དང་བསྟུན་པར་རང་ཉིད་ཀྱི་བློས་དཔོག་པ་རྣམས་དེ་བཞིན་དུ་བགྱིས། བློས་མི་དཔོག་པ་རྣམས་རང་སོར་བཞག །ཡིག་སྡེབ་ཀྱི་སྦྱོར་བའང་སྔོན་གྱི་དཔེ་རྒྱུན་རྣམས་སུ་འདྲ་མིན་མང་དུ་བྱུང་བ།དེའང་དང་པོ་ཐུ་མི་སཾ་བྷོ་ཊས་བོད་ཀྱི་སྐད་ལ་ཉེ་བར་མཁོ་བའི་སྒྲའི་བསྟན་བཅོས་བརྒྱད་མཛད་པར་གྲགས་པ། ཕྱི་དར་གྱི་དུས་སུ་སུམ་རྟགས་གཉིས་ལས་གཞན་མི་བཞུགས་ཤིང་། ཕྱིས་ཀྱི་མཁས་པ་དག་གིས་གཞུང་དེ་གཉིས་རང་ལ་བརྟེན་པ་དང་།