གཞན་ཡང་དཔེ་རྒྱུན་རྙིང་མ་ཁུངས་བཙུན་འགའ་ཞིག་གོ་བསྡུར་ནས། མཁས་བཙུན་དམ་པ་བཀྲ་ཤིས་དབང་ཕྱུག་གིས་ཚིག་ཟུར་ཕྲ་མོའི་སྣོན་འབྲིད་ཁ་ཤས་མཛད་པ་དང་། ཡང་རྒྱལ་རྩེ་ཆོས་རྒྱལ་གྱིས་སྣར་ཐང་བཀའ་འགྱུར་ལ་མ་ཕྱི་བྱས་ཏེ་བཞེངས་པའི་ཚེ། སྙིགས་དུས་ཀྱི་ཐམས་ཅད་མཁྱེན་པ་བུ་སྟོན་རིན་པོ་ཆེས། །དཔྱད་པ་གསུམ་གྱིས་གཏན་ལ་ཕབ་ཅིང་ཞུས་དག་མཛད་ནས་དཀར་ཆག་ཀྱང་བསྒྲིགས། དེ་ལ་མ་ཕྱི་བྱས་པའི་རྒྱུན་ལས། འཕགས་མཆོག་འཇིག་རྟེན་དབང་ཕྱུག་མིའི་ཟོལ་འཛིན་ངག་དབང་བློ་བཟང་རྒྱ་མཚོའི་ཞལ་སྔ་ནས་དཀའ་སྩལ་པ་བཞིན། སའི་ཚངས་པ་བསོད་ནམས་རབ་བརྟན་གྱིས། དཔལ་ཐང་པོ་ཆེའི་གཙུག་ལག་ཁང་དུ་བཞེངས་པའི་བཀའ་འགྱུར་སྐྱ་པོད་ཤིན་ཏུ་དངོས་གཙང་བ། བོད་ཆེན་ལྗོངས་ཀྱི་སྐྱེ་དགུ་རྣམས་བསོད་ནམས་མངོན་པར་འཕེལ་བའི་སླད་དང་། ཕྱི་མོ་ཕུན་སུམ་ཚོགས་པས་གསུང་རབ་རྣམས་ལ་ལོག་པར་བརྟགས་པའི་རྙོག་མ་བགྲུང་བར་བགྱིད་པའི་སླད་དུ་མདོ་སྟོད་ལྷོ་རྫོང་གི་ཕོ་བྲང་དུ་བཞུགས་སུ་བཅུག་པ་སྤྱན་དྲངས་ཏེ། དེ་དང་ཡང་སྒོ་བསྟུན་ནས་རིག་པར་སྨྲ་བའི་བློ་གསལ་དུ་མས་འབད་པ་ཆེན་པོས་མི་བཅོས་སུ་མི་རུང་བ་འགའ་ཞིག་བཅོས་ཏེ་དག་པར་བགྱིས་པའི་ཐོག །ཁོ་བོ་ལའང་མིའི་དབང་པོའི་བཀའ་ནན་གསེར་སྦྲམ་ལྟར་ལྕི་བ་སྩལ་བས། ཐུན་མོང་ལྕགས་ཁྱི་ལོ། དབོ་ཟླ་བའི་དཀར་ཕྱོགས་ཀྱི་རྒྱལ་བ་དང་པོའི་ཚེས་ནས་བརྩམས་ཏེ།སླར་ཡང་ཞུས་དག་གི་ཁུར་བླངས་པ་ཡིན་ནོ། །དེའང་སྤྱིར་འཇིང་པར་གྱི་བཀའ་འགྱུར་འདི་ཉིད། དམ་པ་མང་པོའི་དཔྱད་པ་ཐེམས་པ་གོང་སྨོས་ལྟར་གྱིས་གཞི་ཤིན་ཏུ་དག་པར་འདུག་ནའང་། པར་དུ་འཁོད་སྐབས་ཐམས་ཅད་མཁྱེན་པ་ཆོས་ཀྱི་དབང་ཕྱུག་གིས་ཐར་ཆགས་སུ་ལྗགས་ཞུས་མ་གྲུབ་པ་དང་། །ཆོས་གཟབས་ཆེས་པས། དོ་དམ་པ་རྣམས་ཀྱི་དཔྱོད་པས་མ་ཁྱབ་པའི་ཤོག་བུ་གོང་འོག་འཁྲུགས་པ་དང་། ཆད་ལྷག་ཕྲན་བུ་སོགས་ཀྱི་སྐྱོན་ཅུང་ཟད་སྣང་བ། ལྷོ་རྫོང་བཀའ་འགྱུར་ལ་བརྟེན་ནས་དག་པར་བཅོས།