སེམས་དཔའ་ཆེན་པོ་ཐམས་ཅད་མཁྱེན་པ་ཉིད་ཀྱི་རྒྱུའི་སྟོབས་ཀྱིས་བརྟན་པ་དགེ་བའི་རྩ་བ་ཚད་མེད་པའི་མཐུ་བོ་ཆེ་ཆེན་པོའི་སྟོབས་ལྟར་ཁྱད་པར་དུ་འཕགས་པ་སྟོབས་ཀྱི་ཤུགས་ཆེན་པོ་རབ་ཏུ་ཐོབ་པ་མ་གཏོགས་པར་ཉན་ཐོས་དང་རང་སངས་རྒྱས་སྟོབས་པོ་ཆེ་ཐམས་ཅད་ཀྱིས་ཀྱང་ཡོངས་སུ་གཟུང་བར་མི་ནུས་སོ། །རིགས་ཀྱི་བུ་འདི་ལྟ་སྟེ་དཔེར་ན། མཚོན་ཆ་ཐམས་ཅད་ཀྱིས་མི་ཚུགས་པ་གང་དུ་ཡང་རྡོ་རྗེས་མི་ཚུགས་པ་མེད་དེ་ཁ་མི་འབབ་བོ། །དེ་བཞིན་དུ་སེམས་ཅན་ཡོངས་སུ་སྨིན་པར་བྱ་བ་དང་། གདུལ་བའམ། དུས་གསུམ་གྱི་བསྐལ་པར་སྤྱད་པའི་སྡུག་བསྔལ་དང་འགྲོགས་པར་བྱ་བ་གང་དུ་ཉན་ཐོས་དང་རང་སངས་རྒྱས་ཀྱི་སྨོན་ལམ་དང་ཡེ་ཤེས་ཀྱི་མཚོན་ཆས་རྡུགས་པ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་རྡོ་རྗེའི་མཚོན་ཆ་ཆེན་པོ་ཐོགས་པའི་བྱང་ཆུབ་སེམས་དཔའ་ཡོངས་སུ་སྐྱོ་བའི་ཡིད་མེད་པས་ནི་མི་བཟོད་པ་མེད་དེ། ཁ་མི་འབབ་བོ། །རིགས་ཀྱི་བུ་འདི་ལྟ་སྟེ་དཔེར་ན། རྡོ་རྗེ་ནི་གཞན་དུ་ན་རྡོ་རྗེ་ཉིད་ལས་གྱུར་པའི་གཞི་མ་གཏོགས་པར་སའི་ཕྱོགས་གང་གིས་ཀྱང་གཟུང་བར་མི་ནུས་སོ། །དེ་བཞིན་དུ་བྱང་ཆུབ་སེམས་དཔའི་འབྱུང་བའི་སྨོན་ལམ་གྱི་ཚོགས་རྡོ་རྗེ་ནི་གཞན་དུ་ན་ལྷག་པའི་བསམ་པས་བྱང་ཆུབ་ཏུ་སེམས་བསྐྱེད་པ་རྡོ་རྗེ་བརྟན་པའི་ས་གཞི་མ་གཏོགས་པར། ཉན་ཐོས་དང་། རང་སངས་རྒྱས་ཐམས་ཅད་ཀྱིས་གཟུང་བར་མི་ནུས་སོ། །རིགས་ཀྱི་བུ་འདི་ལྟ་སྟེ་དཔེར་ན། རྒྱ་མཚོ་ཆེན་པོའི་སྣོད་རྡོ་རྗེའི་གཞི་སྲ་ཞིང་གསེབ་མེད་པས་ཆུ་གསང་དུ་འཛག་པར་མི་འགྱུར་རོ། །དེ་བཞིན་དུ་བྱང་ཆུབ་སེམས་དཔའི་དགེ་བའི་རྩ་བ་བྱང་ཆུབ་ཀྱི་སེམས་རྡོ་རྗེ་གསེབ་མེད་པ་ཡོངས་སུ་བསྔོས་པའི་གཞི་ཅན་ལ་གནས་པ་ཡང་སྲིད་པར་སྐྱེ་བ་ཐམས་ཅད་ཀྱིས་ཟད་པར་མི་འགྱུར་རོ། །རིགས་ཀྱི་བུ་འདི་ལྟ་སྟེ་དཔེར་ན། རྡོ་རྗེའི་གཞི་ལ་བརྟེན་པའི་ས་ཆེན་པོ་ནི་འཇིག་པར་མི་འགྱུར་རོ། །དམའ་བར་མི་འགྱུར་རོ། །དེ་བཞིན་དུ་བྱང་ཆུབ་ཏུ་སེམས་བསྐྱེད་པ་རྡོ་རྗེ་སྲ་བའི་གཞི་ལ་བརྟེན་པའི་བྱང་ཆུབ་སེམས་དཔའི་སྨོན་ལམ་རྣམས་ཀྱང་ཁམས་གསུམ་ཐམས་ཅད་དུ་འཇིག་པར་མི་འགྱུར་དམའ་བར་མི་འགྱུར་རོ། །རིགས་ཀྱི་བུ་འདི་ལྟ་སྟེ་དཔེར་ན། རྡོ་རྗེ་ནི་ཆུས་བངས་པའམ་རུལ་བར་མི་འགྱུར་རོ། །དེ་བཞིན་དུ་བྱང་ཆུབ་ཏུ་སེམས་བསྐྱེད་པ་རྡོ་རྗེ་ཡང་ལས་དང་ཉོན་མོངས་པ་ཐམས་ཅད་ཀྱི་ཆུར་བསྐལ་པར་གནས་ཀྱང་རུལ་བར་མི་འགྱུར་བངས་པར་མི་འགྱུར་རོ།