།དེ་བཞིན་དུ་བྱང་ཆུབ་ཏུ་སེམས་བསྐྱེད་པ་རྡོ་རྗེ་ཡང་ལས་དང་ཉོན་མོངས་པ་ཐམས་ཅད་ཀྱི་ཆུར་བསྐལ་པར་གནས་ཀྱང་རུལ་བར་མི་འགྱུར་བངས་པར་མི་འགྱུར་རོ། །རིགས་ཀྱི་བུ་འདི་ལྟ་སྟེ་དཔེར་ན། རྡོ་རྗེ་ནི་མེ་ཐམས་ཅད་ཀྱི་དྲོད་ཀྱིས་ཀྱང་ཚིག་པར་མི་འགྱུར་ཡོངས་སུ་གདུང་བར་ཡང་མི་འགྱུར་རོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་རྡོ་རྗེ་ཡང་འཁོར་བ་ཐམས་ཅད་ཀྱི་སྡུག་བསྔལ་གྱི་མྱེའི་དྲོད་ཐམས་ཅད་ཀྱིས་མི་ཚིག་གོ །ཉོན་མོངས་པ་ཐམས་ཅད་ཀྱི་མྱེའི་གདུང་བས་གདུང་བར་མི་འགྱུར་རོ། །རིགས་ཀྱི་བུ་འདི་ལྟ་སྟེ་དཔེར་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྙིང་པོ་བྱང་ཆུབ་ལ་བཞུགས་ཤིང་། བདུད་རྒོལ་ཏུ་གཞུག་པ་མཛད་པ་དང་། ཐམས་ཅད་མཁྱེན་པ་ཉིད་དུ་མངོན་པར་རྫོགས་པར་འཚང་རྒྱ་བ་རྣམས་ཀྱི་གདན་ནི་གཞན་དུ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་རྡོ་རྗེའི་ལྟེ་བའི་སའི་གཞི་མ་གཏོགས་པར་སའི་ཕྱོགས་གཞན་གྱིས་གཟུང་བར་མི་ནུས་སོ། །དེ་བཞིན་དུ་བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨོན་ལམ་འདེབས་པ་དང་སྤྱད་པ་སྤྱོད་པ་དང་། ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་པ་དང་། བཟོད་པ་ལ་འཇུག་པ་དང་ས་ཐོབ་པར་བྱེད་པ་དང་། དགེ་བའི་རྩ་བ་ཡོངས་སུ་རྫོགས་པར་བྱེད་པ་དང་། ལུང་བསྟན་པ་ཡོངས་སུ་ནོད་པ་དང་། བྱང་ཆུབ་སེམས་དཔའི་ལམ་གྱི་ཚོགས་ཐམས་ཅད་ཉེ་བར་སྟོན་པ་དང་། དེ་བཞིན་གཤེགས་པ་ཐམས་ཅད་ལ་མཆོད་པ་བྱེད་པ་དང་། ཆོས་ཀྱི་སྤྲིན་ཆེན་པོ་ཡོངས་སུ་འཛིན་པ་རྣམས་ཀྱི་དགེ་བའི་རྩ་བའི་སྟོབས་དང་ཤུགས་དང་དྲག་ཤུལ་དེ་དག་ཀྱང་གཞན་དུ་ན་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་སྨོན་ལམ་ཐམས་ཅད་ཀྱི་ཡེ་ཤེས་རྡོ་རྗེ་སྲ་བའི་ལྟེ་བ་ཅན་མ་གཏོགས་པར་སེམས་ཅན་གཞན་གྱིས་ཡོངས་སུ་གཟུང་བར་མི་ནུས་སོ། །རིགས་ཀྱི་བུ་དེ་ལྟར་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་ནི་ཡོན་ཏན་དེ་དག་དང་གཞན་ཚད་མེད་པ་ནས། ཡོན་ཏན་གྱི་ཁྱད་པར་བརྗོད་དུ་མེད་པའི་ཡང་བརྗོད་དུ་མེད་པ་དང་ལྡན་པ་སྟེ།