འཁོར་བའི་ཕོངས་པ་ཐམས་ཅད་རྣམ་པར་སེལ་ཏོ། །རིགས་ཀྱི་བུ་འདི་ལྟ་སྟེ་དཔེར་ན། རྡོ་རྗེའི་ཁམས་ནི་ཇི་ཙམ་ཞིག་ཏུ་ཆུང་ཡང་ནོར་བུ་དང་རྡོ་ཐམས་ཅད་གཅོག་པའི་མཚན་ཉིད་དོ། །དེ་བཞིན་དུ་དམིགས་པ་ཇི་ཙམ་དུ་ཆུང་བ་ལ་ཞུགས་ཀྱང་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་རྡོ་རྗེའི་ཁམས་ནི་མི་ཤེས་པ་ཐམས་ཅད་འཇིག་པར་བྱེད་པའི་མཚན་ཉིད་དོ། །རིགས་ཀྱི་བུ་འདི་ལྟ་སྟེ་དཔེར་ན། རྡོ་རྗེ་རིན་པོ་ཆེ་ནི་སྐྱེ་བོ་མ་རབས་ཀྱི་ལག་ཏུ་ཕྱིན་པར་མི་འགྱུར་རོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་རྡོ་རྗེ་རིན་པོ་ཆེ་ཡང་མ་རབས་ཀྱི་བསམ་པ་དང་ལྡན་པ། དགེ་བའི་རྩ་བ་ངན་ངོན་ཅན་གྱི་ལྷ་དང་མིའི་ལག་ཏུ་ཕྱིན་པར་མི་འགྱུར་རོ། །རིགས་ཀྱི་བུ་འདི་ལྟ་སྟེ་དཔེར་ན། རིན་པོ་ཆེ་ཡོངས་སུ་བརྟག་པ་ལ་མི་མཁས་པའི་སྐྱེས་བུ་ནི་རྡོ་རྗེ་རིན་པོ་ཆེའི་ཡོན་ཏན་མི་ཤེས་པས་དེའི་ཡོན་ཏན་ཉམས་སུ་མྱོང་བར་མི་འགྱུར་རོ། །དེ་བཞིན་དུ་ཤེས་རབ་འཆལ་པའི་ངང་ཚུལ་དང་ལྡན་པའི་སྐྱེས་བུ་གང་ཟག་ཀྱང་བྱང་ཆུབ་ཀྱི་སེམས་རྡོ་རྗེ་རིན་པོ་ཆེ་ཆེན་པོའི་ཡོན་ཏན་ལ་མི་མཁས་པས་ཀྱང་དེའི་ཡོན་ཏན་གྱི་ཁྱད་པར་ཉམས་སུ་མྱོང་བར་མི་འགྱུར་རོ། །རིགས་ཀྱི་བུ་འདི་ལྟ་སྟེ་དཔེར་ན། རྡོ་རྗེ་ནི་ཞུ་བར་མི་ནུས་སོ། །དེ་བཞིན་དུ་ཐམས་ཅད་མཁྱེན་པ་ཉིད་ཀྱི་རྒྱུར་གྱུར་པའི་བྱང་ཆུབ་ཏུ་སེམས་བསྐྱེད་པ་རྡོ་རྗེ་ཡང་ཞུ་བར་མི་ནུས་སོ། །རིགས་ཀྱི་བུ་འདི་ལྟ་སྟེ་དཔེར་ན། རྡོ་རྗེའི་ལག་ཅ་ཆེན་པོ་ནི་གཞན་དུ་ན་མཐུ་བོ་ཆེ་ཆེན་པོའི་སྟོབས་ལྟར་ཁྱད་པར་དུ་འཕགས་པའི་མཐུ་སྟོབས་ཀྱི་ཤུགས་དྲག་པོ་མ་གཏོགས་པར་སྟོབས་པོ་ཆེ་ཆེན་པོས་ཀྱང་གཟུང་བར་མི་ནུས་སོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་རྡོ་རྗེའི་ལག་ཅ་ཆེན་པོ་ཡང་གཞན་དུ་ན་བྱང་ཆུབ་སེམས་དཔའ་ཆེན་པོ་ཐམས་ཅད་མཁྱེན་པ་ཉིད་ཀྱི་རྒྱུའི་སྟོབས་ཀྱིས་བརྟན་པ་དགེ་བའི་རྩ་བ་ཚད་མེད་པའི་མཐུ་བོ་ཆེ་ཆེན་པོའི་སྟོབས་ལྟར་ཁྱད་པར་དུ་འཕགས་པ་སྟོབས་ཀྱི་ཤུགས་ཆེན་པོ་རབ་ཏུ་ཐོབ་པ་མ་གཏོགས་པར་ཉན་ཐོས་དང་རང་སངས་རྒྱས་སྟོབས་པོ་ཆེ་ཐམས་ཅད་ཀྱིས་ཀྱང་ཡོངས་སུ་གཟུང་བར་མི་ནུས་སོ།