།དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་དགེ་བའི་རྩ་བའི་མཐར་ཐུག་པའང་མི་དམིགས་མོད་ཀྱི་འཇིག་རྟེན་གྱི་སྐྱེ་གནས་ཐམས་ཅད་དུ་ཡང་ཐམས་ཅད་མཁྱེན་པ་ཉིད་ཀྱི་བསོད་ནམས་དང་ཡེ་ཤེས་དང་མངོན་པར་ཤེས་པའི་མེ་ཏོག་ཤིན་ཏུ་རྒྱས་པ་སྨོན་ལམ་ཆེན་པོའི་དྲ་བར་གྱུར་པ་ཡང་ཡོངས་སུ་སྣང་ངོ་། །རིགས་ཀྱི་བུ་འདི་ལྟ་སྟེ་དཔེར་ན། རྡོ་རྗེ་ནི་སྣོད་ངན་པའི་གཞི་ལ་འདུག་ན་མཛེས་པར་མི་སྣང་ངོ་། །སྣོད་མ་རྡོལ་བ་མ་གཏོགས་པར་སྣོད་རྡོལ་བ་དང་། བུ་ག་ཅན་གྱིས་གཟུང་བར་མི་ནུས་སོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་རྡོ་རྗེ་ཆེན་པོ་ཡང་སེམས་ཅན་མོས་པ་ཞེན་པའི་སྣོད་དང་། སེར་སྣ་ཅན་ནམ་ཚུལ་ཁྲིམས་ངན་པ་ཅན་ནམ་གནོད་སེམས་ཅན་ནམ། ལེ་ལོ་ཅན་ནམ། དྲན་པ་འཁྲུག་པའམ། ཤེས་རབ་འཆལ་བ་ཅན་རྣམས་ལ་མི་མཛེས་ཏེ། །བྱང་ཆུབ་སེམས་དཔའི་ལྷག་པའི་བསམ་པ་རིན་པོ་ཆེའི་སྣོད་མ་གཏོགས་པར་སེམས་ཅན་ལྷག་པའི་བསམ་པ་ལོག་པ་ལ་ཞུགས་པ་བློ་མི་བརྟན་པའི་སྣོད་ཀྱིས་ཀྱང་གཟུང་བར་མི་ནུས་སོ། །རིགས་ཀྱི་བུ་འདི་ལྟ་སྟེ་དཔེར་ན། རྡོ་རྗེ་ནི་རིན་པོ་ཆེ་ཐམས་ཅད་འབུགས་སོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་རྡོ་རྗེ་ཡང་སངས་རྒྱས་ཀྱི་ཆོས་རིན་པོ་ཆེ་ཐམས་ཅད་ཕུགས་པར་ཁོང་དུ་ཆུད་པར་བྱེད་དོ། །རིགས་ཀྱི་བུ་འདི་ལྟ་སྟེ་དཔེར་ན། རྡོ་རྗེ་ནི་བྲག་ཐམས་ཅད་ཤིགས་པར་འཇོམ་མོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་རྡོ་རྗེ་ཡང་། ལྟ་བའི་རྣམ་པ་ཐམས་ཅད་ཀྱི་བྲག་ཤིགས་པར་འཇོམ་མོ། །རིགས་ཀྱི་བུ་འདི་ལྟ་སྟེ་དཔེར་ན། རྡོ་རྗེ་རིན་པོ་ཆེ་ནི་ཆག་ཀྱང་ཐམས་ཅད་ལས་ཁྱད་པར་དུ་འཕགས་པའི་གསེར་གྱི་རྒྱན་ཟིལ་གྱིས་གནོན་ཏོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་རྡོ་རྗེ་རིན་པོ་ཆེ་བསམ་པ་ལོག་པར་ཞུགས་པས་ཆག་པར་གྱུར་ཀྱང་ཉན་ཐོས་དང་རང་སངས་རྒྱས་ཐམས་ཅད་ཀྱི་ཡོན་ཏན་གྱི་གསེར་གྱི་རྒྱན་ཟིལ་གྱིས་གནོན་ཏོ། །རིགས་ཀྱི་བུ་འདི་ལྟ་སྟེ་དཔེར་ན། རྡོ་རྗེ་རིན་པོ་ཆེ་ནི་ཆག་ཀྱང་ཕོངས་པ་ཐམས་ཅད་རྣམ་པར་སེལ་ཏོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་རྡོ་རྗེ་རིན་པོ་ཆེ་ནན་ཏན་མེད་པས་ཆག་པར་གྱུར་ཀྱང་། འཁོར་བའི་ཕོངས་པ་ཐམས་ཅད་རྣམ་པར་སེལ་ཏོ།