།རྒ་བར་མི་འགྱུར་རོ། །དེ་བཞིན་དུ་བྱང་ཆུབ་སེམས་དཔའ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་རོའི་བཅུད་ཀྱི་ཚོགས་འཐུངས་པ་ཡང་བསྐལ་པ་གྲངས་མེད་པར་འཁོར་བ་ན་འཁོར་ཡང་ཡོངས་སུ་སྐྱོ་བ་མེད་ལ་འཁོར་བའི་སྐྱོན་གྱིས་མི་གོས་སོ། །རིགས་ཀྱི་བུ་འདི་ལྟ་སྟེ་དཔེར་ན། སྨན་གྱི་རོ་སྦྱར་རོ་ཅོག་ཐམས་ཅད་དུ་ཆུ་ནི་སྔོན་དུ་འགྲོ་བ་སྟེ། གང་ལའང་སྐྱོན་དུ་མི་འགྱུར་རོ། །དེ་བཞིན་དུ་བྱང་ཆུབ་སེམས་དཔའི་སྤྱོད་པ་དང་། སྨོན་ལམ་གྱི་ཚོགས་སྦྱར་བ་ཐམས་ཅད་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་ནི་སྔོན་དུ་འགྲོ་བ་སྟེ། གང་ལ་ཡང་སྐྱོན་དུ་མི་འགྱུར་རོ། །རིགས་ཀྱི་བུ་འདི་ལྟ་སྟེ་དཔེར་ན། མིའི་དོན་དུ་བྱ་བ་ཐམས་ཅད་ལ་ནི་སྲོག་གི་དབང་པོ་སྔོན་དུ་འགྲོའོ། །དེ་བཞིན་དུ་བྱང་ཆུབ་སེམས་དཔའ་སངས་རྒྱས་ཀྱི་ཆོས་ཐམས་ཅད་ཡང་དག་པར་བླང་བ་ལའང་བྱང་ཆུབ་ཀྱི་སེམས་སྔོན་དུ་འགྲོའོ། །རིགས་ཀྱི་བུ་འདི་ལྟ་སྟེ་དཔེར་ན། སྐྱེས་བུ་སྲོག་གི་དབང་པོ་དང་བྲལ་བ་ནི་ལས་ཐམས་ཅད་ལ་མཐུ་མེད་པས་ཕ་མ་དང་གཉེན་བཤེས་ཀྱི་ཚོགས་ཀྱིས་ཀྱང་ཉེ་བར་འཚོ་བར་བྱར་མེད་དོ། །དེ་བཞིན་དུ་བྱང་ཆུབ་སེམས་དཔའ་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་དང་བྲལ་བ་ཡང་། སངས་རྒྱས་ཀྱི་ཡེ་ཤེས་ཐོབ་པར་བྱ་བ་ལ་མཐུ་མེད་པས་སེམས་ཅན་ཐམས་ཅད་ཀྱིས་ཀྱང་ཐམས་ཅད་མཁྱེན་པ་ཉིད་ཀྱི་ཡོན་ཏན་གྱིས་ཉེ་བར་འཚོ་བར་བྱར་མྱེད་དོ། །རིགས་ཀྱི་བུ་འདི་ལྟ་སྟེ་དཔེར་ན། རྒྱ་མཚོ་ཆེན་པོ་ནི་དུག་ཐམས་ཅད་ཀྱིས་གདུག་པར་མི་ནུས་སོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་རྒྱ་མཚོ་ཆེན་པོ་ཡང་ལས་དང་ཉོན་མོངས་པ་དང་། ཉན་ཐོས་དང་རང་སངས་རྒྱས་སུ་སེམས་བསྐྱེད་པའི་དུག་ཐམས་ཅད་ཀྱིས་གདུག་པར་མི་ནུས་སོ། །རིགས་ཀྱི་བུ་འདི་ལྟ་སྟེ་དཔེར་ན། ཉི་མའི་དཀྱིལ་འཁོར་ནི་སྐར་མ་ཐམས་ཅད་ཀྱི་འོད་ཀྱིས་ཐུབ་པར་མི་ནུས་སོ། །