དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་ཉི་མའི་དཀྱིལ་འཁོར་ཡང་ཉན་ཐོས་དང་རང་སངས་རྒྱས་ཀྱི་སྐར་མ་ཐམས་ཅད་ཀྱི་ཡོན་ཏན་ཟག་པ་མེད་པའི་འོད་ཀྱིས་མི་ཐུབ་བོ། །རིགས་ཀྱི་བུ་འདི་ལྟ་སྟེ་དཔེར་ན། རྒྱལ་པོའི་བུ་སྐྱེས་ནས་ཡུན་རིང་དུ་མ་ལོན་པ་ཡང་བློའི་མཆོག་ཏུ་བྱ་བ་ནས་རྒན་པ་ཐམས་ཅད་རིགས་སུ་རིགས་དང་ལྡན་པར་སྐྱེས་པ་དང་། དབང་གིས་ཟིལ་གྱིས་གནོན་ཏོ། །དེ་བཞིན་དུ་བྱང་ཆུབ་སེམས་དཔའ་བྱང་ཆུབ་ཏུ་སེམས་བསྐྱེད་ནས་རིང་པོ་མ་ལོན་པ་ཆོས་ཀྱི་རྒྱལ་པོ་དེ་བཞིན་གཤེགས་པའི་རིགས་སུ་སྐྱེས་པ་ལས་དང་པོ་བ་ཡང་ཡུན་རིང་པོ་ནས་ཚངས་པར་སྤྱོད་སྤྱོད་པའི་ཉན་ཐོས་ནས་རྒན་པ་ཐམས་ཅད་བྱང་ཆུབ་ཀྱི་སེམས་ཀྱི་སྙིང་རྗེ་ཆེན་པོའི་དབང་གི་ཟིལ་གྱིས་གནོན་ཏོ། །རིགས་ཀྱི་བུ་འདི་ལྟ་སྟེ་དཔེར་ན། བློན་པོ་ཇི་ཙམ་དུ་ནས་རྒན་པས་ཀྱང་རྒྱལ་བུ་གཞོན་ནུ་ཇི་ཙམ་དུ་ཆུང་བ་ལ་ཡང་ཕྱག་བྱ་དགོས་སོ། །རྒྱལ་པོའི་བུས་ཀྱང་བློན་པོ་རྒན་པོ་ལ་རིམ་གྲོར་མི་བྱ་བ་མ་ཡིན་ནོ། །དེ་བཞིན་དུ་ཉན་ཐོས་དང་རང་སངས་རྒྱས་ཇི་ཙམ་དུ་རྒན་ལ་ཇི་ཙམ་དུ་ཚངས་པའི་སྤྱོད་པ་རིང་དུ་སྤྱོད་སྤྱོད་པ་རྣམས་ཀྱིས་ཀྱང་བྱང་ཆུབ་སེམས་དཔའ་ལས་དང་པོ་བ་ལ་གདུད་པར་བྱའོ། །བྱང་ཆུབ་སེམས་དཔས་ཀྱང་ཉན་ཐོས་དང་རང་སངས་རྒྱས་རྣམས་ལ་རིམ་གྲོ་མེད་པར་བྱ་བ་མ་ཡིན་ནོ། །རིགས་ཀྱི་བུ་འདི་ལྟ་སྟེ་དཔེར་ན། རྒྱལ་པོའི་བུ་ཐམས་ཅད་ཀྱིས་མི་དགོས་པར་བྱ་བ་ཞིག་ནའང་རྒྱལ་པོའི་མཚན་དང་ལྡན་ན་རིགས་ཀྱི་བཙུན་པས་རྒྱལ་པོའི་བློན་པོ་དམ་པར་བྱ་བ་ཐམས་ཅད་དང་ཡང་མི་མཉམ་མོ། །དེ་བཞིན་དུ་བྱང་ཆུབ་སེམས་དཔའ་ལས་དང་པོ་བ་ལས་དང་ཉོན་མོངས་པའི་ཉེ་བར་ལེན་པ་ཐམས་ཅད་ཀྱིས་ནོན་པ་ཡང་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་མཚན་དང་ལྡན་ན། སངས་རྒྱས་ཀྱི་རིགས་ཀྱིས་བཙུན་ཞིང་ཆེ་བས་ཉན་ཐོས་དང་རང་སངས་རྒྱས་མཆོག་ཏུ་ཕྱིན་པ་ཐམས་ཅད་དང་ཡང་མི་མཉམ་མོ། །