བསྐུ་བ་གྲུབ་པའི་སྐྱེས་བུ་ནི་མིའི་གནས་ཐམས་ཅད་ན་རྣམ་པར་སྤྱོད་ཀྱང་མྱི་ཀུན་གྱིས་མི་མཐོང་ངོ་། །དེ་བཞིན་དུ་བྱང་ཆུབ་སེམས་དཔའ་བྱང་ཆུབ་ཏུ་སེམས་བསྐྱེད་པའི་ཤེས་རབ་དང་སྨོན་ལམ་གྱིས་ཉེ་བར་བསྟན་པ་བདུད་ཀྱི་ཡུལ་ཐམས་ཅད་རྣམ་པར་སྤྱོད་ཀྱང་བདུད་ཐམས་ཅད་ཀྱིས་མི་མཐོང་ངོ་། །རིགས་ཀྱི་བུ་འདི་ལྟ་སྟེ་དཔེར་ན། རྒྱལ་པོ་ཆེན་པོ་ལ་རྟེན་པའི་སྐྱེས་བ་ནི་སྐྱེ་བོ་མ་རབས་ཐམས་ཅད་ཀྱིས་མི་འཇིགས་སོ། །དེ་བཞིན་དུ་བྱང་ཆུབ་སེམས་དཔའ་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་ཆོས་ཀྱི་རྒྱལ་པོ་ཆེན་པོ་ལ་རྟེན་པ་ཡང་སྒྲིབ་པ་དང་བར་ཆད་དང་ངན་སོང་ཐམས་ཅད་ཀྱིས་མི་འཇིགས་སོ། །རིགས་ཀྱི་བུ་འདི་ལྟ་སྟེ་དཔེར་ན། ས་ཕུག་གི་ཁྱིམ་ན་གནས་ན་སའི་གསེ་བ་ཐམས་ཅད་རླན་གྱིས་ཡོངས་སུ་གང་བས་མེའི་འཇིགས་པ་མེད་དོ། །དེ་བཞིན་དུ་བྱང་ཆུབ་སེམས་དཔའ་སེམས་ཀྱི་རྒྱུད་བྱང་ཆུབ་ཀྱི་སེམས་ཀྱི་དགེ་བའི་རྩ་བས་མངོན་པར་བརླན་པ་ལའང་ཉན་ཐོས་དང་རང་སངས་རྒྱས་ཀྱི་རྣམ་པར་གྲོལ་བའི་ཡེ་ཤེས་ཀྱི་མྱེས་འཇིགས་པ་མེད་དོ། །རིགས་ཀྱི་བུ་འདི་ལྟ་སྟེ་དཔེར་ན། དཔའ་བོ་ལ་རྟེན་པའི་མྱི་ནི་དགྲ་ཐམས་ཅད་ཀྱིས་མི་འཇིགས་སོ། །དེ་བཞིན་དུ་བྱང་ཆུབ་སེམས་དཔའ་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་དཔའ་བོ་ལ་རྟེན་པ་ཡང་སྤྱོད་པ་ངན་པའི་དགྲ་ཐམས་ཅད་ཀྱིས་མི་འཇིགས་སོ། །རིགས་ཀྱི་བུ་འདི་ལྟ་སྟེ་དཔེར་ན། ལྷའི་དབང་པོ་བརྒྱ་བྱིན་རྡོ་རྗེའི་ལག་ཅ་ཐོགས་པ་ནི་ལྷ་མ་ཡིན་གྱི་ཚོགས་ཐམས་ཅད་རབ་ཏུ་འཇོམ་མོ། །དེ་བཞིན་དུ་བྱང་ཆུབ་སེམས་དཔའ་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་བརྟན་པའི་ལྷག་པའི་བསམ་པ་རྡོ་རྗེའི་ལག་ཅ་ཐོགས་པ་ཡང་བདུད་དང་ཕས་ཀྱི་རྒོལ་བའི་ལྷ་མ་ཡིན་གྱི་ཚོགས་ཐམས་ཅད་རབ་ཏུ་འཇོམ་མོ། །རིགས་ཀྱི་བུ་འདི་ལྟ་སྟེ་དཔེར་ན། རྩི་རོའི་བཅུད་འཐུངས་པའི་སྐྱེས་བུ་ནི་ཚེ་ཤིན་ཏུ་རིང་བར་གནས་སོ། །ཉམ་ཆུང་བར་མི་འགྱུར་རོ། །རྒ་བར་མི་འགྱུར་རོ།